20 июл дар ноҳияи Ёвон дар мавзӯи “Механизмҳои ҷалби сектори хусусӣ дар рушди соҳаи варзиш”, бо иштироки муовинони соҳаи иҷтимоӣ ва мудирони бахшҳои кор бо ҷавонон ва варзиши ҳукуматҳои шаҳру ноҳияҳои вилояти Хатлон семинари вилоятӣ баргузор гардид.

Мақсад аз баргузории семинари мазкур ҷалби секторҳои хусусӣ дар рушди соҳаи варзиши вилоят, ба истифода додани маҷмааҳо, майдонҳо, толорҳо ва инфросохтори варзишӣ дар қаламрави вилоят бо ҷалби соҳибкорони маҳаллӣ ва ба ин васила ҷалб намудани наврасону ҷавонон ба варзиш, тарзи ҳаёти солим ва оммавигардонии варзиш маънидод гардид.

Дар рафти семинар муовини раиси вилоят Махфират Хидирзода, раиси ниҳояи Ёвон Амирбеки Темур ва иштирокчиён аз маҷмааи варзишии “Ваҳдат”, ҳавзи пушидаи “Форам”, майдончаи хурди футбол, толорҳои варзишии деҳаҳои Дастгирак, Даҳана ва толорҳои варзишии назди муассисаи таҳсилоти умумии №16, ки бо дастгирии соҳибкорони маҳаллӣ сохта ба истифода дода шудаанд, динан намуданд.

Махфират Хидирзода аз таваҷҷуҳи Асосгузори сулҳу ваҳдати миллӣ – Пешвои миллат, муҳтарам Эмомалӣ Раҳмон нисбат ба соҳаи варзиш ва рушди он дар ҷумҳурӣ дар мисоли ба истифода додани чунин толору майдонҳо ёдовар шуда қайд намуд, ки варзиш натанҳо ба тарзи ҳаёти солим даъват мекунад, балки ҷавононро дар руҳияи хештаншиносӣ, ватандӯстӣ ва худогоҳӣ тарбия менамояд.