Барои ӯ зиндагӣ ҳар субҳ аз сари нав оғоз мегардад. Ҳар субҳ гуё дигарбора таваллуд мешавад. Ҳар субҳ чун ҷавони нав вораставу баркамол расида медаваду тамрин мекунад, чун варзиш дар мағз андар мағзаш ҷой гирифтаву ҳаёти хешро бе он тасаввур карда наметавонад. Агарчи дар ҳоли ҳозир соати умри ин мард ба 71 дакка хӯрад ҳам, аммо анҷоми амалҳои варзишӣ меъёри ҳамарӯзаи зиндагиаш аст.

РӮЗНОМАНИГОРИ ВАРЗИШГАР

Шамсзода Давлаталӣ 24-уми сентябри соли 1952 дар деҳаи Давлатободи ноҳияи Москва (ҳоло Мир Сайид Алии Ҳамадонӣ)-и вилояти Хатлон таваллуд шудааст. Номбурда дар мактаби миёнаи №15 ба номи Фирдавсии ноҳияи Ҳамадонӣ солҳои 1960-1968 ва мактаби №6 ба номи Рӯдакии шаҳри Кӯлоб солҳои 1968-1970 таҳсил намудааст. Баъд аз хатми мактаби миёна Шамсов дар сафи Қувваҳои Мусаллаҳи Иттиҳоди Шуравӣ солҳои 1970-1972 хизмат намуда, пас аз адои хизмат соли 1978 ба факултаи забон ва адабиёти руси Донишгоҳи давлатии педагогии Кӯлоб (ҳоло ДДК ба номи Абӯабдуллоҳи Рӯдакӣ) дохил шуда, онро соли 1983 хатм намудааст.

Шамсов рӯзноманигор, варзишгар, узви ИЖТ, узви ассотсиатсияи журналистони риштаи варзиши Тоҷикистон, Корманди шоистаи варзишии Тоҷикистон, Аълочии матбуоти Тоҷикистон, номзад ба устоди варзиши СССР оид ба варзиши сабук, устоди варзиши собиқадорони Федератсияи Русия оид ба варзиши сабук, узви Кумитаи байналмилалии клубҳои дав мебошад, ки соли 2012 ба китоби фахрии Кумитаи байналмилалии дӯстдорони дав дохил гардидааст.

ХАСТАГИНОПАЗИР

Чолокӣ, чобукӣ ва хастагинопазириро Давлаталӣ Шамсов аз замони худро шинохтану ба худ баҳо додан дар мағзу пӯсташ эҳсос мекард ва ба варзиш гаравиданро беҳтарин роҳи комёб гардидан медонист. Ӯ дафтари хотироташро варақгардон намуда ба ёд меорад, ки аз хурдӣ дар вуҷудаш барои анҷоми ҳар коре эҳсоси хастагӣ намекард ва маҳз ин омил ӯро кашонд ба ҷодаи варзиш, махсусан ба риштаи намуди давидан ба масофаи тулонӣ.

Гузораи вақту фосила ва гардиши айём соат ба соат Давлаталӣ Шамсови ташнаи варзишро ба мақсад наздик мекард. Ҳангоми 11-12 сол доштан, дар мусобиқаҳои маҳалливу ноҳиявӣ иштирок карданро шуруъ мекунаду дар кӯтоҳтарин фурсат ҳамчун ҷавони чобуку тездав дар ноҳия ном бароварда, шуҳрату шонаш вилояти онвақтаи Кӯлобро тасхир мекунад. Акнун ҳамагон аз маҳорати фавқулодаи Давлаталии ҷавон мегуфтанду аҳсан мехонданд, ки дар мусобиқаҳои маҳалливу ноҳиявӣ ба гунае ном ба номаш буд.

ШОРЕҲИ ВАРЗИШӢ

Меҳру муҳаббат ба варзиш Давлаталӣ Шамсовро на танҳо табдил ба як варзишгари муваффақ кард, инчунин, аз ӯ як шореҳи бомаҳорати варзиш сохт. Мавсуф шуруъ аз соли 1973 дар газетаҳои вилоятии “Ҳақиқати Кӯлоб”, “Роҳи Ленинӣ”, “Кулябская правда” фаъолият намуда, садҳо хабару мақолаҳои варзиширо дар ин ҳафтаворҳо рӯйи чоп овардааст. Маҳз маҳорату малакаи баланди хабарнигории Шамсов дар риштаи варзиш буд, ки солҳои 1985-1990 дар озмуни ҷумҳуриявии донишмандони варзиш, ки бо ибтикори рӯзномаи “Коммунист Таджикистана” рӯйи даст гирифта шуда буд, сазовори ҷойи аввал гардид.

Шамсовро аксарият ҳанӯз аз замони ҳамкорӣ намуданаш бо рӯзномаи “Роҳи Ленинӣ” мешинохтанд. Ҳарчанд номбурда дар ин рӯзнома ҳамчун коромӯз ва мухбири ғайрикасбӣ фаъолият дошт, аммо дар самти инъикоси ҳолати будубоши варзишгарон ва умуман соҳаи варзиш аз ҳеҷ рӯзноманигори касбӣ камӣ надошт ва пайваста мекӯшид, чеҳраи варзишгарони ҷадидро ба омма шиносонад.

