Панҷ ширкати ҳунармандии кишвар дар намоишгоҳи маъруфи байналмилалии молҳои истеъмолӣ – «Ambiente”, ки 10- 14 феврали соли ҷорӣ дар шаҳри Франкфурти Олмон баргузор мегардад, иштирок мекунанд.  

Тоҷикистонро дар ин намоишгоҳ Иттиҳоди ҳунармандони Тоҷикистон, бахши ҳунармандии Иттиҳоди сайёҳии водии Зарафшон - “Армуғон” ва ширкатҳои “Помир Ҷевелз”, “СОХСА/Озара” ва “Рухом” намояндагӣ мекунанд.

Ҳамасола, дар намоишгоҳи “Ambiente” 4700 ширкат аз қариб 90 кишвар ва тақрибан 145000 меҳмон аз 160 кишвари ҷаҳон иштирок мекунанд. Дар ҷараёни он чандин чорабиниҳои дигар гузаронида мешаванд, ки дар онҳо равандҳои тозатарини соҳаи саноат ба маъраз гузошта шуда, ҳамчунин, имконияти барқарор кардани тамосҳои нав фароҳам меояд. Ширкаткунандагони намоишгоҳ аз навовариҳои корбурдӣ дар мӯди тарроҳӣ ва равандҳои мӯдсозии бозор огоҳ мешаванд.

Габриэла Бирде, мушовири байналмилалии МТБ (созмондиҳандаи ин сафар) доир ба тарроҳӣ ва бозорёбӣ, мегӯяд, “Тоҷикистон дар ин намоишгоҳ омехтаи тарроҳии қадима бо мӯди ҳозиразамон, зардӯзиҳо бо нақшҳои миллӣ, кифҳо ва аксессуарҳо аз пӯст, маҳсулоти заргарии бо сангҳои нимақимматбаҳо ороёфта, шонаҳои чӯбин, маҳсулоти дастбофт аз пашм ва маҳсулоти дигари дастиро ба намоиш мегузорад”.

Нигина Икромова, мудири иҷроияи Иттиҳоди ҳунармандони Тоҷикистон мегӯяд, “мо дар ин намоишгоҳ барои дарёфти ҳамкорҳо ва бозорҳои нав, бозёфти мӯду ҷараёнҳои нав дар олами ҳунарҳои дастӣ, ҳамчунин, барои намоиш додани зебоии нодири шарқии маҳсулоти тоҷикӣ ба муштариёни ширкат мекунем. Мутмаинам, ки бо зебоии маҳсулотамон мо меҳмонони ин намоишгоҳро ба ҳайрат хоҳем гузошт”.