Коби Бин Брайант бас-кетболбози беҳамтои замони мо, ки бо лақаби “Мамбаи сиёҳ” (як навъи мор, ки дар Африқо бисёр аст) машҳур мебошад, бист соли умри хешро сарфи ҳимояи шарафу шони дастаи “Лейкерс Лос Анҷелес” кардааст. То ин давр сони ҳангомаофарии ӯро каси дигар дар ин бошгоҳ такрор накардааст. Бо корнамоиҳояш номи Коби дар сархати китоби таърихи даста бо ҳарфҳои заррин ҳаккокӣ гардидааст.

НАВРУСТАНҲО

Коби Бин Брайант 2-юми авгус-ти соли 1978 дар Филаделфияи ИМА таваллуд шудааст. Ба олами баскетбол омадани Коби Брайант амри тасодуф набуд, зеро падараш Ҷо Брайант баскетболбози ҳирфавӣ буда, дар NBA (Ассотсиатсияи миллии баскетбол дар Амрико) дурахши фавқулодае дошт. Дар ин росто Ҷо шарафи чандин дастаҳои итолиёвиро низ ҳимоя мекард ва дар олами баскетбол бо лақаби “Желли Бин” шуҳрат дошт. Модари варзишгар Памела Кокс бошад, аз оилаи баскетболбозон буд ва бародари ӯ Чубби Кокс яке аз шуҳратёртарин бозингарони Амрико маҳсуб меёфт.

Вақте ки писар шашсола буд, оилаи ӯ муваққатан ба Италия кӯчид. Дар Аврупо, Брайант баробари баскетбол, ки падараш ба ӯ дар синни сесолагӣ омӯзонда буд, ба футбол низ мароқ зоҳир кард ва ҳатто орзуи футболбоз шуданро фаротар аз баскетболбоз гардидан дар зеҳнаш ҷой дод. Дар мусоҳибаҳои баъдӣ, варзишгар борҳо эътироф кардааст, ки агар дар Италия мемонд, эҳтимол корномаи варзишии худро дар самти футбол идома медод. Ӯ дастаи Милани Итолиёро мухлисӣ мекард ва орзу дошт ба мисли бозингарони рӯъёҳои хеш Роналдинио ва Фрэнк Райкард замоне дар майдони сабзи ин бошгоҳ ҳунарнамоӣ кунад.

Дар соли 1991 падари оила корномаи варзишии худро ба анҷом расонид ва ҳамроҳи оилаи хеш дигарбора ба Амрико баргашта, зимоми мураббигиро ба даст гирифт. Пас аз бозгашт ба Амрико Коби дигарбора ба тамрини баскетбол пардохт ва падараш барои беҳтарин бозингар гардидани ӯ тамоми таҷрибаву малакаи хешро арзонӣ медошт.

Маҳорати баскетболбозии Коби замони таҳсил намуданаш дар мактаби миёнаи Мериони Поён зоҳир гардид ва тӯли чор соли таҳсилаш дар он муассиса маҳз ба шарофати ӯ дастаи мактаб беҳтарин натиҷаро нишон дода, аз охири ҷадвал ба ҷойи аввал баромад ва 2883 холро худи Коби ба даст оварда буд. Баъд аз нишон додани натиҷаҳои ҳангомавӣ дар байни дастаҳои мактаб ӯ ҳамчун беҳтарин баскетболбоз дар таърихи Амрико байни мактаббачагон дониста шуд, ки то кунун ин унвонро касе аз они худ накардааст.

КОРНОМАИ ВАРЗИШӢ

Фаъолияти касбии хешро Коби аз дастаи шуҳратёри Амрико ва ҷаҳон - “Лос Анҷелес Лейкерс” аз соли 1996 оғоз намуд. Дар корномаи варзишии “Мамбаи сиёҳ” бе муболиға метавон гуфт, ки ҳамеша пешравӣ буд. Ӯ ноком шудану афтиданро намедонист, ҳадафу мақсадаш бозингари беҳтарини гетӣ гардидан буд ва маҳз ин мақсаду маром ӯро ба муроди дил расонид.

Чунин иттифоқ афтод, ки дар Лейкерс Брайант бо яке аз баскетболбозони маъруфи даври хеш, дорандаи унвонҳои сершумор Шакил О’Нил дар як даста афтиданд. Дар оғоз ҳамдигарфаҳмии варзишгарон ва андар якдигар бозӣ намуданашон ба даста се унвони пайиҳами NBA-ро овард. Аммо пас аз мавсими соли 2002 ба гунае аз байни ин ду баскетболбоз гурбаи сиёҳ гузашт, ки ҳарду ҳам худро бозингари рақами яки даста медонис-танд. Ва ин омил байнашон хусуматро барангехт. Дигар ВАО на дар бораи маҳорати фавқулодаи варзишгарон, балки дар мавриди низою хархашаи онҳо менавишт. Ин ҳама бархӯрдҳои сард боис гардид, ки Шакил соли 2004 ба Майами Хит гузариш намояд ва ин гузариш ба ситораи асосии Лейкерс табдил гардидани Кобиро таъмин кард.

