Шоми дирӯз,16 октябр, дастаи мунтахаби миллии футзали Тоҷикистон дар доираи бозиҳои гурӯҳии мусобиқаи интихобии қаҳрамонии Осиё-2018 тими якачини футзали Афғонистонро бо ҳисоби 4-3 шикаст дода, ба марҳилаи ниҳоии қаҳрамонии Осиё-2018 роҳ ёфт.

Бозиҳои интихобии қаҳрамонии Осиё-2018 оид ба футзал дар гурӯҳи “В”-и минтақаи Ҷанубу Марказ аз 15-ум то 17-уми октябри соли равон дар шаҳри Табрези Эрон идома дорад.

Дастпарварони Ҳусейн Шодиев, сармураббии мунтахаби футзали кишвар пас аз шикаст додани тими миллии Афғонистон новобаста аз натиҷаи бозии охиринаш муқобили тими Эрон ба марҳилаи ниҳоии қаҳрамонии Осиё-2018, роҳхат гирифт.

Рақобати охирини футзалчиёни тоҷик дар гурӯҳи “В” шоми имрӯз, 17-уми октябр, дар варзишгоҳи “Пур Шарифи”-и шаҳри Табрез бо тими мунтахаби Эрон баргузор гардида, пас аз бозӣ ғолиби гурӯҳ муайян мегардад. Тими Эрон, қаҳрамони феълии Осиё, пеш аз муҳлат ҳаққи ширкат дар марҳилаи ниҳоии қаҳрамонии Осиё-2018-ро ба даст овардааст.

Мусобиқаи интихобии қаҳрамонии Осиё-2018 дар минтақаи Ҷанубӣ ва Марказӣ бо ширкати ҳафт даста дар ду гурӯҳ ҷараён дорад.

Дар гурӯҳи “А” мунтахаби Ӯзбакистон, дорандаи медалҳои нуқраи қаҳрамони Осиё ва тими Қирғизистон бо доштани шашимтиёзӣ ба марҳилаи финалӣ роҳ ёфтанд. Имрӯз барои маълум гардидан ғолиби гурӯҳи “А”, ин ду даста вориди сабқат мегарданд.

Ёдовар мешавем, ки ду дастаи беҳтарини ин гурӯҳ ба марҳилаи ниҳоии қаҳрамонии Осиё, ки аз 6-ум то 18-уми феврали соли 2018 дар Тайбеи Чин баргузор мешавад, роҳ меёбад.

Сабқати интихобии мусобиқаи қаҳрамонии Осиё-2018 оид ба футзал:

Минтақаи Ҷанубӣ ва Марказӣ. Гурӯҳи “В”

Даври 1-ум 15 октябр (якшанбе)
20:30 – Афғонистон – Эрон 2-8

Даври 2-юм 16 октябр (душанбе)

20:30 – Тоҷикистон – Афғонистон 4-3

Даври 3-юм 17 октябр (сешанбе)

20:30 – Эрон – Тоҷикистон

Оғози бозиҳо – ба вақти Душанбе.