Аз шумораи умумии шаҳрвандони хориҷие, ки дар нимсолаи аввали соли ҷорӣ ба Ҷумҳурии Тоҷикистон ташриф овардаанд, 125,3 ҳазор нафарашон ба ҳайси сайёҳ омадаанд, ки ин шумора нисбат ба ҳамин давраи соли пешин 59,2 фоиз кам мебошад.

Ин матлаб дар нишасти хабарии Кумитаи рушди сайёҳии назди Ҳукумати Ҷумҳурии Тоҷикистон 26 июли соли равон зикр карда шуд. Раиси кумитаи мазкур Тоҷиддин Ҷӯразода сабабҳои ба мушкил мувоҷеҳ шудани соҳаи сайёҳиро илова ба бемории ҳамагири COVID - 19, ҳамчунин мавқеи ҷуғрофии кишвар, вазъи сарҳади давлатӣ ва ҷавон будани сектор арзёбӣ намуда, аз ҷумла қайд намуд, ки соҳа ҳанӯз ҳам ба мутахассисони соҳибмаълумот ва ҷавобгӯ ба талаботи бозори меҳнат ниёз дошта, инфрасохтори соҳа такмили ҷиддӣ мехоҳад.

Саҳми сайёҳӣ ҳамчун самти муҳими рушди иқтисодиёти кишвар дар сатҳи паст арзёбӣ гардид. Масалан, агар саҳми он дар афзоиши ММД дар соли 2019 2% бошад, соли 2020 танҳо 1%-ро ташкил дод.

Ҳамчунин зикр гардид, ки айни замон дар Ҷумҳурии Тоҷикистон 226 адад ширкати сайёҳӣ фаъолият менамояд, ки 50 адад дар ВМКБ, 40 адад дар вилояти Суғд, 17 адад дар вилояти Хатлон, 105 адад дар шаҳри Душанбе ва 14 адад дар шаҳру навоҳии тобеи марказ ҷойгиранд. Дар ин давра ба 15 ширкат иҷозатномаи фаъолияти сайёҳӣ дода шудааст.

“Бо мақсади рушди ҳарчи бештари соҳаи сайёҳӣ, аз ҷумла инфрасохтори соҳа ҳамкориҳо бо ниҳодҳои байналмилалии молиявӣ тақвият дода шуда, маблағҳои грантӣ ба миқдори 40 млн. доллари амрикоӣ ҷиҳати татбиқи лоиҳаҳои “Рушди иқтисодиёти деҳот” ва “Рушди сайёҳӣ” ҷалб шудаанд”, - гуфт Т. Ҷӯразода.