Мавзуна варзишгарест пур аз шуру шавқ. Пур аз меҳру муҳаббат. Пур аз ғуруру ҳисси баланди миллӣ. Ӯ бо матонат тавонист чандин маротиба Парчами кишварамонро дар арсаи байналмилалӣ парафшон намояд. Соли 2012 дар олимпиадаи Лондон бо пираҳани чакан муаррифгари миллат буд. Бояд гуфт, ки Мавзуна ягона бонуи муштзани тоҷике буд, ки аз ин намуди варзиш медали олимпиро ба даст овард.

Мавзуна соҳиби оилаи обод ва фарзандони дӯстрӯяк мебошад. Дар арафаи Рӯзи модар бо ӯ атрофи зиндагию фаъолияташ суҳбате оростем, ки фишурдаи онро пешкаши хонанда мегардонем.

- Нахуст шуморо бо фарорасии иди модарон табрик менамоям...

- Ташаккури зиёд. Ба шумо низ иди бонувон муборак бошад!

- Оё зиндашавии табиат ба як варзишгар илҳоми тоза мебахшад ва баҳори шумо аз чӣ оғоз мешавад?

- Албатта, фасли баҳор - зиндашавии табиат натанҳо ба варзишгар, балки ба тамоми мавҷудоти зинда илҳоми тоза мебахшад. Ман низ баҳорро ошиқона дӯст медорам. Ҳамасола омаданашро бесаброна интизорӣ мекашам. Бо омадани баҳор руҳу ҷони кас ҳаловати дигар мегирад. Субҳи баҳори ман бо қаҳ-қаҳи мурғони хушхон ва садои форами фарзандонам оғоз меёбад.

- Ба истиснои чорабиниҳое расмие, ки даъват мешавед, боре шудааст, ки худро аз варзиш дур гирифта, ҳамроҳ бо бонувон идҳои баҳориро ҷашн гирифта бошед?

- Бале, ман натанҳо дар чорабиниҳои расмӣ иштирок мекунам, балки берун аз он низ дар чорабиниҳо, дар ҷашну сурҳо, туйю маъракаҳо бо ҳамроҳии ёру дӯстонам иштирок мекунам. Махсусан дар идҳои баҳорӣ. Дар иди Наврӯз ба деҳа рафта, бо мардуми деҳ ин иди миллиро ҷашн мегирам. Дар миёни ҷомеа буданро дӯст медорам. Дар байни мардум гаштану бо мардум будан бароям неру мебахшад.

- Дар рӯзи иди бонувон аз ҳамсаратон чӣ туҳфа интизоред?

- Барои ман саломатии ҳамсарам болотар аз ҳадя аст. Ҳеҷ ҷизро интизор нестам. Фақат ҳамсару фарзандонам саломат бошанд, кофист. Чизи дигаре намехоҳам.

- Аз зарбаи муштҳоят берун аз майдони мусобиқа касе “лаззат” бурдааст?

- Дар майдони муҳориба бисёриҳо аз зарбаи муштҳоям “лаззат” бурдаанд. Аммо берун аз майдон бо касе ҷанг накардаам. Ростӣ, кам вақти ба кӯча баромадану сайру гаштро дорам.

- Боре аз ороишҳои занона (касметика) истифода бурдаед?

- Бале, ман зан ҳастам ва аз ороишот истифода мекунам. Аммо хело кам. Фақат дар ягон чорабиниҳои муҳим. Боқӣ дар дигар рӯзҳо намехоҳам, чун ҳусни худам табиатан зебост.

- Шуморо ҳамеша бо либоси мардона мебинем. Шумо дар умум кадом вақтҳо либосҳои занонаи миллиро ба бар мекунед?

- Дуруст мегӯед, бисёр вақт ман бо либоси мардона мегардам. Чун мардум маро бо ҳамин либоси мардона қабул кардаанду ба қавле бо ҳамин имиҷ шинохтаанд. Ба ҳамин хотир ман зиёд либосҳои мардона ба бар мекунам. Шавқи пӯшидани либосҳои миллиро низ дорам. Дар хона, дар туйю маъракаҳои оилавӣ либоси миллии тоҷикона ба бар мекунам. Аммо дар миёни мардум не.

- Дар бораи ҳаёти оилавиатон қисса мекардед. Мехоҳед, ки фарзандатон ҳам варзишгар шавад, махсусан духтаратон?

- Шукри Худованди бузург оилаам солим асту ду фарзанд дорам. Як писару як духтар. Ҳар гоҳе ки аз кор монда шуда, ба хона меравам, фарзандонам ба пешвозам мебароянду оғӯшашонро ба рӯям боз мекунанд. Дастакони кӯчакашонро ба гарданам овезон мекунанду аз хушҳолӣ бол мекушоянд. Ҳамин аст ҳаёти оилавии ман. Ҳамин аст хушбахтии ман.
Дар мавриди фарзандонам, ки варзишгар шаванд ё нашаванд, ҳеҷ чиз гуфта наметавонам. Ин интихоби онҳост. Агар ки варзишгар шудан хостанд, ман ҳеҷ монеае эҷод намекунам. Бигзор шаванд. Ба варзишгар шудани духтарам низ зид нестам. Намуди боксро интихоб мекунад ё чизи дигарро ин кори ӯст. Ҳар касберо, ки дӯст медорад, бигзор ҳамонро интихоб кунад.

- Чӣ хотирот доред аз лаҳзаҳои кӯдакиятон?

- Аз лаҳзаҳои кӯдакиям хотироти зиёд дорам. Вақте ки хурд будам, бисёр духтари чусту чолок будам. Ҳама дӯстам медоштанд. Устодону ҳамсоягонам дӯстдориям мекарданд.

- Мавзуна ба ғайр аз варзиш боз чӣ ҳунар дорад?

- Ростӣ, ба ғайр аз варзиш ягон ҳунари иловагӣ надорам. Рубучини хона, либосшӯи ва боз ягон хӯрок тайёр карда метавонаму тамом. Ин хел ҳунарҳои пухту паз, дӯзандагӣ ва умуман ҳунарҳое, ки хоси занҳо бошад, қариб ки надорам.

- Аз минбари рӯзномаи “Ҷавонони Тоҷикистон” ба бонувони кишвар чӣ таманниёт доред?

- Аввалан сипоси худро ба рӯзномаи дӯстдоштании “Ҷавонони Тоҷикистон” барои даъват мерасонам. Ва ба тамоми бонувони кишвар Иди модаронро муборакбод мегӯям. Хоҳони онам, ки ҳаёти пур аз шодиву нишот дошта бошанд. Ишқи бузург дошта бошанд. Бигзор чашмонашон ҳамеша аз хушҳолӣ бидурахшад ва лабханд аз лабонашон дур нагардад. Ид муборак, модарону бонувони азиз!