Дар Кохи фарҳанги “Суғдиён” - и маркази вилояти Суғд, санаи 1 феврал, вохӯрии раиси вилоят Раҷаббой Аҳмадзода бо ҷавонон ва варзишгарони вилоят баргузор гардид.

Раҷаббой Аҳмадзода, раиси вилоят, зимни суханронии хеш аз дастовардҳо ва натиҷаҳои илмиву варзишии ҷавонон дар соли 2018 натиҷагирӣ намуда, дар самти вусъати татбиқи барномаҳои соҳавӣ, дастгирии иҷтимоию иқтисодии ҷавонон, тарғиби тарзи ҳаёти солим, баргузор намудани чорабиниҳои фарҳангӣ, оммавӣ ва варзишӣ вазифаҳои мушаххас гузошт.

Гуфта шуд, ки соли 2018-ум дар мусобиқаҳои ҷумҳуриявӣ ва байналмилалӣ аз рӯи намудҳои олимпӣ ва ғайриолимпӣ беш аз 2360 нафар варзишгарони вилоят иштироку соҳиби ҷойҳои якум, дуюм ва сеюм шуданд. Дар давоми соли 2018 дар шаҳру ноҳияҳои вилоят беш аз 105 иншооти варзишӣ аз ҷумла, 77 майдонча, 19 толор, 1 ҳавзи шиноварӣ, 1 маҷмаа ва 7 майдонча барои бозии кӯдакон бо сарфи беш аз сиву се миллион сомонӣ аз ҳисоби маблағҳои буҷетӣ ва ҷалби сарпарастон сохта ва ба истифода дода шуданд.

Дар интиҳои вохӯрӣ ҷавонони фаъол, варзишгарони муваффақ, ғолибони мусобиқаҳои байналмилалӣ ва собиқадорони соҳа бо ҷоиза ва мукофотҳои пулии раиси вилояти Суғд қадршиносӣ шуда, сипас аз тарафи аҳли ҳунар барномаи пурмуҳтавои фарҳангӣ пешкаши ҳозирин гардид.