Дар баргузории 42-юмин Ассамблеяи генералии ҳисоботию интихоботии Шурои Олимпии Осиё, ки дар шаҳри Бангкоки Подшоҳии Таиланд баргузор шуд, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, ноиби Президенти Кумитаи миллии олимпии Тоҷикистон Абдулло Раҳмонзода бо намояндаи Федератсияи байналмилалии ҷиу-ҷитсу вохӯрӣ намуд.

Дар ин бора шуъбаи таҳлил ва иттилооти Кумитаи кор бо ҷавонон ва варзиш иттилоъ додааст.

Бино ба иттилои манбаъ, дар вохӯрӣ ҷонибҳо масъалаи рушди ҷиу-ҷитсуро дар Тоҷикистон мавриди баррасӣ қарор доданд. Инчунин дар он иштироки дастаи мунтахаби Тоҷикистон оид ба ҷиу-ҷитсу дар мусобиқаҳои байналмилалӣ, Чемпионати ҷаҳон ва Осиё, ҳамзамон дар Бозиҳои Осиёӣ мавриди муҳокима қарор гирифт.

Бояд гуфт, ки Федератсияи ҷиу-ҷитсуи Тоҷикистон аз ҷониби мақоми ваколатдори давлатӣ дар соҳаи тарбияи ҷисмонӣ ва варзиш - Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва Кумитаи миллии олимпии Тоҷикистон ҳамчун Федератсияи навтаъсис эътироф карда шудааст.

Гуфта мешавад, ки минбаъд Федератсияи ҷиу-ҷитсуи Тоҷикистон ҳамчун аъзои Иттиҳодияи ҷиу-ҷитсуи Осиё ва Федератсияи байналмилалии ҷиу-ҷитсу дар тамоми мусобиқаҳои сатҳи ҷаҳонӣ Тоҷикистонро намояндагӣ мекунад.

“ҶТ”