ВАРЗИШ
Якшанбе 24 Январ 2021 02:33
7614
Донишкадаи тарбияи ҷисмонии Тоҷикистон ба номи С. Раҳимов бобати омодасозии мутахассисони соҳаи варзиш саҳми арзанда дорад. Аксар варзишгарони маъруфи кишвар, ки дар мусобиқаҳои гуногуни сатҳи ҷаҳонӣ шарафи кишварро ҳимоя ва ба хотири эшон парчами Тоҷикистон баланд бардошта шудааст, хатмкардаи ин боргоҳанд.

Дар донишкада баробари таълим ва омӯзиши ихтисоси гуногуни соҳаи варзиш, ҳамчунин яке аз навъҳои қадимаи варзиш, яъне шоҳмот ба роҳ монда шудааст. Шоҳмотро донишҷӯён дар ҳамаи факултаҳои донишкада меомӯзанд.

Бояд зикр кард, ки шоҳмотбозӣ миёни мардуми форсзабон, аз ҷумла тоҷикон аз замонҳои қадим вуҷуд дорад. Ҳатто асосгузори ин навъи варзишро маҳз ба мардуми форсзабон нисбат медиҳанд. Зеро нахустин рисолаҳоро доир ба шоҳмот дар аҳди қадим маҳз ниёгони мо навиштаанд.

Дар донишкада дастаи шоҳмотбозон таҳти роҳбарии мураббии соҳибтаҷриба Эраҷ Зоидов амал мекунад. Дастовардҳои даста хеле назаррас аст. Танҳо давоми соли равон дастаи шоҳмоти донишкада дар мусобиқаҳои байналмилалӣ, аз ҷумла дар шаҳри Батумии Гурҷистон ва Иссиқули Қирғизистон ширкат варзида, бо ноил шудан ба ҷойҳои ифтихорӣ шарафи кишварамонро баланд бардошта тавонистанд.

Чанде пеш дар пойтахти кишвар барои дарёфти “Ҷоми вазири корҳои дохилӣ - 2020” миёни сохторҳои мақомоти ҳифзи ҳуқуқ, корхонаву ташкилот, муассисаҳои таълимӣ мусобиқа оид ба шоҳмот ва шашка доир гардид. Дар ин сабқат дастаи яккачини донишкада нисбати дигар дастаҳо маҳорати бештар нишон дода, бо гирифтани ҷои аввал ҷомро ба даст овард. Дар мусобиқаҳои инфиродӣ аз рӯи намуди шашка омӯзгори донишкада, устоди варзиш Эраҷ Зоидов ва аз рӯи намуди шоҳмот донишҷӯи соли чоруми донишкада, устоди варзиш Алишер Каримов бо нишондиҳандаҳои беҳтарин сазовори ҷойи аввал гаштанд. Донишҷӯи соли чоруми донишкада, номзад ба устоди варзиш Лола Исмоилова тавонист аз рӯи намуди шашка ҷои дуюмро ба даст орад.

Вобаста ба дастовардҳои шоҳмтобозони донишкада ректори он Шодӣ Сафаров чунин изҳор дошт:

- Пешвои миллат муҳтарам Эмомалӣ Раҳмон дар яке аз баромадҳои хеш назди масъулини соҳаи варзиш иброз доштанд: “Шоҳмот дар баланд бардоштани донишҳои зеҳнӣ ва тафаккури ақлонии насли наврас саҳми босазо дорад.” Ин гуфтаҳои Пешвои миллатро ба инобат гирифта, дар назди Донишкадаи тарбияи ҷисмонии Тоҷикистон ба номи ҷаҳонпаҳлавон Саидмуъмин Раҳимов баробари таълими тахассуси шоҳмот ва вуҷуд доштани дастаи шоҳмотбозон, ҳамчунин маҳфили доимамалкунанда, яъне клуби шоҳмотбозони ҷавон фаъолият дорад. Аъзои маҳфил асоси дастаи шоҳмотбозони донишкадаро ташкил медиҳанд. Онҳо дар чандин мусобиқаҳои сатҳи ҷумҳуриявӣ ва ҷаҳонӣ ширкат варзида, натиҷаҳои баланд ба даст оварда, шарафи кишварро ҳимоя кардаанд. Хеле хурсандиовар аст, ки ҳоло дар ҷумҳурӣ баробари рӯ овардан ба намудҳои мухталифи варзиш сол ба сол майлу рағбати ҷавонону наврасон ба шашкаву шоҳмот ҳам зиёд мегардад.

Ҳамин тавр, роҳбарияти донишкада саъй дорад баҳри боз ҳам рушд бахшидани шоҳмот ва дар ин замина ба камол расондани шоҳмотбозони касбӣ дар ҷумҳурӣ бештар саҳм гирад.

Толибшоҳи ДАВЛАТ, “ҶТ”,
Мавлон ШАРИФОВ, узви ИЖТ

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
28 29 30 31 1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

Январ 2021 c.