Бо иқдоми Бахши ҷавонон,  варзиш  ва  сайёҳии  ноҳияи Ҷалолиддини Балхӣ бахшида ба Рӯзи ҷаҳонии туризм чорабиниҳои тарғиботӣ-ташвиқотии сайёҳӣ, фарҳангӣ, саёҳати ҷавонон ба мавзеъҳои таърихӣ баргузор шуд.
 
Ҷамоатҳои шаҳраку деҳоти ноҳия зимни намоишгоҳ дастовардҳои даврони соҳибистиқлолии кишвар, маҳсулоти савғотӣ - туристӣ, кандакорӣ, гаҷкорӣ ва бофандагиро ба маъраз гузоштанд.



Дар ин рӯз 180 нафар ҷавон аз осорхонаи таърихӣ-кишваршиносии ноҳия дидан намуданд. Шумораи нигораҳои таърихӣ дар осорхона ба 1351 адад расида, бо кӯшиши кормандони он ва шахсони фарҳангдӯст сол то сол ин шумора зиёд мегардад.



Дар ҳамкорӣ бо шуъбаи ҳифзи муҳити зисти ноҳия ва Ҷамоати шаҳраки С. Исоев, бо мақсади беҳдошти фазои экологӣ ва ба роҳ мондани корҳои ободонӣ ҳашари ноҳиявии ҷавонон таҳти шиори “Рушди туризми экологӣ” доир шуд. Дар он зиёда аз 470 нафар иштирок намуда, роҳраву кӯчаҳоро аз ифлосиҳо тоза карданд.

Дар ин бора иҷрокунандаи вазифаи мудири Бахши ҷавонон, варзиш ва сайёҳии ноҳияи Ҷалолиддини Балхӣ Х. Қурбонов иттилоъ дод.