26 март дар Наврӯзгоҳи шаҳри Душанбе мусобиқаи кушод барои дарёфти Ҷоми “Пойтахт-2018” аз рӯи намуди гӯштини миллӣ баргузор гардид.

Мусобиқа бо ташаббуси Мақомоти иҷроияи ҳокимияти давлатии шаҳри Душанбе ва Кумитаи кор бо ҷавонон ва варзиш бахшида ба ҷашни Наврӯзи байналмилалӣ гузаронида шуд, ки дар он паҳлавонони номдори кишварамон иштирок намуданд.

Пеш аз оғози мусобиқаи мазкур даври аввали марҳилаи якуми Фестивали бозиҳои миллии варзишӣ баргузор гардид, ки иштирокчиён баҳри мухлисони зиёди ҷамъомада намудҳои варзиши миллӣ: гӯштингирӣ ё гӯштини миллии суннатӣ, чавгонбозӣ, шиноварӣ, вазнабардорӣ (сангбардорӣ), дастхобонӣ, пойга (варзиши сабук, давидан ба масофаҳои 200,400,800 метр), шоҳмот, бандкашӣ, хурӯсҷанг, чиликдангал, ланкабозӣ, биҷилбозӣ, камонварӣ, шамшерзанӣ, камолғулак, фалағмолпартоӣ, ҳойталак ва бандпаракро, ки хоси ҷашни Наврӯз мебошанд, намоиш доданд.

Баъдаи Фестивали бозиҳои миллии варзишӣ мусобиқаи гӯштини миллӣ барои ба даст овардани Ҷоми “Пойтахт-2018” дар сатҳи олӣ баргузор гардида, паҳлавонон дар шаш вазн (60, 70, 80, 90, 100, +100) миёни ҳам рақобат намуда, дар охир вазнҳои мутлақ (90, 100, +100) барои шоҳҷоизаи мусобиқа – автомашинаи тамғаи “Мерседес – Бенс” рақобат намуданд.

Мақомоти иҷроияи ҳокимияти давлатии шаҳри Душанбе ҳар як пирӯзии паҳлавононро бо мукофоти пулӣ қадр намуд. Инчунин, барои паҳлавононе, ки дар шаш вазн мақомҳои якум, дуюм ва сеюмро ишғол намуданд, дар ҳаҷми 5500 сомонӣ (ҷои якум 3000, зинаи дуюм 1500, мақоми сеюм 1000) маблағ ҷудо намуда буд.

Рақобатҳо барои Шоҳҷоиза миёни паҳлавонони ҷоизадори вазнҳои мутлақи мусобиқаи мазкур пуршиддат сурат гирифт. Махсусан рақобати ниманиҳоӣ миёни Саидҷалол Саидов ва паҳлавони ҷавону умедбахши кишвар Ҳоҷимашраб Раҳмонов хотирмон сипарӣ гардид. Дар сонияҳои охири рақобат бо бартарии як бадан Саидҷалол Саидов ба даври ниҳоӣ роҳ ёфт. Вохӯрии даври ниҳоиро низ Саидҷалол Саидов бо як бадан бар муқобили Абубакр Раҳмонов бо пирӯзӣ анҷом дода, соҳиби шоҳҷоиза – автомашинаи “Мерседес – Бенс” шуд. Зинаҳои дуюму сеюм насиби бародарон Абубакр ва Ҳоҷимашраб Раҳмоновҳо гардида, мақоми дуюм бо маблағи 6000 ва мақоми сеюм 4000 сомонӣ қадр шуданд.

Ҷоизадорони Ҷоми “Пойтахт – 2018”

Вазни 60 кило
1. Сорбон Латипов
2. Хушқадам Хусравов
3. Ҷомии Ҳасан

Вазни 70 кило
1. Ориф Додов
2. Наврӯзи Каримзод
3. Муҳаммад Мирзоев

Вазни 80 кило
1. Акмал Муродов
2. Мирзоҷамил Рамазонов
3. Фарҳод Раҳматуллоев

Вазни 90 кило
1. Ҳоҷимашраб Раҳмонов
2. Олимов Зафар
3. Хуршед Шарифов

Вазни 100 кило
1. Саидҷалол Саидов
2. Ҷумахон Назриев
3. Довуд Соҳибназаров

Вазни +100 кило
1. Абубакр Раҳмонов
2. Додохон Қурбоналиев
3. Одил Сафаров