“Мероси падар хоҳӣ, касби падар омӯз”. Ин мақол миёни миллати тоҷик хеле маъмулу серистеъмол аст. Воқеан, инсоне, ки дар зиндагӣ аз пушти моли падар не, аз пушти касби падар меравад, дар ҳаёт хушбахт мешавад. Матлаби навбатии мо дар бораи нафаре қисса мекунад, ки дар оилаи онҳо аз мақоли мазкур дарс гирифтаанд ва онро дар зиндагӣ татбиқ менамоянд.

Қаҳрамони мо гӯштингири бомаҳорат Ҳақдод Гулов аст. Ӯ ба варзиши гӯштини ҷудо ва миллӣ машғул буда, идомадиҳандаи касби падар ва бобо дар ин ҷода мебошад. Касби ӯ аз бобо ба падар ва аз падар ба Ҳақдод мерос мондааст.

Ҳақдод 11-уми июли соли 1998 дар шаҳри Ҳисор таваллуд шудааст. Аз замони хурдӣ дар зодгоҳ ба тамрин оғоз кардааст. Нахустин устоди ӯ дар ҷодаи варзиш падараш буд. Падар ба ӯ аз нозукиҳои касби интихобнамудааш нақл мекарду ӯро дар роҳи варзиш пухтаву омода месохт. Чуноне худи Ҳақдод нақл мекунад, ба варзиш ҳанӯз аз панҷсолагӣ оғоз кардааст.

“Тамрин дар назди падар барои дар оянда дар риштаи интихобнамуда муваффақ шудан, бисёр нақши сазовор дошт. Зеро ман аз хурдӣ аз усул ва нозукиҳои ҷодаи худ огаҳӣ пайдо кардам”.

Гарчанде лавозимоти варзишӣ дар хона набуд ва аз рӯи имкон барои тамрин асбобҳои заруриро бо даст сохта буданд, вале дар ин баробар бо як шавқу завқи беандоза тамрин менамуд ва барои муваффақ шудан дар ҷода талош дошт.

- Ман то сенздаҳсолагӣ дар назди падар тамрин кардам. Чун падар ва бобоям варзишгар буданд, меҳри ин касб дар дилам низ пайдо шуд ва кӯшиш кардам дар ҷодаи интихобнамуда муваффақ гардам,-мегӯяд Ҳақдод.

Фатҳулло Гулов падари Ҳақдод низ мегӯяд, ки писараш аз замони хурдсолӣ тамрин намуд ва ба қавле дар ҷодаи пешгирифта то ҷое пухта гашт. Ҳадафи падар низ аз тамринҳои хонагӣ маҳз Ҳақдодро дар роҳи касбӣ омода намудан буд. Ҳақдод дар тамоми сабқатҳое, ки дар шаҳри Ҳисор баргузор мегашт, иштирок мекард. Ҳатто дар вақти мусобиқот бидуни ҳеҷ тарсу ваҳме бо ҳарифони бузургтар аз худ низ даст ба гиребон мешуд.

Бо амри тақдир ва толеи баланди Ҳақдод рӯзе Алишер Боқиев ба хонаи онҳо меҳмон мешавад. Дар ин вақт падари Ҳақдод дар назди Алишер аз писар ёдовар мешавад ва барои идома додани писар дар ҷодаи гӯштин аз ӯ маслиҳат мепурсад. Алишер Боқиев пас аз шиносоӣ бо Ҳақдод ва дидани малакаи ӯ дар гӯштин аз тамринҳояш қаноатманд шуда, Ҳақдодро барои идомаи роҳи гӯштин ба толори варзишии худ мебарад.

Пас аз ин, Ҳақдод аз муҳити варзишии хона ба толори муосири варзишӣ ворид мешавад. Дар рафти тамринҳо ӯ дар мусобиқоти гуногуни шаҳри Ҳисор иштирок менамояд. Дар сабқатҳои наврӯзӣ бошад, ба ғайр аз ҳамсолони худ бо калонсолон низ вориди майдон шуда, бо онҳо даст ба гиребон мешавад. Дар вақту фосилаи хеле кам шуҳрату нуфузи Ҳақдод берун аз муассисаи таълимиву толори варзишӣ гашта, шаҳри Ҳисорро, ки чи ҳатто Тоҷикистонро тасхир кард. Ҳамакнун ӯ дар вазни 60-66 кг ба дилхоҳ гӯштингири ин вазн рақиби сазовору арзанда аст. Ҳақдод то хатми мактаби миёна дар назди устоди худ Алишер Боқиев тамрин карда, пас аз хатми мактаб ба Донишкадаи тарбияи ҷисмонии Тоҷикистон ба номи С.Раҳимов дохил мешавад. Пас аз дохил шудан ба донишкада дар назди Садриддин Обидов, мураббии шинохтаи кишвар ба тамрин мепардозад.

