Президенти Федератсияи футболи Тоҷикистон Рустам Эмомалӣ бо вуҷуди бохти мунтахаби футзали Тоҷикистон дар марҳилаи нимниҳоии Ҷоми Осиё-2024 ба дастовардҳои онҳо баҳои баланд додааст.

Дар ин бора аз Федератсияи футболи Тоҷикистон хабар доданд.

Ба иттилои манбаъ Президенти ФФТ ба ин далел аз дастоварди футзалбозони тоҷик изҳори қаноатмандӣ кардааст, ки онҳо тавонистанд барои нахустин бор дар таърихи кишвар ба мусобиқоти қаҳрамонии ҷаҳон, ки имсол дар Ӯзбекистон баргузор мешавад, роҳхат ба даст биёранд.

Ҳамчунин гуфта мешавад, ки барои ин комёбӣ Президенти ФФТ Рустам Эмомалӣ ба тими миллии футзали кишвар ҳамчун мукофотпулӣ 100 ҳазор доллар ҷудо кардаст.

Ёдовар мешавем, ки дар Ҷоми Осиё-2024 дар Бангкок мунтахаби Тоҷикистон панҷ вохӯрӣ анҷом дод. Футзалбозони мо дар марҳилаи гурӯҳии мусобиқот бар тими Кореяи Ҷанубӣ (2:0) пирӯз шуда, инчунин бо дастаҳои Қирғизистон (2:2) ва Ҷопон (1:1) мусовӣ (1:1) карданд. Дар даври чорякниҳоӣ дастаи Тоҷикистон бар тими миллии Афғонистон (2:1) ғолиб шуда, роҳхати мусобиқоти қаҳрамонии ҷаҳонро ба даст овард.

Шогирдони Пайрав Воҳидов дар даври ниманиҳоӣ аз мизбони Ҷоми Осиё-2024, дастаи Тайланд (вақти асосӣ – 3:3) дар силсилазарбаҳои пеналти бо ҳисоби 5:6 шикаст хӯрданд. Дар бозӣ барои ҷойи сеюм мунтахаби Тоҷикистон рӯзи 28 апрел бо тими миллии Ӯзбекистон вомехӯрад. Ин вохӯрӣ соати 13:00 ба вақти Душанбе оғоз мешавад.