Дар радифи дигар варзишҳо футбол яке аз маъмултарин навъи варзиши даставӣ дар ҷаҳон эътироф гардида, ба монанди техника ҳамеша барои ҳаводорони хеш навгонӣ меофарад. Дар Тоҷикистон низ ин намуди варзиш мавқеи устувор дошта, ҳаводорони зиёдеро ба худ ҷалб намудааст. Имрӯзҳо дастаҳои футболи Тоҷикистон бозиҳои худро дар дохилу хориҷи кишвар ба роҳ монда, барои тарғибу ташвиқи бештари футболи тоҷик дар арсаи байналмилалӣ талош меварзад. Дастаи мунтахаби U-19-и Тоҷикистон оид ба футбол яке аз дастаҳое ба шумор меравад, ки то имрӯз ба дастовардҳои назаррас ноил гардидааст. Оид ба вазъи имрӯзаи ин дастаи мунтахаб ва фаъолияташ бо сармураббии он Мубин Эргашов ҳамсуҳбат шудем.

- Айни ҳол дастаи мунтахаби U-19-и Тоҷикистон дар кадом ҳол қарор дорад?

- Дар ҳар ду сол Конфедератсияи футболи Осиё барои дастаҳои ҷавонони U-19 мусобиқа мегузаронад. Аввал бозиҳои интихобӣ баргузор мешаванд, сипас дастаҳои беҳтарин ба марҳилаи ниҳоӣ роҳ меёбанд ва чор дастаи беҳтарин аз даври ниҳоӣ ба чемпионати ҷаҳон мераванд. Ду маротибаи охир дастаи мо ба финал баромад. Ин беҳтарин дастовард дар ҷараёни ин мусобиқа мебошад. Дар айни замон, даста мусобиқаи интихобиро бомуваффақият паси сар карда, ба қисми ниҳоӣ ворид шуд. Қисми ниҳоӣ мебоист моҳи октябри соли равон дар шаҳри Тошканти Ӯзбекистон баргузор мешуд, аммо бо сабаби пандемияи коронавирус мусобиқа ба аввали соли оянда мавқуф гузошта шуд.

Дастаи мо аз бозигароне иборат аст, ки баъзеашон дар мусобиқаи охирин бозӣ кардаанд. Инчунин аз бозигароне, ки соли гузашта дар Чемпионати ҷаҳон барои наврасони 17-сола дар Бразилия бозӣ карданд ва бозигароне, ки худро дар Чемпионати Тоҷикистон оид ба футбол ва Ҷоми Тоҷикистон нишон додаанд. Бозигарони дастаи мунтахабро асосан дар ҳайати базавии “Локомотив Помир” ҷамъ меоранд. Дар ин ҷо бозигарони Истиқлол, Хуҷанд, Хатлон, Истравшан, ССКА ҳастанд, номзадҳо аз дастаҳои лигаи якум, инчунин якчанд бозигароне, ки берун аз кишвари мо бозӣ мекунанд. Мутаассифона, вазъи кунунии ҷаҳон ҳамаи нақшаҳои омодагии моро бекор кардааст. Айни ҳол санаи бозии ниҳоӣ маълум нест ва муайян ҳам нест, ки он дар куҷо баргузор мешавад.

-Чӣ нақшаҳо доред?

-Мо пеш аз соли нав се тамринро ба нақша гирифтаем. Онҳо дар дохили кишвари мо баргузор хоҳанд шуд, гарчанде ки шуъбаи байналмилалии ФФТ имкониятҳои баргузории бозиҳои байналмилалии дӯстонаро меҷӯяд. Боз ҳам мутаассифона, ин ҳама ба вазъи кунунии ҷаҳон рост меояд ва ман фикр мекунам, ки бо ин мушкилот иштирокчиёни қисми ниҳоии ҳар як мунтахаби миллӣ рӯ ба рӯ мешаванд. Ҷамъомади якуми таълимӣ пас аз бозиҳои тими миллӣ ба нимаи моҳи ноябр таъин шудааст. Зеро якчанд футболбозони мо дар ҳайати мунтахаб ҳастанд. Чуноне ки шумо медонед, дастаи мо бо Баҳрайн ва Аморати Муттаҳидаи Араб бозиҳои дӯстона анҷом медиҳад. Ҳоло дар омода кардани даста ба мусобиқаҳо дар ҷамъомади таълимиву тамринӣ ва дар баргузории бозиҳои дӯстонаи байналмилалии назоратӣ ба ғайр аз пандемия мушкилоти ҷиддӣ надорем.

