ВАРЗИШ
Шанбе 20 Июл 2024 03:14
10452
Ҳимоятгари марказӣ Карлес Пуйол на танҳо як футболбози дараҷаи олист, балки рамзи даврони тиллоии “Барселона” ва тими мунтахаби Испания маҳсуб меёбад. Ӯ футболбози афсонавӣ, беҳтарин ҳимоятгари ҷаҳон ва намоди садоқатмандӣ ба бошгоҳу тими миллӣ байни футболбозон ҳасту мемонад.

АЗ ХАТТИ ДАРВОЗА ТО ҲИМОЯТГАРИ БУЗУРГИ ДАСТА

Карлес Пуйол Сафоркада 13 апрели соли 1978 дар шаҳри Побла де Сегури Испания таваллуд шудааст, ки андаке бештар аз 3 ҳазор нафар аҳолӣ дошт. Дар ин шаҳраки хурд дастаҳои хурди футбол мавҷуд буд, ки каталонӣ дар онҳо маҳорати хешро сайқал медод. Дар оғози корномаи футболбозӣ Карлес ҳамчун дарвозабон амал мекард. Аввалин мураббии футболбоз ақида дошт, ки агар Карлес дар мавқеи дарвозабон боқӣ монад, ӯро ояндаи бузурге интизор аст, аммо ин писарбачаи ҷингиламӯй ҳавову ҳаваси бозӣ дар майдонро дошт.

ЭЪТИРОФИ ШЕВЧЕНКО

Соли 1997 Пуйол барои нахустин бор ба тими абардастае бо номи “Барселона” пайваст. Капитани оянда умед дошт, ки ӯро муқобили дастаи “Динамо” -и Киев ба майдон мебароранд, аммо бар хилофи нақшаи Пуйол то охири рақобат дар курсии эҳтиётӣ қарор гирифт ва натавонист ба дастаи зодгоҳаш кӯмак намояд. Тасаввур кардан душвор буд, аммо чемпиони Испания наметавонист муқобили дастпарварони Валерий Лобановский рақобати арзанда нишон диҳад. Машинаи Украина бераҳмона дарвозаи “Барса”-ро голборон мекард ва ниҳояти кор бонуфузтарин бошгоҳи Испания бо ҳисоби бузурги 4:0 мағлуб гардид. Пуйоли нуздаҳсола бо таассуф аз курсии эҳтиётӣ мушоҳида мекард, ки чи гуна Андрей Шевченкои дар он даврон шуҳратёр бо хетрики анҷомдодааш “Барса”-ро торумор мекунад. Ин шикаст барои каталониҳо дарси ибрат шуд, махсусан барои Пуйоли ҷавон. Меандешид, ки танҳо вай матавонад садди роҳи Шевченко гардад. Дар оянда “Динамо” ва “Барса” борҳо муқобили ҳам қарор гирифтанд, аммо аксар маврид бозӣ ба нафъи “Барселона” хатм меёфт, зеро дар хатти муҳофиза Пуйоли оҳанин қарор дошт. Соли 2006 билохира Шевченко дар бозии “Милан” ва “Барселона” иқрор шуд, ки то он замоне Пуйол дар хатти ҳимоя ҳаст, ғалаба муқобили “Барса” бисёр сангин хоҳад буд.

САДДИ ОҲАНИН

Ба замми талошу такопуҳои зиёд Пуйол дар оғози корномаи варзишӣ муддати тулонӣ ба даста мутобиқ шуда наметавонист. Ҳайати мураббиён ӯро дар ҳар мавқеи майдон ҷой медоданд, аммо боз ҳам наметавонист ҳарчи дар бисоташ ҳаст, нишон диҳад. Аммо мураббии онвақтаи каталониҳо Луи ван Гал боз ба Пуйол умед дошт ва хулоса намуд, ки агар дар хатти муҳофиза ба ӯ имкон диҳанд, кораш беҳтар хоҳад шуд. Ҳамин тавр, тибқи нақшаи ван Гал Пуйол, Майкл Рейзигер ва Серги дар хатти дифои “Барса” қарор гирифтанд, ки дар оянда хатти ҳимояи ин бошгоҳ ба садди шикастнопазир мубаддал гардид.

Пас аз муддате, бинобар осеби Серги, Карлес ба бозингари калидии хатти дифоъ мубаддал гардид, ки ин унвони нонавиштаи хешро то охирин лаҳзаҳои майдондорӣ нигоҳ дошт.

МЕРОСДОРИ ҲАҚИҚИИ “БАРСЕЛОНА”

Карлес Пуйол яке аз бозингаронест, ки дар оғози асри кунунӣ ба “Барселона” ҷони тоза дод ва ин бошгоҳро аз хокистари кайҳо сӯхта дубора эҳё кард.

