Таҳти унвони мазкур бахшида ба “Солҳои рушди деҳот, сайёҳӣ ва ҳунарҳои мардумӣ” моҳи апрели соли равон дар вилояти Суғд Фестивали вилоятии ҳунарҳои мардумӣ гузаронида мешавад.

Дар ин бора қарори Раиси вилояти Суғд аз 15 марти соли 2019 таҳти №132 ба тасвиб расида, он бо мақсади эҳёи анъанаҳои аҷдодии ҳунарҳои мардумӣ, тарбияи ҳисси зебоипарастӣ, тарғиби таҷрибаи пешқадами ҳунармандони варзида доир хоҳад шуд.

Мутобиқи низомномаи тасдиқгардида, фестивал дар ду давр доир гардида, даври аввали он дар шаҳру ноҳияҳо ва даври дуюм дар маркази вилоят баргузор хоҳад шуд. Дар интиҳои фестивал ғолибон аз рӯи бахшҳои “Беҳтарин таоми миллӣ ва нону шириниҳо”, “Беҳтарин ҳунари мардумӣ бо истифода аз матоъ ва пашму пӯст”, “Беҳтарин ҳунари мардумӣ бо истифода аз чӯб ва гилу гаҷ” ва “Беҳтарин ҳунари мардумӣ бо истифода аз санг ва оҳан” дар ҳаҷми 1000, 2000 ва 3000 сомонӣ мукофотпулӣ қадрдонӣ мегарданд.