Бо ташаббуси Донишгоҳи давлатии Хуҷанд ба номи академик Бобоҷон Ғафуров ва Кумитаи кор бо ҷавонон ва варзиш ба муносибати эълон гардидани соли 2017 “Соли ҷавонон”, 20-солагии Рӯзи Ваҳдати миллӣ ва 25-солагии Иҷлосияи ХVI Шӯрои Олии Ҷумҳурии Тоҷикистон бо мақсади омӯзиши таҷрибаи байниҳамдигарӣ, таҳкими робитаҳои таълимӣ, илмӣ, эҷодии донишҷўёни мактабҳои олии кишвар, ташаккули муносибатҳои дӯстона миёни онҳо рӯзҳои 20-23-юми июни соли равон Корвони ваҳдати донишҷўёни вилояти Хатлон дар Донишгоҳи давлатии Хуҷанд ба номи академик Бобоҷон Ғафуров таҳти унвони “Донишҷўён – ҷавонони ваҳдатсаро” доир гардид.

Дар чорабинии мазкур зиёда аз 30 нафар донишҷўёну устодони Донишгоҳи давлатии Кӯлоб ба номи Абӯабдуллоҳ Рӯдакӣ, Донишгоҳи давлатии Қӯрғонтеппа ба номи Носири Хусрав ва Донишгоҳи давлатии Данғара ширкат намуданд.

Иштирокчиён дар Конфронси илмӣ - амалӣ бахшида ба 20- солагии Ваҳдати миллӣ доир ба мавзўи «Ваҳдат сарчашмаи саодати халқ», ки дар толори ДДХ ба номи академик Бобоҷон Ғафуров сурат гирифт, иштирок намуда, инчунин, аз Осорхонаи вилоятии кишваршиносӣ, осорхонаи академик Бобоҷон Ғафуров, регистони мавзеи «Панҷшанбе», муассисаҳои таҳсилоти олӣ ва миёнаи касбии маркази вилояти Суғд, маҷмааи таърихию фарҳангии «Истиқлол», Боғи фароғатӣ-истироҳатии «Истиқлол», хонамузейи Нозим Усмонов воқеъ дар ҳудуди ноҳияи Бобоҷон Ғафуров, Осорхонаи таърихии Қасри маданияти Арбоб, толори баргузории Иҷлосияи ХVI Шӯрои Олии Ҷумҳурии Тоҷикистон, Чойхонаи миллӣ ва Амфитеатр, минтақаи «Баҳритоҷик» ва Осоишгоҳи «Баҳористон»-ишаҳри Гулистон боздид намуданд.
Дар доираи чорабинӣ меҳмонон дар Хона–музейи баноми Камоли Хуҷандӣ бо шоираи Халқии Тоҷикистон Фарзона мулоқот анҷом доданд.
Барномаи калони фарҳангӣ, ки таҳти унвони «Шоми ҷавонӣ» бо иштироки ситораҳои эстрадии вилоят ва донишҷӯёни болаёқати донишгоҳ баргузор шуд, анҷомбахши чорабиниҳо гардид.