Ба Пуйол мухлисону ҳаводоронаш чандин лақабҳо додаанд, ки машҳуртарини онҳо “Тарзан” ва “Лионҳарт” мебошанд. Хави Эрнандес дар бораи Карлес мегӯяд: “Вай ҳамчун шер ҷасур аст ва ҳеҷ гоҳ аз ҳариф сари тарс надорад”. Баъзе ақидаҳое мавҷуданд, ки Пуйолро ба хотири ному насабаш ҳатто дар нокомтарин корнома аз ҳайат наронданд ва ҳатто баъзе аз рӯзноманигорон овозаҳое паҳн карда буданд, ки ин бачаи мӯйдароз авлоди яке аз асосгузорони клуби каталонӣ аст. Ин ақида ҳам беасос набуд, зеро нафаре, ки соли 1899 дар пайдоиши “Барселона” нақши асосӣ дошт, Карлес Пуйол ном дошт, аммо Пуйол дар як гузориши худ қайд карда буд, ки Пуйоли муосир бо Пуйоли асосгузори клуб ҳеҷ робитае надорад, танҳо номашон шабеҳу ҳаммаъно аст.

ЗАРБАИ САХТИ РАВОНӢ АЗ МУРАББӢ

Карлес Пуйол оҳиста-оҳиста ба ҳайати асосии “Барселона” ҳамроҳ шуд ва дигар касе туҳмат намезад, ки ӯро аз рӯи номаш дар даста нигоҳ медоранд. Аммо сарфи назар аз ҳама муваффақиятҳояш, Пуйол бозингари каммуздтарини бошгоҳ маҳсуб меёфт ва ҳатто барои ҷароҳатҳои бардоштааш маблағи кифояи табобат надошт. Ӯ боре аз зонуяш ҷароҳати вазнин бардошта, се моҳ бистарии беморхона гардид ва барои барқарор кардани ҷароҳат маблағи зиёд лозим буд, аммо бошгоҳ беаҳамиятӣ намуда, ӯро ба ҳоли хеш мегузошт. Пас аз шифо ёфтанаш зарбаи сахттари равонӣ аз мураббии онвақтаи “Барса” Лоренсо Серра гирифт. Ӯ ҳимоятгарро ғайриқобили бозӣ эълон карда буд.

Пас аз изҳороти муғризонаи сармураббӣ Пуйол ба фурӯш гузошта шуд. Ягона клубе, ки тасмим гирифт ҳимоятгари ҷавонро харад, рақиби абадии “Барселона”, дастаи “Реал Мадрид” буд, аммо Пуйол ҷавоби рад дод ва изҳор намуд, ки "хатми корномаи хешро афзал медонад аз гузаштан ба бошгоҳи шоҳигарӣ". Дар натиҷа, Пуйол фурӯхта нашуд ва ҳатто музди меҳнати ӯро баланд бардоштанд, зеро ӯ ба зимомдорони бошгоҳ муроҷиат карда буд, ки: "Ё бештар пардохт кун, ё маро фаромӯш". Бояд гуфт, ки нуқтаи охиринро дар болои ҳарфи "ё" сармураббии вақти тими миллии Испания Хосе Антонио Камачо гузошт. Камачо на танҳо бо миёнравиаш музди ҳимоятгарро боло бурд, балки ӯро ба ҳайати тими мунтахаб даъват кард. Пас аз он, маоши каталонӣ дар Барселона ба таври назаррас афзоиш ёфт. Ва чанде пас аз ҷанҷол бо Пуйол, Феррер тарки даста намуда, Ван Гал дигарбора ба курсии мураббигӣ нишаст.

Ҳолланди Карлесро ҳамеша қадр мекард ва пас аз бозгашт ба Тарзан кӯмаки зиёд расонд. Ниҳоят ӯ дар майдон мавқеи асосиро пайдо кард. Он замон “Барса” дар хатти ҳимояи марказӣ мушкил дошт. Ҳеҷ кадоме аз футболбозон бо мушкилоти дар марказбуда расидагӣ карда наметавонист ва дар яке аз бозиҳо Ҳолланди Пуйолро дар марказ гузошт. Бо вуҷуди қади 178-сантиметра, ки барои муҳофизон хос набуд, Карлес дар байни ҳамаи ҳимоятгарони марказ натиҷаи беҳтарин нишон дод. Каталони бо суръат ва ҷаҳиш дар мубориза баҳри барҳам задани ҳамла, ҳам дар замин ва ҳам дар зарбаҳои ҳавоӣ ба осонӣ даст меёфт.

ЭҲЁГАРИ “БАРСЕЛОНА”

Дар таърихи асри 21-и “Барса” Пуйолро эҳёкунандаи ин бошгоҳ меноманд, зеро маҳз пас аз падид омадани ӯ дар ҳайати бошгоҳ “Барса” нисбат ба дигар дастаҳои испанӣ, ҳатто аз рақиби оштинопазираш “Реал” кам мағлуб мешуд.

