Ҳамлагари дастаҳои миллӣ ва олимпии Тоҷикистон (U-23) Шаҳром Самиев фаъолияти худро дар дастаи “Андиҷон”, ки шомили суперлигаи Ӯзбекистон аст, идома медиҳад. Дар ин бора Федератсияи футболи Тоҷикистон хабар медиҳад.

Гуфта мешавад, ки Шаҳром Самиев бо дастаи “Андиҷон” шартномаи сесола баст. Қаблан Самиев дар дастаҳои”Барқчӣ”, “Помир”, “Истиқлол” (ҳама аз Тоҷикистон), “Рубин” (Русия), “Шериф”, “Динамо-Авто”, “Зимбру” (ҳама аз Молдова), “Торпедо-Жодино”, “Ислоч” (ҳар ду аз Беларус) ҳунарнамоӣ кардааст. Охирин бошгоҳи Самиев “Милсами”-и Молдова буд.

Шаҳром Самиев 8-уми феврали соли 2001 дар шаҳри Душанбе ба дунё омада, фаъолияти касбиаш дар дастаҳои “Барқчӣ” ва ССКА “Помир” шуруъ шудааст.

Вай дар соли 2019 узви бошгоҳи “Истиқлол”-и Душанбе гардид ва дар ҳайати ин даста ба унвони қаҳрамони Тоҷикистон мушарраф шуд. Инчунин, ӯ дар тими “Истиқлол” Суперҷом ва Ҷоми Тоҷикистонро ба даст овардааст.

Фаъолияти Самиев дар тими мунтахаби Тоҷикистон низ аз соли 2019 оғоз гардидааси. Дар ин муддат ӯ дар ҳайати мунтахаби кишвар 27 бозӣ карда, муаллифи 7 гол гардидааст. Дар Ҷоми Осиё-2023 Самиев дар ҳайати тими миллии Тоҷикистон дар панҷ бозӣ ширкат карда, 165 дақиқаро дар майдон сипарӣ кардааст.

Яҳё МАҲМАДНАБИЕВ, “ҶТ”