Дар доираи бозиҳои Ҷоми Конфедератсияи футболи Осиё ( КФО-2017) қаҳрамони панҷкаратаи Тоҷикистон, дастаи “Истиқлол”-и Душанбе шоми 18 апрел дар гурӯҳи “Д” бозии сеюми худро бо тими “Олой” -и Қирғизистон баргузор намуд. Дар ин дидор «Истиқлол» бо ҳисоби 3-1тими ҳарифро шикаст дод.

Шуруъ аз дақиқаҳои аввали бозӣ соҳибони майдон бартариятро ба даст гирифта, имкониятҳои голзаниро чанд маротиба анҷом доданд. Дар дақиқаи 45-уми дидор, дарвозабони “Олой” Абдуазиз Маҳкамов бо нимҳимоятгари “Истиқлол” Дэвид Мавутор қоидаи  бозиро дағалона вайрон намуд ва довари бозӣ Хироюки Кимура (Ҷопон) зарбаи 11-метра таъин намуд. Ин фурсатро Нуриддин Давронов ба хуби истифода бурда, дасташро ба пеш баровард.

Дар оғози нимаи дувуми дидор, дар дақиқаи 59, ҳамлагари меҳмонон Алиа Силла тавонист, ҳисоби бозиро баробар намояд. Баъдан Дэвид Мавутор дар дақиқаи 68-уми рақобат, пас аз партофти Фатҳулло Фатҳуллоев голи дуюми дастаашро ба самар расонид.

Ҳисоби 2-1 мизбононро қаноатманд  намекард,  аз ин лиҳоз сармураббии даста Муҳсин Муҳаммадиев  хати ҳамларо пурзӯр намуд. Дар дақиқаи 85-уми ба ҷойи Манучеҳр Ҷалилов ҳамлагари даста, Дилшод Восиевро вориди майдон намуд ва ин таъғирот бе натиҷа намонд. Дар дақиқаи 89-уми бозӣ  Дилшод Восиев тавонист бо сар голи 3-уми дастаашро ба номаш сабт намояд. Билохир дастаи “Истиқлол” дар шоҳидии 14500 мухлис тими “Олой”, қаҳрамони секаратаи Қирғизистонро бо ҳисоби 3-1 шикаст дод.

Бозии дигари гурӯҳи “D” байни дастаҳои “Дордой”-и Қирғизистон ва “Олтин Асир”-и Ашқобод бо ҳисоби 0:2 ба анҷом расид .

Баъди натиҷагирии се даври мусобиқа дар гурӯҳи “D” дастаҳои “Истиқлол” ва “Олтин Асир” бо доштани ҳафт имтиёзӣ садрнишини гурӯҳ мебошанд. Бо назардошти таносуби тӯбҳо “Истиқлол” (6-2) дар мақоми аввал ва “Олтин Асир” (5-2) дар мақоми дуюум қарор доранд.

Шаҳбози АСОМИДДИН “ҶТ”