Соли 2003 дар клуб интихоботи капитан баргузор гардид ва аксарият ба ҷониби Карлес Пуйол овоз доданд ва ӯ аввалин каталонӣ дар ин маснад мебошад, ки муддати тӯлонӣ бозувонаи капитаниро дар худ нигоҳ доштааст. “Барселона” аввалин ва ягона клуби Пуйол мебошад, ки ӯ то охири корномаи хеш ба даста содиқ монд ва ҳатто ба сараш андешаи ба дигар даста гузаштан, боре ҳам чарх намезад.

Пуйолро гӯё модар барои хатти муҳофиза тавлид карда бошад, ки замони фаъолияташ аз нисф зиёди хатти ҳимояро тани танҳо назорат мекард.

Пуйол ҳамроҳ бо “Барса” корҳои бузурге дар олами футбол анҷом доданд, ки ҳаргиз аз хотираи таърих зудуда нахоҳад шуд. Ӯ дар ҳайати бошгоҳи каталонӣ кулли ҷоизаҳои бонуфузи футболро ба даст овард, аммо моҳи майи соли 2014 капитани дастаи “Барселона” расман эълон кард, ки дигар бо футбол хайрухуш мекунад. Пас аз он, каталонӣ ёвари директори варзишии даста интихоб шуд. Бояд гуфт, ки Пуйол тули фаъолияташ дар “Барса” 589 бозӣ карда, танҳо 19 гол задааст. Аммо аксари ҳамлаҳои “Барселона”-ро Пуйол оғоз мекард.

КОРНОМА ДАР ТИМИ МУНТАХАБ

Пуйолро шуруъ аз соли 2000 ба ҳайати тими мунтахаби Испания даъват намуданд ва ӯ муддати 13 сол хатти ҳимояи тими миллиро посбону нигаҳбон буд. Варзишгар бо ҳайати тими мунтахаби хеш ҳам чемпиони Аврупо дар соли 2008 ва ҳам чемпиони ҷаҳон дар соли 2010 гардид, ки беҳтарин натиҷаи корномаи варзишиаш маҳсуб меёбад.

ҲАЁТИ ШАХСӢ

Футболбоз ҳаёти шахсии худро пинҳон медорад. Карлес аз суҳбат дар ин мавзуъ худдорӣ мекунад ва шарҳ медиҳад, ки ҳаёти шахсӣ фазои пӯшида бояд бошад. Дӯстдухтари аввалини Пуйол Марина тасодуфан дар маркази савдо, ки бо футболбоз гаштугузор мекард, ба дурбини рӯзноманигорон афтодааст. Тамоми ВАО ҳадс мезад, ки дар оянда Марина ҳамсари Карлес хоҳад шуд.

Бо вуҷуди рад кардани Марина ва Пуйол, боз ҳам ба онҳо бовар намекарданд ва каталонӣ маҷбур шуд, ки ҳамсари худ Агнесро ба таври расмӣ муаррифӣ намояд.

Соли 2008 Пуйол ва Агнес пас аз зиндагии 10-сола аз ҳам ҷудо шуданд, сабаби ҷудоӣ маълум набуд. Пас аз ҷудо шудан аз Агнес футболбоз бо модели испанӣ Малена Коста робита барқарор мекунад, аммо соли 2011 бо иллати таассубҳои оилавӣ Малена ҳам роҳи худро дигар мекунад.

Соли 2012 ӯ бо модели дигари кишвараш Ванесса Лоренсо робита барқарор мекунад ва соли 2014 нахустфарзанди онҳо Мануэла Пуйол ва соли 2016 Мария Пуйол ба дунё омаданд.

Бояд гуфт, ки муносибати ин ҷуфт расман сабт нашудааст, аммо баъзеҳо Ванессаро зани футболбоз меноманд.

Соли 2017 ба Карлес вазифаи директори варзишии клуби каталонии “Барселона”-ро пешниҳод карданд, аммо испанӣ рад кард.

Моҳи июни соли 2018 Карлес Пуйол ва Андрес Инеста барномаи нави “Olyseum”-ро муаррифӣ карданд, ки барои футболбозони ҷавон маслиҳату машварат медиҳад.

ХУЛОСА

Карлес Пуйолро аз замони ба олами футбол омаданаш ҳамчун капитани хуб ва инсони хоксору самимӣ мешинохтанд ва маҳз ин хислатҳо ӯро ҳам байни ҳамдастагон ва ҳам байни мухлисони футбол азизу муҳтарам гардонидааст.

Яҳё МАҲМАДНАБИЕВ, “ҶТ”

Эзоҳи худро нависед



Рамзҳо дар расм