Тавре шоҳидем, даврони соҳибистиқлолӣ як саҳифаи дурахшон, рӯҳу равони тоза ва нерӯю тавони нав дар таърихи инкишофи варзиши мамлакат, ҷавонони варзишгарамон гардид. Дар воқеъ, варзиш қосиди сулҳ асту он сарҳад надорад. Бинобар ҳамин, барои солимгардонии миллат ҳама дастуру ҳидоятҳо роҳандозӣ мегардад, то ин ки тарбияи ҷисмонӣ ва варзиш дӯст, ёвар ва ҳамқадами доимии ҷавонону наврасон бошад. Беҳуда ҳам нест, ки танҳо дар давоми панҷ соли охир бузургтарин варзишгоҳҳо барои 20 ҳазор дар шаҳри Душанбе, барои 25 ҳазор тамошобин дар шаҳрҳои Хуҷанду Ваҳдат, барои 18 ҳазор дар шаҳри Турсунзода, барои 15 ҳазор дар шаҳрҳои Кӯлобу Хоруғ, барои 8 ҳазор ҷойҳои нишаст дар шаҳру навоҳии қаламрави Рашт ва варзишгоҳи нав барои 5 ҳазор ҷои нишаст дар ноҳияи Темурмалик сохта шуданд. Барои занону модарон ва камолоти ҷисмонии онҳо шароитҳои хуби машқӣ фароҳам оварда шудаанд. Боиси ифтихор аст, ки ҳар сол варзишгарони кишвар дар арсаи байналмилалӣ то 3000 медалҳои тиллову нуқра ва биринҷӣ, ҷому шоҳҷоизаҳоро ба даст меоранд. Масалан, дар соли 2015 293 варзишгари ҷумҳӯрӣ ба 60 чорабинии сатҳи байналмилалӣ сафарбар гардида, ба хазинаи варзишии кишвар 629 медал, аз ҷумла 223 медали тилло, 178 медали нуқра ва 228 медали биринҷӣ ба даст оварданд.

Дар мисоли Донишкадаи тарбияи ҷисмонии Тоҷикистон ба номи С. Раҳимов қайд кардан бомаврид аст, ки ба шарофати Истиқлолияти давлатӣ ва Созишномаи истиқрори сулҳ дастоварду натиҷаҳои варзишӣ, аз ҷумла нишондиҳандаҳои донишҷӯёни донишкада тӯли солҳои охир хеле боло рафтааст. Ин бесабаб нест, зеро баъди ба даст овардани истиқлолият дар кишвар муносибат ба варзиш ҳамчун мактаби бузурги тарбия ва воситаи муаррифии давлати соҳибистиқлол мазмуну моҳияти нав пайдо кард. Агар ба рақамҳо рӯ орем, давоми 45 соли мавҷудияти худ ин боргоҳи ягонаи олии варзишии кишварро беш аз 30 ҳазор нафар хатм кардаанд ва ин далели он аст, ки ҳайати кадрии донишкада аз ӯҳдаи тайёр намудани мутахассисони баландихтисос сарбаландона мебароянд. Баъдан, ба шарофати хатми ҳамасола шӯҳрату эътибори донишкада дар байни сокинони шаҳру ноҳияҳо боз ҳам афзуд ва барои зиёд шудани сафи хоҳишмандони таҳсил дар донишкада ва шумораи довталабон мусоидат намуд ва, бешубҳа, сокинони кишвар мудом аз пирӯзию сарбаландӣ ва муваффақиятҳои ҷолиби номварони варзиши ҷаҳонӣ Зебунисо Рустамова, Андрей Абдувалиев, Сайидмуъмин Раҳимов, Аҳтам Раҷабов, Иброҳим Ҳасанов, бародарон Юрий ва Михаил Лабановҳо, Анатолий Старостин, Гавҳар Пӯлодова, Вадим Соков, Хайрулло Назриев, бародарон Алишеру Рустам, Расулу Сӯҳроб Боқиевҳо, Гулсара Додобоева, Дилшод Назаров, Эрика Шиллер, Муқаддас Набиева ва ба инҳо монанд барҳақ ифтихор менамоянд, ки маҳз онҳо нахустин алифбои варзишро аз донишкада омӯхтаанд. Имрӯз ному насаби бонувони варзишгар Албина Камолиддинова, Фирӯза Зубайдова, Лола Абдуллоева, хоҳарон Фотимаву Зӯҳро Тағоеваҳо, Гулсара Додобоева, хоҳарон Надимаю Мадина Мирзоеваҳо, Сабоҳат Исмоилова, Мавзуна Чориева, Шаҳло Насриддинова, Дилором Шерова шоистаи таҳсин ва офаринҳост, ки аксари онҳо дастпарварони ин боргоҳи муқаддас мебошанд.

