Ба ифтихори “Соли ҷавонон” дар мавзеи Бидизи ҷамоати деҳоти Мирсаид Миршакари ноҳияи Роштқалъа мусобиқаи кушоди ноҳиявӣ аз рӯи волейбол доир гардид, ки дар он 24 даста миёни ҳам рақобат намуданд.

Мусобиқа бо ташаббуси ҷавонони мавзеи мазкур дар ҳамкорӣ бо Бахши кор бо ҷавонон ва варзиши ноҳия ташкил гардида, дастаҳо баҳри дарёфти Ҷоми “Сабзалӣ Бодурхонов” (Мураббии варзидаи Ҷумҳурии Тоҷикистон) ва муайян гардидани беҳтарин бозингару ҳамлагар сабқат намуданд.

Дар даври ниҳоӣ барои гирифтани ҷои аввал дастаҳои “Бароҷ” ва “Тавдем” рақобат намуданд, ки дар анҷом тими “Бароҷ” рақибашро бо ҳисоби 3:1 (25:22, 25:19, 23:25, 25:23) шикаст дода, ҷои якумро ишғол кард ва соҳиби Ҷоми “Сабзалӣ Бодурхонов” шуд.

Мувофиқи хулосаи доварони мусобиқа Масрур Чоршанбиев аз дастаи “Дашт” бозингари беҳтарин ва Эргаш Келдиев аз дастаи “Бароҷ” беҳтарин ҳамлагар интихоб гардиданд.

Ғолибон бо Ҷом, медал, ифтихорнома ва мукофоти пулӣ сарфароз шуданд.

Машҳур ИМОМНАЗАРОВ, “ҶТ”