САЙЁҲӢ
Сешанбе 28 Феврал 2017 07:57
1959
Туризм аз рӯзгори пешин барои пешрафти ҷомеа аҳамият дошт. Онро метавон чун намуди фаъолияти тафреҳӣ-меҳнатии инсон аз замоне, ки таърих бо пайдоиш ва тараққиёти тамаддунҳо оғоз меёбад, мансуб донист.

Он дар ташаккул ва тараққиёти тамаддуни ҷаҳонӣ, ба монанди тамаддунҳои маҳаллӣ, аз қадим нақши бузурге бозидааст. Саноати ҷаҳонгардӣ ва саёҳат дар аҷдоди мо аз замонҳои бисёр қадим пайдо шудааст. Инсон дар тӯли таҳаввулоти иҷтимоиаш ба дарки олами атроф ва кашфи сарзаминҳои нав барои рушди тиҷорат, фатҳ ва аз худ кардани заминҳои нав, кашфи манбаъҳо ва дастрасӣ ба роҳҳои нави нақлиёт шавқу рағбат дошт. Дар аксари одамон майли дидани мавзеъҳо, кишварҳо ва шиносоӣ бо ҳаёт ва расму оини халқҳои дигар вуҷуд дорад. Ҳамаи ин омили зуҳури шаклҳои гуногуни саёҳат гардид.

Тибқи маълумоти омории Созмони умумиҷаҳонии сайёҳӣ дар зарфи даҳ соли охир афзоиши ҳаҷми туризми байналмилалӣ мушоҳида мегардад. Рушди туризмро дар дилхоҳ давлат бе таъминоти базаи зарурии ҳуқуқӣ бунёди таҳкурсии қонунгузорӣ тасаввур намудан мумкин нест.

Қобили тазаккур аст, ки кафолати баамалбарории фаъолияти сайёҳӣ дар моддаи 12 Конститутсияи Ҷумҳурии Тоҷикистон муқаррар шудааст. Мутобиқи ин модда «Давлат фаъолияти озоди иқтисодӣ, соҳибкорӣ, баробарҳуқуқӣ ва ҳифзи ҳуқуқии ҳамаи шаклҳои моликият, аз ҷумла моликияти хусусиро кафо¬лат медиҳад». Асоси инкишофи иқтисодии ҷомеа иқтисодиёти бозоргонӣ мебошад. Ин муқаррароти конститутсионӣ муқаррароти заминавии базаи ҳуқуқӣ барои баамалбарории фаъолияти сайёҳӣ ҳамчун фаъолияти соҳибкорӣ мебошад.

Ҳамзамон, қонунгузории сайёҳӣ маҷмӯи санадҳои меъёрӣ - ҳуқуқие мебошад, ки ба воситаи он муносибатҳои сайёҳӣ ба танзим дароварда мешавад. Низоми санадҳои меъёрии ҳукуқии батанзимдарорандаи фаъолияти сайёҳӣ ба Конститутсияи Ҷумҳурии Тоҷикистон бояд мутобиқ бошанд.

Дар Ҷумҳурии Тоҷикистон аз замони ба даст овардани истиқлолияти давлатӣ то ин дам маҷмӯи санадҳо ва меъёрҳои гуногуни ҳуқуқӣ қабул карда шудаанд, ки бевосита ба рушди туризм дар мамлакат мусоидат менамоянд.

Ба онҳо пеш аз ҳама Қонуни Ҷумҳурии Тоҷикистон "Дар бораи туризм", Қонуни Ҷумҳурии Тоҷикистон, "Дар бораи иҷозатномадиҳӣ ба баъзе намудҳои фаъолият», қарори Ҳукумати Ҷумҳурии Тоҷикистон “Дар бораи Консепсияи рушди туризм дар Ҷумҳурии Тоҷикистон дар давраи солҳои 2009-2019”, қарори Ҳукумати Ҷумҳурии Тоҷикистон,"Дар бораи Барномаи рушди туризм дар Тоҷикистон дар давраи солҳои 2015- 2017", қарори Ҳукумати Чумҳурии Тоҷикистон Дар бораи “Нақшаи чорабиниҳо оид ба беҳтар намудани фазои сармоягузорӣ дар бахши туризм дар Ҷумҳурии Тоҷикистон”, аз 3 майи соли 2014, №301, қарори Ҳукумати Ҷумҳурии Тоҷикистон “Дар бораи Шӯрои байниидоравӣ оид ба ҳамоҳангсозии фаъолият дар соҳаи ту¬ризм дар назди Ҳукумати Ҷумҳурии Тоҷикистон” аз 5 сентябри соли 2015, №564 ва монанди онҳо дохил мешаванд.

Қабули меъёрҳои ҳуқуқии зикргардида шаҳодат медиҳанд, ки дар Тоҷикистон базаи зарурии ҳуқуқии рушди туризм вуҷуд дорад.

Бояд ёдовар шуд, ки ба Қонуни Ҷумҳурии Тоҷикистон “Дар бораи туризм” 3 маротиба бо ташаббуси Кумита ва Парлумони кишвар ва Ҳукумати Ҷумҳурии Тоҷикистон тағйиру иловаҳо во-рид карда шудаанд, ки барои беҳдошти фаъолият дар соҳа созгор мебошанд.

Бо мақсади такмили Қонуни Ҷумҳурии Тоҷикистон “Дар бораи туризм” лоиҳаи Қонуни Ҷумҳурии Тоҷикистон «Дар бораи рушди туризми дохилӣ» аз ҷониби Маҷлиси намояндагони Маҷлиси Олии Ҷумҳурии Тоҷикистон дар якҷоягӣ бо Кумитаи ҷавонон, варзиш ва сайёҳӣ корбарӣ шуда истодааст.

Ҳоло сохторҳои давлатию хусусӣ барои рушди соҳаи туризм дар асоси қонунгузории амалкунанда ҳамкорӣ ва саъю кӯшиши якҷоя доранд, ки ин омили мусоидаткунанда марҳила ба марҳила барои ба раванди ҷаҳонии туризм шомил шудани давлатамон мегардад.

Абдукарим ҚУРБОНОВ,
сармутахассиси Раёсати рушди туризми
Кумитаи ҷавонон варзиш ва сайёҳии
назди Ҳукумати Ҷумҳурии Тоҷикистон

Эзоҳи худро нависед



Рамзҳо дар расм