Дар оғози корнома Коби таҳти рақами 8 ҳунарнамоӣ мекард, аммо соли 2006 аз ин рақам даст кашида, ба хотири хотироти даврони мактабӣ рақами 24-ро ба худ гирифт, ки тайи 4 мавсим зери ин шумора майдондорӣ кард. Гуфтан ба маврид аст, ки баъди ба охир расидани корномаи варзишгар, ҳардуи ин рақамҳо дар даста аз муомилот гирифта шуданд.

Тибқи гуфтаи баскетболбоз, вай техникаи партофтани тӯбро бо як гардиш аз юз омӯхтааст, ки вақти шикор чи гуна ӯ сайдро бо як гардиш медораду аз пой меафтонад.

Истеъдод ва ирода “Мамбаи сиёҳ”-ро ба яке аз мақомҳои пурифтихори варзишӣ мубаддал гардонида буд, ки ҳатто баъзе аз рекордҳои шоҳи баскетбол Майкл Ҷордани бузургро шикаст. Ҷордан ҳам дар як мусоҳибааш иқрор гашта буд, ки танҳо Коби сазовори муқоиса бо ӯст.

Ситораи дигари баскетболе, ки Коби Брайантро бо ӯ муқоиса мекарданд, ин Леброн Ҷеймс аз дастаи Кливленд Кавалерс ва ҳамакнун Лайкарс ба ҳисоб мерафт. Аммо бояд қайд кард, ки Ҷеймсро маҳз Коби ба олами баскетболи касбӣ овардааст ва аз ин рӯ муқоисаи онҳо дур аз мантиқ мебошад, яъне муқоисаи устоду шогирд дар ҳеҷ давру даврон аз рӯи адолат набуд.

Дар моҳи феврали соли 2012 Лейкерс дар бозӣ бо Филаделфия бо натиҷаи 76 бар 65 мағлуб шуд, аммо ба замми бохт Коби дар ин дидор бо ба даст овардани 47 хол рекорди рақиби сарсахти хеш Шакил О’Нилро бекор кард ва моҳи марти соли 2013 аз рӯи миқдори холҳо Вилт Чемберленро ҳам пушти сар гузошт.

Коби Брайант бозии охирини худро моҳи апрели соли 2016 баргузор кард ва дар охирин дидор бо ҳайати тимаш дастаи қудратманди дигари Амрико “Юта”-ро мағлуб кард. “Мамбаи сиёҳ” замоне корномаи варзишиашро хотима бахшид, ки 37 сол дошт. Тасмими аз даста рафтан барои Коби осон набуд, аммо ҷароҳатҳои пайиҳам ва номутобиқии синну сол ба варзиш билохир ӯро маҷбур кард, то корномаашро ба сомон расонад. Бо вуҷуди ин, ки баскетболбоз дар авҷи шуҳрат тарки даста кард, аммо ҳама орзуву омоли кӯдакии хешро амалӣ кард, ки чунинаш орзуи ҳар варзишгар мебошад.

ҲАЁТИ ШАХСӢ

Ҳаёти шахсии варзишгар ба мисли баскетбол хушбахтона рушд кардааст. Коби бо ҳамсари худ Ванесса Корнехо дар ҷавонӣ шинос шуда буд. Ванесса мексикоитабор буда, дар Калифорнияи Амрико таваллуд шудааст. Ҷавонон пас аз шиносоии начандон тӯлонӣ соли 2001, вақте ки Брайант 22-сола буд, издивоҷ карданд ва дар ин ҳангом Ванесса 19 сол дошт.

Дар натиҷаи зиндагии хушбахтона ҳамсарон соҳиби се гулдухтар гардиданд, ки Наталя дар соли 2003, Ҷенна соли 2006 ва Бианка соли 2016 таваллуд шуданд. Тайи солҳои охир, Брайант бо ҳамсар ва фарзандонаш зиндагии хушбахтона дошт, аммо ин хушбахтӣ яку якбора ба бадбахтӣ мубаддал гашт ва осмони софи оилаи Брайантҳоро абри сиёҳи ғам фарогир шуд.

МАРГИ НОБАҲАНГОМ

26 январи соли 2020 хабари нохуши ҷигарсӯзе дар саросари ҷаҳон паҳн шуд - Коби Брайант дар суқути чархболи хусусӣ ҳалок гардид. Мотам дар оилаи Брайантҳо дучанд буд, зеро дар чархбол баробари ҳафт мусофири дигар духтарчаи 13-солаи ӯ Ҷана низ ҳалок гардид.

Марги варзишгар натанҳо оилаи ӯро мотамзада кард, балки ҳазорон мухлисашро дар саросари ҷаҳон ба гирдоби ғам ғуттавар сохт ва ҳамагон аз марги бармаҳали бозингари рӯъёҳои хеш ашки талх мерехтанд.

Тибқи маълумоти котиби давлатии Калифорния чархболи суқуткарда бо Брайант ба ширкати Айлан экспрес холдинг тааллуқ дошта, вақти парвоз ба самти фурудгоҳи Камарлиоо Калифорния ҳаракат дошт, то ки Коби ва духтарчааш дар бозии “Манба спорт академи” иштирок намоянд. Аммо ҳавои боронӣ ва тумани ғафс боис гашт, ки чархбол хати масирро гум кардаву ба кӯҳ бархӯрд.

Яҳё МАҲМАДНАБИЕВ, “ҶТ”