17- октябр дар ноҳияи Фирдавсии шаҳри Душанбе бо иштироки Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, Президенти Кумитаи миллии олимпии Тоҷикистон, муҳтарам Эмомалӣ Раҳмон ва Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ Клуби инноватсионӣ ва фитнеси “Крокус фитнес” ифтитоҳ ёфт.

Иншооти мазкур бо дарназардошти талаботҳои муосир бунёд гардида, бо тамоми дастгоҳ ва таҷҳизоти зарурӣ муҷаҳҳаз гардонида шудааст. Клуб барои машғулшавӣ ба намудҳои гуногуни варзиш, тарғиби тарзи ҳаёти солим ва нигоҳдории зебоӣ имконияти заруриро фароҳам овардааст. Аз ҷумла, дар як вақт дар ин иншоот бештар аз 2 ҳазору 500 нафар метавонанд, ба намудҳои гуногуни варзиш машғул шаванд ва бо онҳо мураббиёни ботаҷрибаву таҳсилдида машғулият мегузаронанд.

“Крокус фитнес” дорои се ҳавзи замонавии шиноварӣ буда, ҳавзи калони он имконият дорад, ки варзишгарони касбиро низ ба машғулият фаро гирад. Ҳамчунин барои занон як ҳавзи алоҳидаи оббозӣ ва барои кӯдакон ҳавзи махсус бунёд гардида, бо дарназардошти меъёрҳои санитарӣ ҳавзҳои шиноварӣ фаъолият менамоянд. Коркарди об дар 5 марҳила амалӣ гашта, инчунин ҳарорати муътадили дохили ҳавзҳо дар фасли зимистон бо истифода аз дастгоҳҳои муосири соҳавӣ муътадил нигоҳ дошта мешавад. Дар дохили Клуби инноватсионӣ ва фитнеси “Крокус фитнес” толори барҳавову замонавии варзишӣ барои машғулшавӣ ба тамринҳои омехта бунёд гардида, дар ин ҷо варзишгарон ва дӯстдорони тарзи ҳаёти солим метавонанд ба намудҳои варзиши бокс, муҳорибаи омехта, гӯштин, гимнастика машғул шаванд. Ин қисмати иншоот бо тамоми дастгоҳ ва шароити зарурӣ муҷаҳҳаз буда, барои кӯдакон дар дохили он клуби алоҳида фаъолият менамояд.

Дар маҷмуъ масоҳати бинои “Крокус фитнес” 7500 метри мураббаъ мебошад. Дар дохили он ду толори барҳавову замонавӣ барои машғулшавӣ ба фитнес бунёд гардида, барои занон толори алоҳида ва барои мардон дар алоҳидагӣ фитнес-толорҳо ташкил гардидааст. Танҳо дар дохили толори мардона 40 адад дастгоҳҳои машқу тамрини бадан насб гардида, бо варзишгарон ва дӯстдорони тарзи ҳаёти солим мутахассисони касбӣ машғулият мегузаронанд.

Бояд қайд кард, ки дар клуби мазкур таҷҳизоти комилан насли нави соҳавӣ васл гардида, онҳо аз маъруфтарин ширкати амрикоӣ харидорӣ шудаанд, ки ин имконият медиҳад хоҳишмандон дар фазои мусоиду мувофиқ ба талаботҳои байналмилалӣ тамрин намоянд. Дар Клуби инноватсионӣ ва фитнеси “Крокус фитнес” бештар аз 100 нафар соҳиби ҷои кори доимӣ гардиданд.
Дар таҳхонаи иншооти мазкур СПА-салон ташкил гардида, барои бонувон хизматрасониҳои гуногун вобаста ба нигоҳдории зебоии пусту рӯй, хизматрасониҳои касметологӣ ва намудҳои маҳс пешниҳод карда мешавад.

Шаҳрвандон ҳамчунин метавонанд, ки аз фаъолияти ҳамоми туркӣ, буғи хушк, саунаи финнӣ, ҳуҷраи барфӣ, саунаи русӣ ва саунае, ки намаки дохили он аз Ҳимолой оварда шудааст, истифода баранд ва ин имконият барои бонувон ва барои мардон дар алоҳидагӣ фароҳам мебошад.

Тамоми бахшҳои дохили “Крокус фитнес” дорои утоқҳои алоҳидаи ивазкунии сару либос ва истироҳат буда, онҳо бо ҷевонҳои замонавӣ, ки барои ҳар нафар дар алоҳидагӣ пешбинӣ гардидааст, муҷаҳҳаз мебошанд.

Дар дохили маҷмааи мазкур ҳамчунин ошхонаи зебову замонавӣ фаъолият менамояд, ки дар он ҳам хӯрокҳои варзишӣ ва ҳам таомҳои аврупоӣ ба мизоҷон пешниҳод карда мешавад.