Дар чанд соли охир ҳунару маҳорати Ҳақдод воқеан бесобиқа рушд кард. Ӯ ҳатто дар сабқати гӯштини байналмилалӣ барои Ҷоми Президенти Ҷумҳурии Тоҷикистон иштирок карда, ба гирифтани нишони нуқра даст ёфт. Ин яке аз сабқатҳои хотирмон дар тули фаъолияти варзишии Ҳақдод ба ҳисоб мерафт. Ӯ дар сабқати мазкур ба муқобили Шаҳбоз Саидаброров, Сорбон Латифов ҳунарнамоӣ карда, ба онҳо пирӯз шуд. Дар финали сабқат бо як иштибоҳи худ аз рақибаш Баҳром Суфиев шикаст хурда, ба гирифтани мақоми дуюм даст ёфт.

Ҳақдод ба монанди дигар ҷавонмардони ватандӯст пас аз хатми донишкада ба хидмати ҳарбӣ раҳсипор гашт. Дар он муддат, ки дар қисми ҳарбии 5453-и Қӯшунҳои дохилии Вазорати корҳои дохилӣ адои хидмат мекард, ҳамчунин ба дӯстдорони гӯштини ҷудо ва миллӣ дар дохили толори варзишии қисми ҳарбӣ тамрин медод. Ин тамрин барои дар ҷода муваффақтар шудани ӯ манфиатовар буда, бо ин кор каме ҳам бошад, ба дигар ҳамхизматони худ нозукиҳои ин намуди варзишро ёд медод. Ҳақдод ҳамчунин дар мусобиқаи гӯштингирии Донишгоҳи техникии Тоҷикистон ба номи академик Муҳаммадҷон Осимӣ иштироки фаъолона намудааст, ки то ҳол дар ёди ҳаводорони ин ришта сабт гардидааст. Дар ин мусобиқа Ҳақдод бо дастури устодаш Садриддин Обидов ширкат меварзад. Давоми чанд дақиқае, ки паҳлавони ҷавон дар майдон буд, 6 нафарро дар вазни то 66кг мағлуб намуд. Иштирокчиёни мусобиқа аз маҳорати нотакрори Ҳақдод ангушти ҳайрат мегазиданду бо нидои “зинда бошӣ паҳлавон” ӯро таҳният мегуфтанд. Аз ин ҳунарнамоӣ бештар аз ҳама Садриддин Обидов изҳори хурсандӣ мекард.
Ҳақдод роҳи муваффақият дар ҷодаи варзишро дар сабр ва пуртоқатӣ маънидод мекунад.

“Падарам ба ман гуфта буд, ки ҷодаи варзиш мушкилгузар аст. Сабр кун, то муваффақ гардӣ. Ҳарчанд ҳолатҳое буд, ки бисёр ҷароҳат мебардоштам, аммо бо вуҷуди ин талош мекардам, то дар оянда дар Гран-при ва Гран-сламҳои берун аз ҷумҳурӣ иштирок намоям”.

Бояд гуфт, намоёнтарин дастоварди Ҳақдод дар соли равон мушарраф гардиданаш ба мақоми аввали мусобиқаи қаҳрамонии ҷудои Тоҷикистон миёни бузургсолон мебошад, ки дар таърихи 11-12-уми феврали соли 2023 дар Қасри теннис ва маҷмааи варзиши обии шаҳри Душанбе баргузор гардида буд.
Орзуи ягонаи ӯ дар масири интихобкардааш ҳамсони паҳлавонони номдори меҳан Саидмумин Раҳимову Расул Боқиев гаштану парчамбардори кишвари хеш гардидан аст.

Ҳошим РАҲМАТУЛЛОЕВ, “ҶТ”