“Барои як мард чил ҳунар кам аст”. Ин мақолест, ки ба қаҳрамони навбатии матлаби мо мувофиқ меафтад. Ӯ тавонистааст аз намудҳои гуногуни варзиш муваффақ шудаву шуҳратёр гардад. Ӯ касе нест ба ҷуз Қамариддин Ҳасанов. Шояд ин ном барои бисёриҳо ноошно бошад. Зеро ҳамагон ӯро бо ном, ё худ лақаби “Камил-карате” мешиносанд ва дар шабакаҳои иҷтимоӣ аз ҳунару маҳорати баланди касбии ӯ огоҳ ҳастанд.

Қамариддин Ҳасанов 26 апрели соли 1988 дар шаҳри Панҷакент таваллуд шудааст.

Ӯ варзишгар аз намуди варзиши каратэ ва муҳорибаҳои омехта мебошад, ки баробари шаҳрванди Тоҷикистон будан, инчунин шаҳрвандии Русияро низ дорад, ки дар баъзе аз мусобиқаҳо ин кишварро низ муаррифӣ мекунад. Инчунин дорандаи унвони мураббии сатҳи байналмилалӣ аз риштаи каратэ аст.

МАЙЛ БА ВАРЗИШ

Қамариддин шуруъ аз замони наврасӣ ба варзиш майл пайдо кард. Мавсуф аз 6-солагӣ ба варзиш машғул шуд. Дар 15-солагӣ ба Русия сафар карда, дар он ҷо иқомат ихтиёр кард. Пас аз рафтан ба Русия дар ҳамон ҷо таҳсил карда, ҳамчунин ба Донишгоҳи давлатии тарбияи ҷисмонии Русия дохил шуда, онро соли 2018 хатм намуд. Пас аз сафар ба Русия низ ба тамрин машғул буд.

Қамариддин шуруъ аз соли 2010 дар мусобиқаҳои касбӣ баромад менамояд. Ин варзишгар дар самти варзиши каратэ ба дастовардҳои назаррас ноил гаштааст. Номбурда дорандаи унвони чемпиони Тоҷикистон оид ба каратэ WKF, чемпиони чандинкаратаи шаҳри Москва оид ба каратэ WKF, дорандаи мукофоти чемпионати Аврупо оид ба каратэ ВАСК, иштирокчии Чемпионати ҷаҳон оид ба каратэ WKF (Мадрид-2018), дорандаи медали нуқраи чемпионати ҷаҳон оид ба карате соли 2012 дар Рими Италия, барандаи медали нуқраи Ҷоми каратэи Русия WKF дар соли 2012, дорандаи медали нуқраи Чемпионати Русия оид ба каратэ дар ҳама намудҳо дар соли 2015, ғолиби медали тиллои мусобиқаи умумирусиягии каратэ WKF соли 2018 Наро-Фоминск, дорандаи нишони заррини мусобиқаи умумирусиягии каратэ WKF дар соли 2018 дар шаҳри Одинсовои Русия, ҷойи якум дар мусобиқаи умумирусиягии каратэ WKF соли 2018 дар шаҳри Мос-ква, ғолиби мусобиқаи умумирусиягии каратэ WKF дар соли 2018 шаҳри Москва, барандаи ҷойи 1-уми Ҷоми ҷаҳонии карате WSF 2017 дар Москва, ғолиби Чемпионати Русия оид ба косики каратэ дар соли 2015 Москва, гирандаи мақоми 1-уми мусобиқаи байналмилалӣ дар солҳои 2016, 2018 ва 2020 дар Беларус мебошад.

Дар баробари ин, Қамариддин ҳамчунин дар варзиши каратэ ба гирифтани унвонҳои 3-Дан камарбанди сиёҳ дар каратэ-до Шотокан, Устоди варзиши Тоҷикистон дар ҳама намудҳои каратэ, Устоди варзиши Тоҷикистон оид ба каратэ WKF, Устоди варзиши Русия оид ба каратэ WKF мебошад.

МУҲОРИБАҲОИ ОМЕХТА

Бо вуҷуди ба даст овардани ин ҳама ҷоизаву унвонҳо ва қаҳрамониҳо дар мусобиқоти дохили ҷумҳурӣ ва байналмилалӣ шинохташавии бештари Қамариддин ба муҳорибаҳои омехтаи ӯ асос меёбад. Ӯро дар шабакаҳои иҷтимоӣ ҳамагон бо муҳорибаҳои омехтааш мешиносанд. Қамариддин шуруъ аз соли 2022 ба муҳорибаҳои омехта майл пайдо карда, дар чунин мусобиқот ба майдон баромад ва хеле зуд машҳуру шинохта гашт. Пеш аз ин соли 2021 дар ТОП-ММА дар якчанд лигаҳо ба монанди НАШЕ ДЕЛО, HYPE FIGHTING, ARENA, HARDCORE MMA ҳунарнамоӣ карда, шаш муҳориба гузаронидааст. Дар шаш муҳориба ягон бохт надошта, ҳамаи сабқатҳоро бо пирӯзӣ ба анҷом расонидааст. Дар ММА бошад, ҳудуди се сабқат гузаронида, ба ду ғолибият ва як бохт мушарраф гардидааст. Ҳасанов пас аз дебюташ дар Наше Дело (лигаи варзишӣ) ва пас аз дебюташ дар Karate Combat 2021 дар ИМА шуҳрат пайдо кард ва дар он ҷо 2 набард баргузор намуд.

ВАРЗИШГАР - САРОЯНДА

Чуноне дар боло аз мақоли “Ба як мард чил ҳунар кам аст” ёдовар шудем, Қамариддин дар баробари варзишгар аз намуди каратэ ва муборизи муҳорибаҳои омехта будан, ҳамчунин сароянда низ ҳаст. Ӯ ҳамчунин соли 2022 сурудеро бо номи “KARATE Патсан”-ро дар якҷоягӣ бо DAS FB сароидааст, ки дар соли мазкур машҳур шуда буд. Дар ин суруд низ мисли ҳамеша аз ҷумлаи машҳур, ки ҳамеша дар вақти сабқатҳояш ба забон меоварад, ҷумлаи “Тоҷикистон ба пеш”- низ ҷой дорад. Ҳамчунин, дар яке аз суҳбатҳои худ аз сароидани суруди дуюми худ ёдовар шудааст.

Ӯ бо ҳунарнамоии худ ҳамеша кӯшиш менамояд, дар ҳама ҷо номи Тоҷикистонро баланд бардораду арзанда муаррифӣ созад.

Ҳошим РАҲМАТУЛЛОЕВ, “ҶТ”