5 октябр дар Варзишгоҳи марказии шаҳри Ваҳдат барои дарёфти 5-умин Ҷоми Президенти Тоҷикистон оид ба дзюдо варзишгарони 15 давлати дунё: Қазоқистон, Қирғизистон, Афғонистон, Покистон, Эрон, Русия, Германия, Непал, Япония, Беларус, Украина, Голландия, Америка ва Куба миёни ҳам рақобат карданд. Рақобатҳо барои ба даст овардани ҷойҳои ифтихорӣ дар вазни мутлақ сурат гирифта, паҳлавони номдори тоҷик Саидҷалол Саидов соҳиби 5-умин Ҷоми Президенти Ҷумҳурии Тоҷикистон гардид. 

Саидҷалол Саидов дар даври финалии мусобиқаи мазкур бо паҳлавони дигари тоҷик Комроншоҳи Устопириён қувваозмоӣ намуда, бо як вазарӣ ғолиб омад. Мақоми дуюумро Комроншоҳи Устопириён ва зинаҳои сеюумро Саидҷамол Алимардонов аз Тоҷикистон ва Шаҳриёр Идрисов варзишгари Қирғизистон ишғол намуданд.

Даври ниҳоии 5-умин Ҷоми Президенти Ҷумҳурии Тоҷикистон бо як шаҳомати хосса ва дастгириҳои зиёди мухлисони ҷамъомада сурат гирифт. Мухлисони тоҷик аз он меболиданд, ки ҷоми мазкур дар Тоҷикистон монд ва ҳарду варзишгари арзандаи даври ниҳоиро мухлисӣ карданд. Дар баробари мухлисии гарми ҳаводорони гӯштини дзюдо ҳарду паҳлавони тоҷик Саидҷалол ва Комроншоҳ маҳорати баланди варзишӣ ва одобу рафтори сатҳи олии гӯштингириро ба ҳозирин намоиш доданд.

Ғолиби ҷои якуми 5-умин Ҷоми Президенти Ҷумҳурии Тоҷикистон бо 7 ҳазор доллар, ҷои дуюм 4 ҳазор доллар ва 2 ҷои сеюм 2 ҳазор долларии ИМА мукофотонида шуданд.

Ёдовар мешавем, ки Ҷоми Президенти Ҷумҳурии Тоҷикистон оид ба дзюдо бори аввал соли 2013 доир гардида буд, ки дар он Виталий Дудчик аз Украина дар вазни -81 кг ғолиб шуд. Зинаи дуюмро Фарҳод Раҳимов (Тоҷикистон), ҷои сеюмро Сергей Терешенко (Балорус) сазовор шуда буданд. Дар вазни мутлақ ва барои шоҳҷоиза бошад, Ислом Шаҳобӣ аз Миср ғалаба кард. Медали нуқра насиби Муҳаммад Абдураҳмонов ва медалҳои биринҷӣ насиби Парвиз Собиров ва Фурқат Назриев (ҳар се аз Тоҷикистон) гардида буд. Соли 2014 бошад, Муҳаммад Абдураҳмонов (Тоҷикистон) дар вазни мутлақ пирӯз гашт. Зиёратшо Баротов, дзюдочии дигари тоҷик медали нуқра, Ҷавод Маҳҷуб (Эрон) ва Саидҷалол Саидов (Тоҷикистон) медали биринҷӣ ба даст оварданд. Дар сеюмин Ҷоми Президенти Тоҷикистон оид ба дзюдо дар соли 2015 40 варзишгар аз 13 кишвар ширкат карданд, ки дар он ҷои аввалро ин дафъа низ Муҳаммад Абдураҳмонов ишғол кард. Ҷои дуюм насиби Александр Ваховяк (Белорус), ҷои сеюм насиби Фирдавс Насимов (Тоҷикистон) ва Энди Алварес (Куба) гардид.

Соли 2016 низ Ҷоми Президенти Тоҷикистон дар шаҳри Ваҳдат баргузор гардида буд. Дар он 45 варзишгар аз 15 давлат: Афғонистон, Белорус, Италия, Куба, Қазоқистон, Қирғизистон, Непал, Озарбойҷон, Покистон, Русия, Тоҷикистон, Ӯзбекистон, Украина, Ҷопон ва Эрон ширкат намуданд. Дар ин мусобиқа Станислав Бондаренкои украинӣ соҳиби ҷом шуд. Ҷои дуюмро Алекс Гарсия Мендоза аз Куба, ҷои сеюмро узбекистониҳо Муҳсин Ҳисомиддинов ва Абдулло Тангриев ишғол карданд.

5-умин Ҷоми Президенти Ҷумҳурии Тоҷикистон оид ба дзюдо бо ташаббуси Кумитаи кор бо ҷавонон ва варзиши назди Ҳукумати кишвар дар ҳамкорӣ бо Федератсияи дзюдои Тоҷикистон ва мақомоти иҷроияи ҳокимияти давлатии шаҳри Ваҳдат гузаронида шуд. 

Шодихони НАЗАР, “ҶТ”