Футбол, ки дар сайёра варзиши рақами 1 ба шумор меравад, дар ҳалқаи худ нафаронеро ҷалб намудааст, ки номашонро бо маҳорати олии варзишии худ дар таърихи футбол бо ҳарфҳои заррин сабт намудаанд. Мо ҳамакнун бобати нафаре мегӯем, ки бо малакаи беназираш дар футболи Осиё ва ҷаҳон ҷойгоҳи хосро ишғол намуда, дар раддабандии футбол ба Мессиву Роналдо наздик гардидааст.

Сон Хен Мин. Ин футболбоз 8 июли соли 1992 дар шаҳри Чунчони Кореяи Ҷанубӣ дар оилаи мураббии маъруф оид ба футбол Вунг-Ҷунг таваллуд шудааст.

Ӯ аз хурдсолӣ ба футбол дил баста, машқҳои нахустини худро рӯи майдони футбол бо бародараш дар саҳрои кушод, ки наздик ба шаҳр буд, оғоз намуд. Падар дид, ки маҳорати фарзандаш баланд аст, аз ӯ пурсон шуд, ки оё воқеан барои касб дар футбол мақсад дорад? Писар ба таври мусбат ҷавоб дод. Аз ин ҷавоб падар хушҳол гардида, ба таълими фарзанд шурӯъ менамояд. Пас аз муддати таълим ӯро роҳнамоӣ намуда, ба дастаи футболи наврасони шаҳр ҳамроҳ месозад. Соли 2008 мусобиқаи ҷаҳон миёни наврасон, ки дар Олмон баргузор гардид, барояш саҳифаи наверо боз намуд. Ӯ дар ин мусобиқа дар ҳайати асосии дастаи Кореяи Ҷанубӣ бозӣ карда, бо маҳорати олияш таваҷҷуҳи олмониҳоро ба худ ҷалб намуд. Худи ҳамон сол бо талаби зиёди тими Гамбурги Олмон ба дастаи ҷавонони “Гамбург” ҳамроҳ мешавад. Футболбоз то соли 2013 дар ин даста бозӣ менамояд. Бояд гуфт, ки дар тӯли ин солҳо яке аз пешсафони даста ба ҳисоб рафта, мухлисон ба вай лақаби “Миюлери Корея”-ро мегузоранд.

Аз соли 2013 то 2018 футболбоз шартномаи худро бо дастаи Байер мебандад. Соли 2015 ба клуби Тотенхеми Англия мепайвандад. Дар ин даста низ маҳорати баланд нишон дода, аз рӯи натиҷаи мавсимҳои 2018-2020 беҳтарин футболбози Тотенхем эътироф мегардад.

Футболбоз дар таърихи варзишии худ то имрӯз ба дастовардҳои зиёде ноил гардидааст. Аз ҷумла, чор маротиба беҳтарин футболбози Осиё, панҷ маротиба беҳтарин футболбози сол дар Корея ва иштирокчии чемпионати ҷаҳон дар солҳои 2014 ва 2018 мебошад. Ӯ инчунин 10 феврали соли равон дар рейтинги беҳтарин футболбози даҳсолаи Осиё аз ҷониби Федератсияи байналмилалии таърих ва омори футбол ҷойи аввалро ишғол намудааст.

Исфандиёр АМАКҶОНОВ, “ҶТ”