Дар ноҳияи Ашт бахшида ба эълон гардидани солҳои 2019-2021 “Солҳои рушди деҳот, сайёҳӣ ва ҳунарҳои марудӣ” мусобиқаи кушоди ноҳиявӣ оид ба футболи хурд миёни ҷавонони соли таваллудашон 1985-2003 барои дарёфти “Ҷоми раиси ноҳияи Ашт” доир гардид.

Ба иттилои Ҷамшед Насриддинов, мудири Бахши кор ҷавонон ва варзиши ноҳия, мақсад аз баргузории мусобиқа ташвиқу тарғиби футболи хурд байни ҷавонон, баланд бардоштани маҳорати касбии варзишгарон, пешгири намудани зуҳуроти номатлуб байни ҷавонон ва оммавӣ гардонидани варзиш дар ноҳия мебошад.

Дар мусобиқа 20 даста байни ҳам бозиҳои дӯстона анҷом дода, дар натиҷа дастаи футболбозони соли таваллудашон 1991 ҷойи аввал, футболбозони соли таваллудашон 1994 ҷойи дуввум ва футболбозони соли таваллудашон 1985 ҷойи сеюмро ишғол намуданд.

Дар маросими ҷамъбастии мусобиқа Зариф Мирдадо, раиси ноҳияи Ашт иштирок намуда, ба ғолибон Ҷом, диплом, медал ва туҳфаҳои хотиравии мақомоти иҷроияи ҳокимияти давлатии ноҳияро тақдим намуд.