28 - сол муқаддам бо мақсади таъмини оммавияти варзиш ва ҷалби бештари ҷавонону наврасон ба тарзи ҳаёти солим Федератсияи тенниси Тоҷикистон ҳамчун ташкилоти ҷамъиятӣ таъсис ёфт. Масъулини соҳа дар ташкил ва таъмини оммавияти ин навъи варзиш то андозае муваффақ буданд, зеро ягона Муассисаи давлатӣ “Мактаби махсуси варзишӣ оид ба теннис” дар Тоҷикистон соҳиби чор адад кортҳои хокӣ дар варзишгоҳи марказии шаҳри Душанбе буд. Дар соли 1997 аввалин маротиба теннисбозони тоҷик дар мусобиқаи байналмилалӣ барои дарёфти “Ҷоми Девис” иштирок намуда, ба мақоми дуввум даст ёфтанд. Аммо баъд аз навсозии кортҳои мазкур ва тағйир ёфтани соҳибмулк чунин натиҷа ва дастовардҳо мутаассифона дар даҳ соли баъдӣ ба даст наомад ва оҳиста - оҳиста фаъолияти федератсия сар аз соли 2007 то соли 2015 пурра қатъ гардид.

Масъулини соҳа иллати аз фаъолият боз мондани федератсияро дар имкони пардохт карда натавонистани ҳаққи аъзогӣ ба Федератсияи байналмилалии теннис гуфтанд. Аммо соли 2015 бо ташаббуси соҳибкор ва ҳамзамон раиси федератсия Шоҳин Саидов маблағи қарзи умумӣ дар ҳаҷми 35 ҳазору 500 доллар пардохт гардид. Акнун тайи шаш сол мешавад, фаъолияти ин навъи варзиш то андозае беҳтар гардидаасту будани он дар мамлакат эҳсос мегардад. Аммо чизи нигаронкунандае, ки то ҳол дар мадди аввал қарор дорад ва ба пешрафту рушди ин соҳа таъсир мерасонад, ин маҳрум гардидани ягона Муассисаи давлатӣ “Мактаби махсуси варзишӣ оид ба теннис” дар Тоҷикистон аз кортҳои хусусии худ аст.

Тавре аз суҳбат бо сармуррабии дастаи мунтахаби тенниси Ҷумҳурии Тоҷикистон Абдурасул Муҳиддинов ба мо маълум гардид, варзишгарони муассиса солҳои зиёд аст, ки дар корхонаи воҳиди давлатии “Қасри теннис” - и шаҳри Душанбе ба таври иҷора фаъ-олияти худро пеш мебаранд ва тамринҳои варзишгарон низ бо пардохти маблағи муайян дар як моҳ (45 сомонӣ барои як соат) дар ин қаср сурат мегирад. Ҳарчанд дар Қасри теннис ва маҷмааи обии варзишии шаҳри Душанбе низ шароитҳои хубе баҳри тамрини варзигарони ин соҳа муҳайё гардидааст, аммо нархаш ҳам хеле гарон аст (150 сомонӣ дар як соат), ки на ҳама вақт теннисбозони мо имкони пардохти чунин маблағро доранд”.

Ба гуфтаи сармураббӣ КВД “Роҳи оҳани Тоҷикистон” ин вазъиятро ба назар гирифта, дар асоси мактуб барои теннисбозон шароит фароҳам сохт, ки рӯзе ду маротиба дар қисмати саҳар ва бегоҳ дар доираи 2 соатӣ тамрин гузаронанд.

- Аммо як чизро бояд ба назар гирифт, ки барои варзишгари касбӣ гардидан, дар ин соҳа дар як рӯз на камаш аз шаш соат мо бояд ба тамрин бипардозем, то тавонем варзишгарони рақобатпазирро омода намоем, - мегуяд, Абдурасул Муҳиддинов.

Агар дар умум ба таъсис ва рушди ин навъи варзиш дар мамлакат назар афканем, аз аввалин қадам дар ин соҳа дар соли 1929 то таъсиси Мактаби ҷумҳуриявии махсуси кӯдакону наврасон оид ба теннис дар соли 1955 ва таъсиси Федератсияи тенниси Тоҷикистон дар даврони соҳибистиқлолии кишвар қариб як аср сипарӣ мегардад, аммо чун ба дастовардҳо назар кунем, хело кам ва ҳатто дар сатҳи паст ҳам гӯем, хато намекунем. Зеро дар ин муддати тӯлонии таърих то ҳол ба натиҷаи арзандае дар сатҳи байналмилалӣ мушарраф нашудаем ба ҷуз аз панҷ соли ахир, ки ҳамин ҳам ангуштшумор аст.

Феълан Зайнулло Имомалиев, мудири қисми таълимии “Мактаби махсуси варзиш оид ба теннис” камнатиҷагирии варзишгарони риштаи тенниси кишварро ғайр аз набудани макони доимии тамрин боз дар як чанд омилҳои дигар низ мебинад: “Аввал барои омодагии пеш аз сафарбарӣ, бояд тамринҳои пайвастаро ҳамаррӯза дар ҳаҷми 6 - 8 соат анҷом диҳем ва рақобатнокӣ миёни варзишгарон таъмин бошад, зеро яке аз роҳҳои асосии муваффақият дар ин соҳа ин рақобатнокии варзишгарон мебошад, ки мутаассифона ин чиз дар бисёр минтақаҳои кишвари мо нест. Сабаби асосии он низ набудани майдонҳои махсус ва гурӯҳҳои машғулиятии теннис дар дигар манотиқи кишвар аст.

Ҳамзамон Зайнулло Имомалиев афзуд, ки: “Барои ҳарчӣ беҳтар гардидани фаъолияти тенниси тоҷик моро лозим аст, ки тамоми иншоотҳои варзишии теннисро дар як “Мактаби ҷумҳуриявии махсус оид ба теннис” муттаҳид созем ва ин имкон медиҳад, то дар кортҳое, ки дар минтақаҳои гуногуни ҷумҳурӣ сохта шудаанд, гурӯҳҳоро таъсис намоем. Дар ин ҳолат тенниси тоҷик муназзам рушд намуда, пайдо намудани чеҳраҳои нав омили асосии рақобатнокӣ мегардад”.

Бо вуҷуди мушкилотҳои мавҷуда, пас аз шурӯи дубораи федератсия дар соли 2015 дастовардҳои теннисбозони тоҷик то андозае назаррас гардидааст. Маҳз бо заҳмату талошҳои масъулини федератсия давоми шаш соли охир наздик ба даҳ мусобиқаи байналмилалӣ дар ҷумҳурӣ гузаронида шуд, ки ин барои рушди минбаъдаи ин навъи варзиш дар мамлакат мусоидат намуд. Ҳамзамон дар ин муддат шумораи шавқмандони тенниси тоҷик низ беш аз 300 нафар гардида, беҳтарин теннисбозон дар ин давра - Исамҷон Шарифов, Бахтиёр Исроилов, Сумая Тухтаева ва дигарон борҳо дар мусобиқаҳои байналмилалӣ шарафи варзишии кишварро боло бардоштаанд.

Аз натиҷаҳои шаш соли охир метавон ба хулосае омад, ки агар мушкилоти мавҷудаи соҳа дар наздиктарин фурсат ҳалли худро ёбад, умед аст дар солҳои наздик аз ин навъи варзиш низ чеҳраҳои муваффақ пайдо кунем.


Қиёмиддин
МАҲМАДҶОНОВ,
“ҶТ”