Тавре иттилоъ дода будем, Раёсати кор бо ҷавонон ва варзиши шаҳри Душанбе бахшида ба Рӯзи модар мусобиқаи волейбол миёни бонувон барои дарёфти Ҷоми раиси шаҳри Душанберо ба роҳ монда буд.

Мусобиқаи мазкур аз 6 январ оғоз гардида, 6 март анҷом ёфт.

Дар он 25 дастаи бонувони волейболбоз аз вазорату муассисаҳо давоми 2 моҳ миёни ҳам рақобат карданд, ки дар натиҷа тими волейболи Донишгоҳи славянии Тоҷикистону Руссия соҳиби Ҷом шуд. 

Масъулини Раёсати кор бо ҷавонон ва варзиши шаҳри Душанбе мақсади баргузории мусобиқаи мазкурро тарғиби тарзи ҳаёти солим ва оммавӣ гардонидани намуди волейбол миёни бонувони вазорату идора, раёсату муассиса ва ташкилоту корхонаҳои пойтахт арзёбӣ намуданд.

Бозии финалӣ миёни дастаҳои волейболбоздухтарони Донишгоҳи славянии Тоҷикистону Руссия бо дастаи Бонки миллии Тоҷикистон сурат гирифт, ки бонувони Донишгоҳи славянии Тоҷикистону Руссия ҳарифашонро шикаст доданд. Мақоми сеюм насиби бонувони Кумитаи кор бо ҷавонон ва варзиш гардид.