Аз таваҷҷуҳи Ҳукумати кишвар аст, ки дар қалби ҳар як шахси имконияташ маҳдуд шуълаи умед имрӯзҳо фурӯзон аст. Пас ба эшон, ки дар соҳаи варзиш фаъолият доранду дар мусобиқаҳои сатҳи ҷумҳуриявӣ ва байналмиллалӣ ширкат меварзанд, имконоти зиёде фароҳам оварда мешавад.

Пӯшида нест, ки шахсони имконияташон маҳдуд бо дарназардошти маъюбӣ аз ҷиҳати равонӣ худро коста меҳисобанд. Худро баробари дигар табақаҳои аҳолӣ намешуморанд. Вале тавассути варзиш ва тарбияи ҷисмонӣ мо метавонем умеди онҳоро ба оянда гарм созем. Кумитаи кор бо ҷавонон ва варзиши назди Ҳукумати кишвар низ дар самти кор бо шахсони имконияташон маҳдуд, бо се ташкилоти ҷамъиятие, ки федератсияи варзишии маъюбонро пеш мебаранд кор ва фаъолият дорад. Инҳо Федератсияи олимпиадаи махсуси Тоҷикистон, Федератсияи тарбияи ҷисмонӣ ва варзишгарони маъюби Ҷумҳурии Тоҷикистон ва Кумитаи параолимпии Ҷумҳурии Тоҷикистон маҳсуб меёбанд.
 
Абдурауф Алимов, роҳбари Федератсияи тарбияи ҷисмонӣ ва варзишгарони маъюб доир ба вазъи эшон хабар дода зикр намуд, ки ҳоло дар атрофи ин федератсия 750 нафар варзишгарони имконияташон маҳдуд муттаҳид шудаанд. Ин варзишгарон аз рӯи даҳ намуди варзиши тобистона ва 2 намуди варзиши зимистона тамрин менамоянд. 

Баҳром Ишратов, сармутахассиси раёсати тарбияи ҷисмонӣ ва инкишофи варзиши Кумитаи кор бо ҷавонон ва варзиши назди Ҳукумати ҷумҳурӣ вобаста ба вазъи ин варзишгарон гуфт, ки кумита бештар бо маъюбон аз рӯи намудҳои варзиш, аз ҷумла  дастхобонӣ, тенниси рӯи миз, дзюдо, шашка, шоҳмот мусобиқаҳро дар сатҳи шаҳру ноҳияҳо, вилоятҳо ва ҷумҳурӣ  баргузор менамояд. 

- Варзишгарони имконияташон маҳдуд ба ин намудҳои варзиш таваҷҷуҳи бештар доранд. Барои ҷалби бештари аҳолӣ ба соҳаи тарбияи ҷисмонӣ,  варзиш ва тарзи ҳаёти солим дар тамоми минтақаҳои кишвар мусобиқаҳо байни ин қишрҳои ҷомеа баргузор карда мешавад.
Ҳадаф аз баргузории бештари чорабиниҳо, ин руҳбаланд намудани варзишгарони имконияташ маҳдуд ба шумор меравад”, - зикр намуд Б. Ишратов.

Бахтиёр Донаёров аз зумраи шахсони имконияташон маҳдуде мебошад, ки дар соҳаи варзиши кишвар дастовардҳои назаррасе дорад. Баракси ҳол дастовардҳои Бахтиёр на аз намуди варзиши сабук, балки аз рӯи намуди варзиши вазнбардорӣ аст. Ӯ Тоҷикистонро чандин маротиба дар сатҳи ҷаҳон муаррифиву парчами кишварро парафшон намудааст.
 
Бахтиёр дар синни сесолагӣ аз бемории зуком ба бемории полиомиелит (фалаҷ) гирифтор шуд. Вале бо вуҷуди ин оташаки умед дар дили ӯ хомуш нагашт. Дар шашсолагӣ ба варзиш машғул гардид. Пас аз донишҷӯ шудан ба вазнбардорӣ пардохта, оҳиста – оҳиста дар ин навъи варзиш муваффақиятҳои зиёде касб кард. Тавре худи ӯ мегӯяд бо дастгирии устодонаш 5 карат қаҳрамони Тоҷикистон гардида, дар мусобиқаҳои сатҳи қитъа ва ҷаҳонӣ иштирок кардааст. Аз мусобиқот бо ҷоизаву медалҳо баргаштааст. Охирин ширкати ӯ дар мусобиқаҳои давлати Индонезия буд, ки бо шаҳрванди Эрон рақобат кард. Имсол бошад, моҳи июл дар Қазоқистон, дар мусобиқаи ҷаҳонӣ оид ба вазнбардорӣ сабқат хоҳад кард. 
 
“Ман дар оилае ба воя расидаам, ки сутуни хонадонамон варзишгар буд. Имсол дар бозиҳои параолимпӣ иштироки варзишгарони мо дар назар аст. Ҳамаи ин чорабиниҳое ки аз ҷониби кумита пешбинӣ мегарданд, маҳз барои интихоби  беҳтарин варзишгарон дар миёни шахсони имконияташон маҳдуд ба шумор меравад, то тавонанд шарафи Тоҷикистонро дар арсаи ҷаҳонӣ баланд бардоранд. Ду роҳи ба мусобиқаҳои параолимпӣ расидан аст. Аввал ҷамъоварии холҳои муқаррар шуда, ки имкон медиҳад ба мусобиқаи сатҳи параолимпӣ роҳхат гирем. Дуюм ширкат варзидан дар бозиҳои классификатсионӣ, ки ғайр аз медалу диплом, варзишгар метавонад соҳиби роҳхат ба бозиҳои олимпӣ гардад”, - иброз дошт Б. Донаёров.

Варзишгарони маъюби мо дар 6 моҳи соли равон дар мусобиқаҳои гуногуни сатҳи минтақавӣ ва ҷаҳонӣ фаъолона ширкат варзида, сазовори 7 медали тилло, 2 нуқра ва 7  биринҷӣ гардиданд.