Бахшида ба 26–солагии Истиқлолияти давлатии кишвар, Рӯзи Ваҳдати миллӣ, “Соли ҷавонон” ва баҳри дарёфти Ҷоми раиси ноҳияи Рӯшон дар ҷамоати деҳоти “Назархудо Додихудоев” мусобиқаи футбол баргузор гардид, ки дар он 14 даста миёни ҳам рақобат намуданд.

Ба иттилои Шӯҳрат Алиев, сармутахассиси Бахши кор бо ҷавонон ва варзиши ноҳия, мусобиқа бо иқдоми Мақомоти иҷроияи маҳаллии ҳокимияти давлатӣ, Бахш ва шахсони саховатпешаи ноҳия ташкил гардида, қабл аз оғози он Имомназар Хоҷаназар Лутфулло, раиси ноҳия бо варзишгарон мулоқот кард.

Ба қавли раиси ноҳия дар ояндаи наздик хишти аввали варзишгоҳи замонавӣ бо 10 000 ҷои нишаст дар маркази ноҳия гузошта мешавад ва он барои тақвияти ҳаёти варзишии ҷавонону наврасон мусоидат хоҳад намуд.

Аз рӯи натиҷаҳои даври нимниҳоии мусобиқа дастаҳои “Деҳрушон” ба “Вамар” (2:1) ва “Дерзуд” ба “Барушон” (3:1) ғалаба карданд.

Даври ниҳоӣ байни дастаҳои “Дерзуд” ва “Деҳрушон” (2:2) мусовӣ ба охир расид, аммо дар зарбаҳои ёздаҳметра (пеналтӣ) бошад тими “Дерзуд” дастаи рақибро бо ҳисоби 4 : 3 шикаст дод ва соҳиби Ҷоми раиси ноҳияи Рӯшон шуд.

Ғолибон ҳамчунин бо медал, ифтихорнома ва мукофоти пулӣ сарфароз гардиданд.

Машҳур ИМОМНАЗАРОВ, “ҶТ”