Имрӯз, 30 июн дар КВД “Маҷмааи варзишии Тоҷикстандарт” бо ташаббуси Вазорати меҳнат, муҳоҷират ва шуғли аҳолӣ ва шӯрои директорони соҳаи таҳсилоти ибтидоии касбии Ҷумҳурии Тоҷикистон, бахшида ба ҷашни 20 - солагии Ваҳдати миллӣ ва “Соли ҷавонон” чорабиниҳои варзишӣ байни муассисаҳои таҳсилоти ибтидоии касбӣ дар сатҳи ҷумҳурияӣ баргузор гардид.

Сараввал раиси шӯрои директорони соҳаи таҳсилоти ибтидоии касбии ҷумҳурӣ Зулайхо Зокирова тамоми иштирокдоштагонро бо “Соли- ҷавонон” ва 20 - солагии Ваҳдати миллӣ табрик намуда,иброз дошт: “Мақсад аз гузаронидани чунин чорабиниҳо бедор намудани ҳисси ватандӯстии ҷавонон, зиёд намудани шавқу ҳавас ба варзиш ва иҷрои барномаҳои давлатӣ оид ба рушди футбол мебошад”.

Дар даври ниҳоии чорабини мазкур аз намудҳои варзишии волейбол, футболи хурд, шашка, шоҳмот ва дастхобонӣ 5 даста аз Вилояти Суғд, 1 даста аз Вилояти Хатлон, 2 даста аз ноҳияҳои тобеъ ва 2 даста аз шаҳри Душанбе байни ҳам рақобат намуданд.

Аз рӯи намуди варзиши шашка ҷойи аввалро Аваз Нуров, донишҷӯи Литсейи касбии хизмат ва туризми шаҳри Душанбе, ишғол намуд.
Саъдулло Наимов, хонандаи Литсейи касбии техникии саноати кишоварзии шаҳри Кӯлоб сазовори ҷойи дуюм гардид ва зинаи сеюм насиби хонандаи Литсейи касбии техникии сохтумони шаҳри Хуҷанд, Иброҳимов Раҳматҷон дониста шуд.

Дар намуди шоҳмот Шуҳратҷон Раҳмонов, донишҷӯи Литсейи касбӣ техникии ноҳияи Ҷ.Расулов, мақоми аввалро ишғол намуд.
Тошпулотов А. хонандаи Литсейи касбии техникии ноҳияи Шаҳринав мақоми дуюмро ишғол намуд.

Аз намуди варзиши дастхобоӣ ҷойи аввал насиби Ризоев Афзалшоҳ хонандаи Литсейи касбии политехникии шаҳри Душанбе гардид.
Ҷойи дуюм насиби Убайдуллои Рустам хонандаи Литсейи касбии техникии саноатӣ кишоварзии шаҳри Кӯлоб ва ҷойи сеюмро хонандаи Литсейи касбӣ техникии шаҳри Истиқлол Насрулоев Шаҳзод касб намуд.

Ҷоизаи футболи хурдро дастаи Литсейи касбии техникии нафт ва гази шаҳри Исфара соҳиб шуд.

Дастаи Литсейи касбии металлургии шаҳри Турсунзода ҷойи дуюм ва мақоми сеюм насиби Литсейи касбии техникии саноатӣ кишоварзии шаҳри Кӯлоб гардид.

Шаҳбози АСОМИДДИН, “ҶТ”