САЙЁҲӢ
Душанбе 16 Сентябр 2019 11:34
1579
Паёми табрикии раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон Аҳтам Абдуллозода ба муносибати Рӯзи умумиҷаҳонии туризм

Ҳамдиёрони азиз!

Кумитаи ҷавонон, варзиш ва сайёҳӣ шуморо ба муносибати Рӯзи умумиҷаҳонии сайёҳӣ, ки ҳар сол 27-уми сентябр дар саросари ҷаҳон бо шаҳомати хоса ва шиорҳои ҷолиб ҷашн гирифта мешавад, табрику таҳният намуда, пеш аз ҳама ба шумо саломатӣ, хонаи обод ва пирӯзиву сарбаландиро дар фазои софу беғубори Тоҷикистони соҳибистиқлол ва биҳиштосо таманно дорад.

Имсол низ ин рӯз дар ҷаҳон зери шиори «Сайёҳӣ барои ҳама - мусоидат ба дастрасии умумӣ ба туризм» ҷашн гирифта мешавад.

Сайёҳӣ ё туризм дар сиёсати имрӯзаи Ҳукумати кишвар бо дарназардошти захираҳои бузурги табиӣ - рекреатсионӣ ва мероси бойи таърихию фарҳангии мамлакатамон ба василаи эҷоди симои қавии Тоҷикистон ҳамчун узви комилҳуқуқи ҷаҳонӣ мубаддал гашта истодааст. Дар росто, сиёсати “Дарҳои кушод”, оромию осудагӣ, мавҷудияти роҳҳои замонавӣ ва ташкили инфрасохтори мусоид барои рушди ин соҳа такони ҷиддӣ бахшида истодааст.

Асосгузори сулҳу Ваҳдати миллӣ - Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон, ки асосгузори рушди соҳаи сайёҳӣ, муаррифии Тоҷикистони муосир ба ҷомеи ҷаҳонӣ ва ҷалби бемайлони сайёҳони хориҷӣ ба мамлакат ба ҳисоб мераванд, борҳо дар суханронишон ба ин соҳаи даромадноки кишвар, омода намудани мутахассисони ихтисосманди соҳа таъкид намуда,  иброз намудаанд, ки дар марҳилаи тараққиёти иҷтимоии кишвар яке аз самтҳои афзалиятноки сиёсати иқтисодӣ рушди туризми байналмилалӣ бояд маҳсуб шавад.

Ҳамчунин, бунёди силсилаи меҳмонхонаҳои сатҳи баланди байналмилалӣ дар шаҳри Душанбе ва ташкили инфрасохтори аввалиндараҷа дар манотиқи гуногуни мамлакат аз амалӣ шудани нақшаҳои дурнамои Ҳукумати Ҷумҳурии Тоҷикистон дар ин замина мебошанд. 

Соҳаи сайёҳӣ дар асл кишвари моро ба ҷомеаи ҷаҳонӣ ҳамчун ҷавҳари кашфношуда муаррифӣ намуда, Тоҷикистон ҳамчун биҳишти рӯи заминро мемонад.

Таҳлили вазъи кунунии туризми воридотӣ ва дохилии ҷумҳурӣ шаҳодат медиҳад, ки марҳила ба марҳила сатҳ ва сифати хизматрасониҳо беҳтар гашта истодааст. Имрӯзҳо, мувофиқи маълумоти омор дар ҷумҳурӣ зиёда аз 100 иншооти туристии дорои ҷанбаҳои санаторию курортӣ бо назардошти меҳмонхонаҳо амал менамоянд, ки ба меҳмонону сайёҳон хизмат мерасонанд.

Умдатарин нишондод ва натиҷаи фаъолияти самарабахши мо аз ташрифи бештари сайёҳон ба Тоҷикистон вобастагӣ дорад.

Ҷуғрофияи ташрифот сол то сол васеъ гашта, бо тариқи инфиродӣ ва муташаккилона намояндагони беш аз 100 мамлакати дунё аз Ҷумҳурии Тоҷикистон ҳамчун сайёҳ боздид намуда истодаанд. Аз моҳи июни соли 2016 бошад, тартиби электронии равододи Тоҷикистон аз ҷониби Вазорати корҳои хориҷӣ баҳри таъмини ташрифи бештари сайёҳон ба кишвар оғоз гардид.

Дар натиҷаи татбиқи маҷмӯи чораҳои дар боло зикршуда, махсусан сода кардани тартиби воридшавӣ ба кишвар, аз байн бурдани монеаҳои молиявию маъмурии маҳдудкунанда, инчунин анҷом додани корҳои мақсадноки маркетингӣ, алалхусус тавсеаи маводҳои таблиғотӣ оид ба захираҳои туристии Тоҷикистон дар намоишгоҳҳои байналмилалӣ, дар соли 2015 тибқи маълумоти оморӣ нахустин маротиба пас аз ба даст овардани соҳибистиқлолии давлатӣ нишондоди ташрифоти шаҳрвандони хориҷӣ ба кишвар аз 400 ҳазор нафар гузаштааст. Агар соли 2015 нишондиҳандаи баландтарини ташрифоти сайёҳон - 414 ҳазор сайёҳ ба қайд гирифта шуда бошад, дар нимсолаи якуми соли 2016 ба кишвар 209 ҳазору 511 нафар шаҳрванди хориҷӣ ташриф оварданд, ки 163 ҳазору 988 нафарашон ба ҳайси сайёҳ арзёбӣ мегарданд. Ин нишодод нисбат ба ҳамин давраи соли 2015 16723 нафар зиёд мебошад.

Аз ҳисоби 163 ҳазору 988 сайёҳи хориҷӣ ба иқтисодиёти мамлакат 81 миллиону 994 ҳазор доллари амрикоӣ ворид гаштааст, ки нисбат ба ҳамин давраи соли гузашта 8 миллиону 361 ҳазору 500 доллар зиёд мебошад.

Ба роҳ мондани ҳамкориҳои мутақобилан судманд ва талошҳои муштараки тамоми мардуми шарафманди Тоҷикистон боиси эҳёи босуръати соҳаи сайёҳӣ дар кишварамон мусоидат намуда, ба таъмини шаҳрвандон бо ҷойҳои кор, беҳдошти зисту зиндагии мардум, ки бешубҳа омили мусоидаткунанда барои ба раванди ҷаҳонии туризм шомил шудани давлатамон созгор мегардад, мусоидат мекунад.

Аз сӯи дигар тоҷикистониён бояд дар ҳудуди ватани худ бештар саёҳат карда, онро бештар омӯзанд, қадр намоянд ва дӯст доранд. Зеро дар аксари мамлакатҳо миқдори сайёҳони дохилӣ аз сайёҳони хориҷӣ зиёд мебошанд.

Дар ин замина мардуми Тоҷикистон бояд дар сайёҳӣ, махсусан саёҳати дохилӣ акси худро бинанд.

Бори дигар Рӯзи умумиҷаҳонии туризмро ба шумо муборакбод гуфта, дар фаъолияти хизматӣ муваффақият ва дар ҳаёти шахсӣ бахту саодатро таманно менамоям.

Рӯзи умумиҷаҳонии туризм муборак, ҳамватанони азиз!

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
26 27 28 29 30 31 1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 1 2 3 4 5 6

Сентябр 2019 c.