Имрӯз, 6 октябр, дар Мактаби ҷумҳуриявии маҳорати олии варзишӣ оид ба намудҳои гӯштин -“Манеж”, 51 нафар ғолибону ҷоизадорони 5-умин Бозиҳои Осиё дар шаҳри Ашқободи Ҷумҳурии Туркманистон бо туҳфаҳои пулию молӣ қадрдонӣ шуданд.

Дар маросими ҷоизасупорӣ Аҳтам Абдуллозода, раиси Кумитаи кор бо ҷавонон ва варзиши назди Ҳукумати ҷумҳурӣ ва намояндагони соҳаи варзиши кишвар иштирок намуданд.

А. Абдуллозода тамоми ҷоизадорон ва варзишгарони кишварро нахуст барои иштироки фаъолона ва муаррифии миллат дар арсаи байналмилалӣ табрик намуда иброз дошт: “Самараи Истиқлолият ва таваҷҷуҳу ғамхориҳои бевоситаи Пешвои муаззами миллат, муҳтарам Эмомалӣ Раҳмон дар самти варзиш ва солимгардонии ҷомеа аст, ки имрӯз варзиши тоҷик ба таври бесобиқа рушд намуда истодааст. Ин дастоварди шумо – варзишгарони азиз, барои мардуми тоҷик ифтихори бузург аст. Қаҳрамонию мардонагии шумо дар майдони номусу нанг аз мадди назари миллату давлат дур намемонад ва ин корнамоии шумо дарси ибрат барои насли ояндаи миллат аст”.

Ифтихорнома ва туҳфаҳои пулию молиро Кумитаи кор бо ҷавонон ва варзиш дар якҷоягӣ бо Кумитаи миллии олимпии кишвар таъсис дода, дар охири чорабинӣ ба 5 нафар варзишгар: Ҷомии Ҳасан, Устоди дараҷаи байналмилалӣ аз намуди самбо, Самадова Миҷгона, Устоди варзиши Ҷумҳурии Тоҷикистон аз намуди кикбоксинг, Ҳалимзода Салимҷон, Устоди варзиши Ҷумҳурии Тоҷикистон аз намуди гӯштини тарзи озод ва Ибрагимов Сиёвуш, унвони Номзад ба устоди варзиши Ҷумҳурии Тоҷикистон аз рӯи намуди кикбоксин супориданд.

Ёдовар мешавем, ки 5-умин Бозиҳои Осиё дар иншооти пӯшида ва ҳунарҳои размӣ аз 16 то 27 сентябр дар шаҳри Ашқободи Туркманистон баргузор гардид. Тоҷикистонро дар Бозиҳои 5-уми Осиё 173 нафар, аз ҷумла 126 варзишгар дар 15 намуди варзиш ва ҳунарҳои размӣ муаррифӣ карданд. Тоҷикистон дар мусобиқа бо ба даст овардани 51 медал – 3 тилло, 14 нуқра ва 34 биринҷӣ, дар ҷадвали мусобиқа аз рӯи ҳисоби медалҳо миёни 65 давлати иштирокчӣ зинаи 17-умро ишғол намуд.

Шодихони НАЗАР, “ҶТ”