Хушбахтона, имрӯз ҳам донишкада ҳамон анъанаи ғолибиятҳоро идома дода, ҳоло 200 нафар беҳтарин донишҷӯён аз рӯи 15 намуди варзиш узвҳои пайвастаи тимҳои мунтахаби Ҷумҳурии Тоҷикистон мебошанд.

Дар Бозиҳои тобистонаи 29-уми олимпие, ки соли 2008 дар шаҳри Пекини Ҷумҳурии мардуми Чин доир гардид, аз 20 нафар узви даста 9 нафари онҳоро маҳз дастпарварони донишкада ташкил медоданд. Фоли басо нек ҳам буд, ки байни онҳо хатмкардаи донишкада Расул Боқиев соҳиби зинаи сеюми Бозиҳои олимпӣ ва сазовори медали биринҷӣ гардид. Барандаи медали Бозиҳои олимпӣ дар Лондон Мавзуна Чориева ифтихори на танҳо донишкада, балки саросари Тоҷикистон аст. Дастоварди Дилшод Назаров дар Бозиҳои навбатии олимпӣ на танҳо тоҷикистониён, балки кулли тоҷикони дунёро шод намуд. Имрӯз донишкада бо ғолибони мусобиқаҳои ҷаҳонӣ, байналмилалӣ, минтақавию ҷумҳуриявӣ – собиқ хатмкардаҳову дастпарварон ва донишҷӯёни ин боргоҳи муқаддас, аз қабилӣ Дилшод Назаров, Шералӣ Бозоров, Муҳаммад Абдураҳмонов, Парвиз Собиров, Шералӣ Достиев, Акмалиддин Каримов, Мақсадулло Ҷабборов, Анвар Юнусов, Галина Митяева, Сотиболдӣ Ҳайитов, Мурод Тӯйчиев, Дилшоду Фарҳод Восиевҳо, Абдурауф Мӯсоев, Лола Лиситса ва Хуршед Маҷидов, ки шаъну эътибори кишварамонро дар арсаи ҷаҳонӣ баланд бардошта истодаанд ва даҳҳо тани дигар, ифтихор дорад. Умуман, дастпарварони донишкада аз рӯи аксари намудҳои варзишӣ дар баландтарин сатҳи мусобиқаҳо шарафи мамлакатро ҳимоя менамоянд ва дар қувваозмоиҳои сатҳи ҷаҳонӣ, байналмилалӣ, минтақавӣ ва ҷумҳуриявӣ аз рӯи аксарияти намудҳои варзишие, ки ҳамчун дастаи мунтахаби Тоҷикистон сафарбар карда мешаванд, афзалият доранд. Бешубҳа, онҳо ва даҳҳо дастпарварони дигари донишкада аз он ифтихор доранд, ки дар оғӯши ин донишкада парвариш ёфта, аз ҳамин даргоҳи муқаддас ба қуллаҳои баланди варзиш, илму эҷод ва шӯҳрату эҳтиром расидаанд ва бузургу соҳибном гаштаанд.

Тӯли солҳои охир бо роҳбарии доктори илмҳои педагогӣ Сафаров Шодӣ Асомуродович донишкада ба дастовардҳои муҳим дар таҳкими раванди таълим, илм, варзиш, корҳои тарбиявӣ ва таҳкими пойгоҳи таълимию илмӣ ноил гардид. Пеш аз ҳама дар раванди такмили сифати таълим дар донишкада бо мақсади тайёр намудани мутахассисони ба талаботи замон ҷавобгӯ як қатор тағйиротҳои зиёд ба амал омаданд.

Басо рамзист, ки ҷашни мубораки 45-солагии таъсиси донишкада ба иди 25-солагии Истиқлолияти давлатии Ҷумҳурии Тоҷикистон мувофиқ афтод ва бо сарфарозӣ метавон гуфт, ки ҷомеаи бисёрҳазорнафараи Донишкадаи тарбияи ҷисмонии Тоҷикистон ба номи С. Раҳимов баҳри татбиқи ормонҳои миллат, баланд бардоштани сатҳи маънавиёт, фарҳанг, тарбияи кадрҳои баландихтисосу садоқатманд пайваста кӯшиш намуда, баҳри ободӣ, шукуфоии Ватан, ба як кишвари пешрафта, мутамаддину мутараққӣ табдил додани Тоҷикистон ва дарёфти мақоми шоистаи он дар ҷомеаи ҷаҳонӣ минбаъд низ хизмат хоҳанд кард.

Дилором Каримова, муовини аввали ректори ДТҶТ ба номи С.Раҳимов