ВАРЗИШ
Шанбе 13 Июл 2024 03:57
8813
Хурсандиовар аст, ки солҳои охир таваҷҷуҳи ҷавонон нисбати варзиш ва тарзи ҳаёти солим зиёд шуда истодааст. Баробари дигар навъҳои варзиш имрӯз ба намуди варзиши шиноварӣ низ ҷавонону наврасон шавқи беандоза доранду ба он машғул шуда истодаанд. Фахриддин Мадкамов аз зумраи чунин варзишгарон мебошад, ки дӯстдори ин намуди варзиш асту устоди риштаи варзиши шиноварӣ. Ӯ 22 сол дорад ва аз соли 2013 инҷониб ба шиноварӣ машғул аст. Дар зимн фишурдаи суҳбати мо бо ӯ пешкаш мегардад.

-Барои чӣ маҳз варзиши шиновариро интихоб намудед?

- Ростӣ, аз наврасӣ майл ба шино кардан доштам ва бештари вақти худ-ро бо ҳамсабақонам ба шиноварӣ мегузарондам. Рӯз то рӯз дар қалбам шавқи шиноварӣ ҷо гирифт ва тасмим гирифтам, ки дар ягон толори варзишии кишвар аз нозукиҳои ин навъи варзиш бохабар гардам. Хушбахтона, имрӯз ба мақсадам расидам.

-Дар ин ҷода мураббии шумо кист?

-Воқеан, бе устод инсон ба ҷое намерасад. Мураббии аввалинам дар ин ҷода Раҳмат Мирзоев мебошад, ки бо эшон дар Мактаби махсуси варзишии захираҳои олимпии №4 оид ба шиноварӣ ба варзиш машғул мешудам. Маҳз заҳматҳои бевоситаи устодам буд, ки аз нозукиҳои ин риштаи варзиш бештар бохабар гардидам. Баъдан соли 2018 бо мураббӣ Рамзиёр Хоркашов тамринҳои худро идома додам. Бо маслиҳати устодам дар чандин мусобиқаҳои дохили кишвар иштирок намудам.

- Аввалин мусобиқае, ки дар он иштирок кардед, кадом аст?

- Соли 2014 дар шаҳри Душанбе аз намуди варзиши шиноварӣ чемпионати шаҳрӣ баргузор гардид, ки нахуст дар он маҳоратамро нишон додам. Аммо мутаассифона ғолибият ба даст наовардам. Аз ғолибият ба даст наоварданам, дилшикаста нашуда, тамринҳоямро идома додам. Ва дар ниҳоят соли 2015 дар мусобиқаи шаҳрӣ иштирок карда, сазовори ҷойи аввал гаштам. Аз ин комёбӣ хеле хушнуд гаштам ва завқам ба шиноварӣ бештар гардид.

- То имрӯз боз ба кадом дастовардҳои варзишӣ ноил гардидед?

- Дар мусобиқаҳои шиноварӣ аз намуди шиноварии “Баттерфляй” низ шино мекунам. Дар ин намуди шиноварӣ низ ғолибият ба даст овардаам. Инчунин бахшида ба 30-солагии Истиқлолияти давлатӣ дар шаҳри Душанбе мусобиқаи байналмилалӣ оид ба варзиши шиноварӣ байни давлатҳои ИДМ баргузор гардид. Дар мусобиқаи мазкур варзишгарони 8 давлат иштирок намуда, ман дар фосилаи 100 метр сазовори ҷойи якум гардидам.

- Дар кадом мусобиқаҳои ҷаҳонӣ иштироку ҳунарнамоӣ кардаед?

- Соли 2016 дар Канада мусобиқаи ҷаҳонӣ баргузор гардид, ки дар он иштирок намудам. Ин иштироки аввалини ман дар мусобиқаи ҷаҳонӣ буд, ки мутаассифона мағлуб шудам. Ҳамчунин соли 2021 дар мусобиқае дар Амороти Муттаҳидаи Араб иштирок намудам. Дар ин мусобиқа дар фосилаи 50 метр шино намуда, ҷойи 5-умро соҳиб шудам.
Инчунин аз 18 то 26 июни соли равон дар Будапешти Венгрия мусобиқаи ҷаҳонии шиноварӣ баргузор гардид. Дар он иштирок намудам, вале ҷойи намоёнеро соҳиб нагардидам.

-Дар риштаи варзиши шиноварӣ идеали шумо кист?

-Идеали ман Дайа Сэто шиновари ҷопонӣ мебошад. Ӯ дар ин ришта хеле муваффақ аст ва ман низ орзу дорам, ки ба мисли ин варзишгари ҷопонӣ дар самти интихобнамудаам муваффақ бошам. Барои ин ҳамеша дар талошу тамринам, то тавонам дар оянда Парчами Тоҷикистонро дар арсаи ҷаҳонӣ парафшон намоям.

-Дар оянда чӣ нақшаҳо доред?

- Дар оянда нақша дорам, ки орзуҳоямро дар амал татбиқ намоям. Нақшаи асосиям ин аст, ба Бозиҳои олимпии навбатӣ, ки соли 2024 дар Париж баргузор мегардад, роҳхат гираму дар он номбардори Ватан бошам.

Таҳмина ЮСУФӢ, “ҶТ”

Эзоҳи худро нависед



Рамзҳо дар расм