28-30 январ дар шаҳри Алмадаи Португал мусобиқаи ҷудои “Grand Prix Portugal 2022” бо иштироки 301 варзишгар (179 мард, 122 зан) аз 41 давлат доир гардид.

Дар ин мусобиқа паҳлавони шинохтаи кишвар Комроншоҳ Устопириён сазовори медали биринҷӣ шуд.

Комроншоҳ дар ин мусобиқаи байналмилалӣ (-90кг) дар даври аввал озод буд. Ӯ сипас бар намояндаи Ӯзбекистон Достон Мейлиев ва дар чорякфинал бар варзишгари Украина Артем Бубир пирӯз шуд, вале дар нимфинал аз варзишгари Италия Кристиан Парлатӣ мағлуб гашт.

Ӯ сипас дар муҳориба барои ҷои сеюм намояндаи Гурҷистон Имеда Гоголадзеро шикаст дод.

Ғолибону ҷоизадорони ин мусобиқа дар баробари медал бо ҷоизапулӣ қадрдонӣ шуданд – ҷои аввал – 3000 евро, ҷои дуюм – 2000 евро, ду ҷои сеюм – 1000-евроӣ.