Дар нимсолаи аввали соли равон варзишгарони вилояти Хатлон дар мусобиқаҳои ҷумҳуриявию байналмилалӣ ширкат варзида, 361 медали тилло, 391 медали нуқра, 475 медали биринҷӣ, дар умум 1227 медал ба даст оварданд, ки нисбат ба ҳамин давраи соли гузашта 48 адад зиёд мебошад.

Ин нукта 1 август аз ҷониби Рамазон Насриддинзода, сардори Раёсати кор бо ҷавонон ва варзиши вилояти Хатлон зимни нишасти хабарӣ садо дод.

Ҳамзамон, ӯ зикр кард, ки мусобиқаҳои варзишӣ байни кормандони ташкилоту муассисаҳо аз рӯи намуди футбол, шашка ва шоҳмот бо шумораи 1443 чорабинӣ баргузор гардида, ба онҳо 18114 нафар ҷалб гардид.

Маврид ба ёдоварист, ки варзишгарони вилоят дар беш аз 90 чемпионат ва мусобиқаҳои ҷумҳуриявӣ ширкат варзида, сазовори 334 медали тилло, 363 медали нуқра ва 440 медали биринҷӣ гардиданд. Инчунин, варзишгарони вилоят дар 17 мусобиқаи байналмилалӣ ширкат варзида, 27 медали тилло, 28 медали нуқра ва 35 медали биринҷӣ ба даст оварданд.

Гуфта шуд, ки дар ҳудуди вилоят 6 Муассисаи давлатии мактаби варзишии вилоятӣ, 2 адад дар шаҳри Бохтар ва 4 адад дар шаҳри Кӯлоб ва 29 мактабҳои варзишӣ дар шаҳру ноҳияҳои вилоят, дар маҷмуъ 35 муассисаи варзишӣ фаъолият менамоянд.

- Дар муассисаҳои мазкур аз рӯи 35 намуди варзиш 17211 нафар варзишгар, аз ҷумла 2483 нафар бонувон дар 1339 гурӯҳи машқӣ ҳамарӯза ба машғулиятҳои варзишӣ фаро гирифта шудаанд, - илова намуд Р. Насриддинзода.