24 август дар Чемпионати ҷаҳон оид ба гӯштини ҷудо байни наврасон варзишгари навраси тоҷик Ёсин Бобокалонов сазовори медали биринҷӣ гардид.

Ёсин Бобокалонов дар даври аввал озод буд ва дар даврҳои баъдӣ бо мағлуб намудани Лай Мин-Янг аз Тайпеи Чин, Бруно Нобрега аз Бразилия, Данюло Кравченко аз Украина ба даври нимниҳоӣ роҳ ёфт ва аз Ижак Ашпизи исроилӣ мағлуб шуд. Ӯ барои медали биринҷӣ бо Тудор Мосой аз Руминия гӯштин гирифт ва бо як имтиёзи вазарӣ ғалаба ба даст овард.

Тоҷикистонро дар ин рӯзи мусобиқа дар баробари Ёсин Бобокалонов (-60 кг), ҳамчунин, Мадина Қурбонзода (-48 кг), Муҳаммадин Лоиқов (-66 кг) ва Ворис Назаров (-66 кг) муаррифӣ карданд. Аз миёни онҳо танҳо Ёсин Бобокалонов аз худ ҳунару маҳорати воло нишон дода, бо мағлуб кардани ҳарифон ба гирифтани нишони биринҷӣ мушарраф гардид, ки ин аввалин нишони биринҷии ҷудокорони тоҷик дар мусобиқа мазкур маҳсуб мешавад.

Тоҷикистонро дар ин мусобиқаи ҷаҳонӣ Мадина Қурбонзода (-48 кг), Лоиқ Қутбудинов (-55 кг), Икром Шамсов (-55 кг), Ёсин Бобокалонов (-60 кг), Ворис Назаров (-66 кг), Муҳаммадамин Лоиқов (-66 кг) ва Аминҷон Абдуҷалилзода (-73 кг) муаррифӣ мекунанд.

Аз миёни онҳо танҳо Аминҷон Абдуҷалилзода (-73 кг) мондааст, ки имрӯз - 25 август баромад мекунад.

Мусобиқа аз 23-юм то 26-уми август дар шаҳри Загреби Хорватия баргузор мегардад. Қаҳрамонии ҷудои ҷаҳон байни наврасон 2023 дар доираи мусобиқоти сайри ҷаҳонии ҷудо баргузор мешавад. Ғолибону ҷоизадорони чемпионат бо ҷоизапулии арзишманд қадрдонӣ мешаванд.

Ҳамчунин, варзишгарон барои беҳтар кардани мавқеашон дар радабандии ҷаҳонӣ ва олимпӣ имтиёз ба даст меоранд.

Яҳё МАҲМАДНАБИЕВ, “ҶТ”