Ташкилоти умумиҷаҳонии туристии СММ дар як гузориши худ, ки бар асоси таҳлилҳои соли 2015 натиҷагирӣ шудааст, Тоҷикистон, Парагвай ва Ниуэ (Зеландияи Нав)-ро аз кишварҳое донистааст, ки туризмашон бо суръати баланд рушд мекунад. 

Тоҷикистон аз нигоҳи рушди сайёҳӣ дар миёни ин се кишвар дар ҷои дуюм қарор дорад. 

Дар ин гузориш омадааст, соли 2015 ба Тоҷикистон 414 ҳазор сайёҳ ворид шудааст, ки дар қиёс ба соли 2014 94 дарсад бештар аст. Ин ташкилот далелҳои таваҷҷуҳи сайёҳон ба кишварро дар кӯҳҳои сарбафалаки Бадахшон ва пайкараи Буддо донистааст.

Сиёсати дарҳои кушод, сохтмони шоҳроҳҳо, нақбҳо, ободии Ватан ва рушди инфрасохтор, тинҷию оромӣ ва дигар тадбирҳои андешидаи Ҳукумати мамлакат барои ҷалби таваҷҷуҳи ҷомеаи ҷаҳонӣ ва ба ин васила мустаҳкам кардани нуфузи кишвар ҳамчун мамлакати осоишта ва дорои захираҳои бойи туристӣ таъсири калон расонида истодааст. 

Ба иттилои Кумитаи ҷавонон, варзиш ва сайёҳии назди Ҳукумати ҷумҳурӣ, соли 2015 барои туризми кишвар соли бобарор буд ва баҳри саёҳати донишҷӯӣ ва мактабӣ, инчунин муаррифии имкониятҳои туристӣ беш аз 200 чорабинии мақсаднок баргузор гардид. Дар се моҳи аввали соли равон бошад, шумораи чунин чорабиниҳо ба 76 адад расид.

Дар семоҳаи якуми соли 2016 ба кишвар 89 101 нафар шаҳрванди хориҷӣ ташриф оварданд, ки 73 200 нафараш турист мебошанд. Ин нишондод нисбат ба ҳамин давраи соли 2015 9880 нафар зиёд аст.