15-уми август дар тарабхонаи “Яккачинор”и шаҳри Душанбе барномаи фарҳангӣ – фароғатӣ бахшида ба Рӯзи варзишгарони Тоҷикистон баргузор гардид.

Чорабинии мазкур аз ҷониби Кумитаи кор бо ҷавонон ва варзиши назди Ҳукумати Ҷумҳурии Тоҷикистон доир шуда, дар он Абдулло Раҳмонзода, Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа, Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, масъулин ва собиқадорони соҳаи варзиши кишвар, роҳбарони вазорату идораҳо, мураббиёни муассисаҳои тайёрии варзишӣ, варзишгарон ва ғолибону ҷоизадорони мусобиқаҳои сатҳи байналмилалӣ иштирок намуданд.

Нахуст, Зулфиқор Гулаҳмадзода, раиси КҶВ суханронӣ намуда, ҳозирини маросим, бахусус варзишгарони кишварро, ки дар Бозиҳои олимпии Париж – 2024 ба натиҷаи баланд сазовор шуданд, табрик намуд.

Дар идома Абдулло Раҳмонзода баромад карда, пас аз табрики варзишгарон бо ин дастоварди бениҳоят арзанда барои миллати тоҷик қайд кард, ки ин ҳанӯз оғози роҳ аст ва варзишгарони мо метавонанд, дар оянда натиҷаҳои аз ин беҳтарро низ ба даст оваранд.

“Ҳамаи он варзишгароне, ки аз кишварамон дар Бозиҳои олимпӣ иштирок карданд, ҳаддиақал имкони ду маротибаи дигар иштирок дар чунин як мусобиқаи сатҳи байналмилалиро доранд. Зеро онҳо ҷавонанд ва қувваву матонати онро доранд, ки дар Бозиҳои олимпии баъдӣ натиҷаҳои беҳтар аз инро барои миллаташон ба армуғон оваранд”, – гуфт Абдулло Раҳмонзода.
Пас аз суханрониҳо ба дорандагони медали олимпии Париж - 2024 – Темур Раҳимов, Сомон Маҳмадбеков ва Давлат Болтаев ҷоизае, ки аз ҷониби Кумитаи кор бо ҷавонон ва варзиш барои иштирокчиёни Бозиҳои олимпии Париж – 2024 ташкил шуда буд, супорида шуд. Ҳамин тавр, ба ин се варзишгар аз ҷониби Кумита барои ба даст овардани медали биринҷии Бозиҳои олимпӣ маблағ дар ҳаҷми 10 000 доллари ИМА ва ба мураббиёни онҳо 10 000 сомонӣ супорида шуд.

Ҳамчунин, аз ҷониби маркази савдои “Пайкар” ба варзишгарони номбурда Сертификат бо имтиёзи 50 000 балл бо корти клубии “Пайкар” барои харид аз ин маркази савдо ва аз тарафи ширкати мобилии Тссел рақамҳои тиллоӣ туҳфа гардид.

Дар баробари ин, ба 11 нафар варзишгарони дигар, ки иштирокчии Бозиҳои олимпии Париж – 2024 буданд, барои иштироки сазовор дар ин мусобиқа 2000 сомонӣ ба онҳо ва 2000 сомонии дигар ба мураббиёнашон супорида шуд. Ҳамзамон, аз фурсати муносиб истифода бурда, ба чанде аз собиқадорон ва масъулини соҳаи варзиши кишвар низ туҳфаҳои хотиравӣ тақдим гардид.

Пас аз супоридани туҳфаҳо қисмати фарҳангии чорабинӣ оғоз шуда, ҳунармандони мумтози кишвар баҳри болидаруҳии ҳозирин сурудҳои худро пешкаш карданд.