Марҳилаи ниҳоии чемпионати Осиё оид ба футзал миёни дастаҳои мунтахаби ҷавонони то 20-сола, ки дар он дастаи Тоҷикистон низ ширкат мекунад, дар Тайланд доир мегардад.

Дар аввалин чемпионати Осиё-2017 миёни ҷавонон, ки 9-21 май ба нақша гирифта шудааст, 22 даста иштирок хоҳанд кард. Тибқи қуръакашӣ, ки дертар сурат мегирад, дастаҳо ба чор гурӯҳ - ду гурӯҳи иборат аз 6 даста ва 2 гурӯҳ иборат аз 5 даста тақсим мешаванд. Аз ҳар гурӯҳ ду дастаи беҳтарин рақобатро барои медалҳо идома медиҳанд.

Дастаи мунтахаби ҷавонони кишварро ба чемпионати Осиё-2017 Пайрав Воҳидов омода мекунад. То мусобиқа футзалчиёни ҷавони кишвар чанд бозии рафиқона анҷом хоҳанд дод.