Тавре иттилоъ дода будем, субҳи имрӯз котиби генералии Созмони умумиҷаҳонии сайёҳӣ Толиб Рифоӣ бо сафари дурӯза вориди Тоҷикистон шуд.

Раиси Кумитаи ҷавонон, варзиш ва сайёҳии назди Ҳукумати ҷумҳурӣ Аҳтам Абдуллозода чанде пеш Толиб Рифоиро ба ҳузур пазируфта, бо ӯ мулоқот анҷом дод.

Дар ифтитоҳи мулоқот Аҳтам Абдуллозода ташрифи Толиб Рифоиро ба Тоҷикистон хайрамақдам намуд. Дар мулоқот инчунин вобаста ба дастовард, мушкилот ва имкониятҳои соҳа мубодилаи афкор сурат гирифт.

Дар навбати худ Толиб Рифоӣ Тоҷикистонро ҳамчун биҳишти кашфношуда арзёбӣ намуда, мақсади ташрифашро ба Тоҷикистон кӯмак, дастгирӣ ва мусоидат намудан дар  рушди туризм ва воридшавии сайёҳони хориҷӣ, баланд бардоштани имиҷи Тоҷикистон ва тавонмандии ширкатҳои туристӣ рабт дод: «Тоҷикистон дар дунё мақому манзалати хоса дошта, аз эҳтирому эътибори хоса бархурдо аст, - таъкид дошт зимни мулоқот котиби генералии  Созмони умумиҷаҳонии сайёҳӣ.

Номбурда афзуд, ки аз миёни кишварҳои Осиёи Марказӣ Тоҷикистон бо нишондоди ҷалби сайёҳони хориҷӣ дар ҷойи аввал меистад ва ин нишондод ба 55 фисад баробар аст, ки Тоҷикистонро дар ин самт ба кишварҳои соҳаи туризмашон пешрафта баробар мекунад.

Дар фарҷоми мулоқот Раиси Кумитаи ҷавонон, варзиш ва сайёҳӣ Аҳтам Абдуллозода изҳори умедворӣ намуд, ки сафари Толиб Рифоӣ ба рушди соҳаи туризм такони ҷиддӣ бахшида, имкони баланд шудани имиҷи Тоҷикистон ҳамчун кишвари дорои манзараҳои зебои тамошобоб дар арсаи ҷаҳон мегардад.

Дар назар аст, ки Котиби генералии Созмони умумиҷаҳонии сайёҳӣ зимни ин сафар аз мавзеҳои сайёҳии шаҳри Норак - НБО “Норак”, истироҳатгоҳи “Пули сангин”, намоиши ҳунарҳои мардумӣ, Наврӯзгоҳи пойтахт, Кохи Наврӯз ва кохи “Малика” воқеъ дар дараи хушманзараи Варзоб дидан намуда, бо Сарвазири мамлакат Қоҳир Расулзода, донишҷӯёни бахши сайёҳии донишгоҳҳои оливу касбии кишвар ва намояндагони расонаҳои хабарӣ  доир ба таассуроти сафараш аз Тоҷикистон вохуриву мулоқот намояд.