27 июл бо ташаббуси Бахши кор бо ҷавонон ва варзиши ноҳияи Шамсиддини Шоҳин дар варзишгоҳи марказии ҷамоати деҳоти Шӯрообод байни ҷавонон мусобиқаи волейбол доир гардид.

Дар ин мусобиқа 8 даста аз ҷамоатҳои Навобод, Девдор, Зулмобод, Дараиоб, Севдара, Хоҷағалтон, Шӯрообод ва Хайркорон иштирок карда, миёни ҳам рақобат намуданд.

Дар натиҷа дастаи волейболбозони ҷамоати деҳоти Зулмобод ҷои якумро ишғол намуданд. Дастаи ҷамоати деҳоти Навобод ҷои дуюм ва дастаи ҷамоати деҳоти Дараиоб ҷои сеюмро сазовор гаштанд.

Тавре Ҳисайн Раҷабов, мудири Бахши кор бо ҷавонон ва варзиши ноҳия, иттило дод, мақсад аз баргузории мусобиқа тарғиби тарзи ҳаёти солим байни ҷавонон ва муттаҳид сохтани онҳо, ҳамзамон муайян кардани дастаи беҳтарини ноҳия оид ба волейбол аст.

Ғолибон бо ифтихорнома ва туҳфаҳои хотиравӣ аз тарафи Бахши кор бо ҷавонон ва варзиши ноҳия сарфароз гардиданд.

Умед МИРЗОЕВ, “ҶТ”