Шоми 24-сентябр дастаи мунтахаби наврасони футболи Тоҷикистон, дар мусобиқаи интихобии қаҳрамонии Осиё-2018 миёни бозингарони 16-сола вохӯрии сеюмашро бо тими Умон баргузор намуд. Дар ин дидор футболбозони тоҷик бо ҳисоби 1:0 ҳарифро шикаст дода, роҳхати ба даври финалиро ба даст оварданд.

Вохӯрии мазкур дар Варзишгоҳи марказии Ҳисор бо иштироки 2300 баргузор гардид. Голи ягонаи рақобатро дар дақиқаи 76-ум ҳамлагари навраси кишвар Исроил Холов ба самар расонд.

Тими мунтахаби наврасони Тоҷикистон (U-16) зери роҳбарии сармураббӣ Зайниддин Раҳимов, дар се бозии гурӯҳӣ бар дастаҳои Сурия (2:0), Молдив (14:0) ва Умон (1:0) ғолиб омада, бо 9 хол дар ҷадвали мусобиқаи гурӯҳи “В” мақоми аввалро касб намуд. Зинаи дуюм бо 6 имтиёз насиби мунтахаби Умон гардид. Дастаи мунтахаби Сурия бо 3 хол, тими Молдив бидуни имтиёз дар мақомҳои охирин қарор гирифтанд.

Дастаи мунтахаби наврасони Тоҷикистон ҳамчун ғолиби гурӯҳи “В”-и мусобиқа ба марҳилаи ниҳоии қаҳрамонии Осиё миёни наврасони 16 сола, ки аз 20-уми сентябр то 7-уми октябри соли 2018 дар Малайзия баргузор мешавад, роҳ ёфт.

Тибқи низоми мусобиқа ҳашт дастаи ғолиби гурӯҳҳои дигари интихобӣ – Урдун (гурӯҳи “A”), Эрон (гурӯҳи “С”), Ироқ (гурӯҳи “D”), Яман (гурӯҳи “E”), Кореяи Шимолӣ (гурӯҳи “F”), Индонезия (гурӯҳи “G”), Австралия (гурӯҳи “I”) ва Ҷопон (гурӯҳи “J”) – ба марҳилаи ниҳоии қаҳрамонии Осиё-2018 роҳ ёфтанд.

Инчунин ба марҳилаи ниҳоии мусобиқа чор дастаи ҷойҳои дуюм аз рӯи нишондодҳои беҳтарин - Умон (гурӯҳи “B”), Ҳиндустон (гурӯҳи “D”), Тайланд (гурӯҳи “G”) ва Ветнам (гурӯҳи “I”) – ҳаққи ширкат дар марҳилаи ниҳоии қаҳрамонии Осиё-2018-ро мушараф гардиданд.
Баъди бозиҳои гурӯҳи “Н”, ки аз 25-ум то 29-уми сентябр миёни дастаҳои мунтахаби наврасони Кореяи Ҷанубӣ, Филиппин, Чин ва Мянмар баргузор мегардад, ду дастаи ширкаткунандаи марҳилаи ниҳоӣ маълум хоҳад шуд.