Баъд аз солҳои 90-ум Шамсов фаъолияти рӯзноманигориашро дар телевизиони “Кӯлоб” идома дода, то соли 2008 ҳамчун муаллифи барномаҳои варзишӣ дар ин телевизион ифои вазифа намудааст.

ФАТҲИ МАЙДОНҲОИ БУЗУРГ

Бо гузораи вақту фосила Давлаталӣ Шамсов ба як рӯзноманигори солори варзишӣ табдил гардида буд, вале машғул шудан ба варзиш ҳам кору пайкори ҳамарӯзааш буд. То соли 1966 номбурда танҳо дар мусобиқаҳои дохилӣ иштирок мекард, вале вақти он расида буд, ки бояд ин давандаи моҳир маҳораташро берун аз марзу хоки бобоӣ нишон диҳад ва номи абармиллатеро бо номи тоҷик дар ақсои олам муаррифӣ намояд. Хушбахтона, соли 1967 он рӯзу вақти бузургу фаромӯшношуданӣ фаро расид ва акнун шуҳрату шони дохилӣ ӯро ба мусобиқаҳои бузурги ҷаҳонӣ бурд. Бузургтарин дастоварди Шамсов дар он сол ноил гардиданаш ба мақоми аввали мусобиқаи умумииттифоқии дави марафонӣ буд, ки масофаи 42 километрро дар Ашқободи Туркманистон тай намуд.

Соли 1979 Давлаталӣ Шамсов нахустин бор ба мусобиқаи бонуфузи дав, ки бо номи “Марафони кайҳонӣ” шуҳрат дорад, роҳ ёфт. Ин мусобиқа ҳамасола дар шаҳри Королёви Русия баргузор мегардад, ки Шамсов ҳамасола иштирокчии фахрии мусобиқаи мазкур аст.

ДАВИДАН РӮИ БАРФ

Бояд иқрор шуд, ки дар ҳоли ҳозир Давлаталӣ Шамсов ягона варзишгари солхӯрдаест, ки Тоҷикистонро дар сатҳи байналмилалӣ муаррифӣ мекунад. Ин марди хастагинопазиру ба истилоҳ оҳанинпайкар, ҳатто борҳо маҳораташро дар давидан болои барф, ки бисёр душвору сангин аст, санҷидааст ва ин таҷриба низ барояш бомуваффақият анҷом ёфтааст. Соли 2018 замоне, ки соати умри Давлаталӣ Шамсов ба 68 дакка мехӯрд, дар мусобиқаи давидан болои барф дар Федератсияи Русия мақоми дуввумро ба номаш сикка зад.

ҒОЛИБИЯТ БО ПОЙИ МАЪЮБ

Зиндагиномаи Давлаталӣ Шамсов пур аз воқеаву хотироти аҷибу ғарибест, ки тули фаъолияти варзишиаш ба вуқуъ омадаанд. Беҳтарин лаҳзаҳои хотирмони Шамсов дар корномаи варзишиаш ин давидан бо пойи маъюб ва бо чунин ҳолат сазовори ҷойи намоён гаштанаш дар Мусобиқаи “Королёв”-и Русия ва ҳамлаи ногаҳонии саг дар марафони байналмилалии Барселонаи Испания мебошад, ки қаҳрамони мо ин ҳолатро ҳамеша бо шавқу завқ ба дӯстону пайвандонаш қисса мекунад.

БЕҲТАРИН ДАСТОВАРД

Соли 2017 барои Давлаталӣ Шамсов соли бобарору хотирмоне буд, зеро ӯ Ҷумҳурии Тоҷикистонро дар 41-умин марафони байналмилалии кайҳонӣ, ки дар шаҳраки Королёви Москваи Федератсияи Русия баргузор гардид, намояндагӣ кард. Дар ин мусобиқаи ҷаҳонӣ, ки беш аз 994 даванда аз манотиқи мухталифи Русия ва собиқ ҷумҳуриҳои шуравӣ иштирок доштанд, Шамсов тавонист масофаи 10 километрро дар муддати 54 дақиқаю 15 сония тай намуда, мақоми аввалро ба номаш муҳр занад. Ин ягона орзуи ин марди бо ҳуввияту ватандӯст буд, ки дар 67-солагияш ҷомаи амал пӯшид.

БА ҶОИ ХУЛОСА

Расидан ба фатҳи қуллаи мурод аз инсон заҳмату талоши зиёдро талаб мекунад ва Давлаталӣ Шамсов аз он заҳматкашони роҳи пурмашаққати рӯзноманигориву варзишӣ мебошад, ки бидуни ин ду гӯё нафас намекашад. Ҳамакнун ӯ ба синни 71 расидааст ва то ҳол тамрину омодагии худро идома дода, ҳар мусобиқаву чорабиниҳои варзиширо бесаброна интизорӣ мекашад. Зеро боварии комил дорад, ки агар умр вафо кунад, дар мусобиқаҳои дигар низ иштирок намуда, боз ҳам ливои номусро болои сар мебардорад.

Яҳё МАҲМАДНАБИЕВ, “ҶТ”