Тибқи маълумоти Форуми ҷаҳонии иқтисодӣ (ФҶИ) Тоҷикистон дар рейтинги кишварҳое, ки барои сайёҳӣ ҷолибанд, 12 зина боло рафтааст.

Тоҷикистон аз 136 ҷойи имконпазир мақоми 107-умро касб кард. Дар ин бора сомонаи «eadaily.com» хабар медиҳад.

Бино ба маълумоти ФҶИ,  Ҷумҳурии Тоҷикистон аз 7 холи имконпазир 3,2 хол гирифта, дар давоми ду сол аз 119-ум ба 107-ум ҷой боло рафт. Беҳтарин нишондодро (5,7 хол) Тоҷикистон дар категорияҳои «амният», «тандурустӣ ва беҳдошт» ба даст овард.

Ҷолиби диққат аст, ки Тоҷикистон дар рӯйхати кишварҳое, ки дар давоми як сол ҷаҳиши беҳтарини сайёҳӣ нишон доданд, алоҳида қайд шудааст. Дар ин рӯйхат Тоҷикистон дар зинаи сеюм қарор гирифт. Дар ҷойи аввал Ҷопон ва дар ҷойи дуюм Озарбойҷон мебошанд.

Россия дар ин рейтинг дар мақоми 43-юм, Қазоқистон дар 81-ум ва Қирғизистон дар 115-ум қарор гирифтанд. Ӯзбекистон дар ин феҳрист дохил нашудааст. Рейтингро Испания пешсафӣ карда, аз паси он Франсия ва Олмон мераванд.