- Ба андешаи Шумо ҳамчун мураббии варзида бештар кадом мушкилиҳо садди роҳи рушди футбол мегарданд?

- Мушкилии асосӣ дар ҷаҳони футбол ин гап сари таҷрибаи мукаммал надоштани бозигарону мураббиён меравад. Яъне мо ҳама шавқу рағбат ба бозии футбол дорем, лек таҷрибаи мукаммал надорем. Барои ин зарур аст, ҳар як бозигару мураббӣ пайваста тамрин намуда, таҷрибаомӯзии худро ҳам дар дохил ва ҳам дар хориҷ ба роҳ монад. Аксар мушкилиҳое, ки дар футболи мо мавҷуд буд, дар барномаҳои рушди футбол, ки аз ҷониби Ҳукумати кишвар тасдиқ мегардад, ворид гардидааст, аз ҷумла зиёд намудани майдончаву майдонҳои варзишӣ, ҷалби мураббиёни сертаҷриба, мавриди дастгирӣ қарор додани наврасону ҷавонони шавқманд ва ҷалб намудани хурдсолон ба ин намуди варзиш.

- Фаъолияти бозигарони даста дар кадом сатҳ аст?

- Мо бозигарони омодашударо ба даста шомил намуда, пайваста бо онҳо тамринҳои амаливу назариявӣ мегузаронем. Моҳи августи соли равон мо бо тими миллии Ӯзбекистон ду бозии дӯстона гузаронидем, ки дар ин бозӣ якеро бурдем ва якеро бохтем. Ин бозиҳо камбудиҳои моро ба мо нишон доданд. Ҳам дар ҳимоя ва ҳам дар ҳуҷум асос камбудиҳои тактикӣ буданд.

Иштирок дар чунин бозиҳо фикр мекунам, таҷриба ва алоқаи бозигаронро байни ҳам мустаҳкам мекунад. Бартарии дигари бозии дӯстона дар он аст, ки мо имкон пайдо мекунем, то чеҳраҳои навро барои худ кашф намоем.

- Ба ҷуз аз оне, ки бозигаронро аз клубҳои варзишӣ мегиред, оё худи дастаи мунтахаб низ бозигаронро омода мекунад?

- Ба ҷуз бозигарони асосӣ ва иловагӣ инчунин мо мактаби махсуси омодасозиро низ дорем, ки бевосита наврасони шавқу рағбатдошта ва бомаҳоратро ҷалб намуда, онҳоро омода месозем. Пас аз омода шудан, ба ҳайати тим шомил менамоем. Имрӯз Ҳукумати Ҷумҳурии Тоҷикистон, бевосита ФФТ барои рушди футболи ҷавонон, барои ба воя расидани футболбозони баландихтисос тамоми шароитҳоро фароҳам меорад, то ин ки онҳо минбаъд низ ба монанди дастаи мунтахаб шарафи кишварамонро дар арсаи байналмилалӣ ҳимоя намоянд. Мо низ умед бар он дорем, ки ин ҷавонон ояндасози футболи кишвар гардида, футболи тоҷик ба монанди дигар кишварҳо дар Ҷоми ҷаҳон оид ба футбол роҳ ёфтаву вирди забони хосу ом қарор мегирад ва Суруди миллиамон дар минбарҳои баланд садо медиҳаду Парчами меҳан парафшон мегардад. Ва мо бо ифтихор ин ибораро вирди забон меорем –“Тоҷикистон ба пеш!!!”.

Исфандиёр АМАКҶОНОВ,
коромӯзи “ҶТ”