Бахшида ба 20-солагии Ваҳдати миллӣ ва “Соли ҷавонон” имрӯз, 20-уми июн, бо ташаббуси Бахши кор бо ҷавонон ва варзиши ноҳияи Исмоили Сомонӣ дар Донишкадаи олии сарҳадии КДАМ ҶТ конфронси илмӣ-амалӣ таҳти унвони “Нақши ҷавонон дар раванди нигоҳдошти Ваҳдати миллӣ” баргузор гардид.

Дар конфронс намояндагон аз Кумитаи кор бо ҷавонон ва варзиш, дастгоҳи марказии Қӯшунҳои Сарҳадии КДАМ, афсарону курсантони донишкада ва собиқадорони соҳа иштирок ва суханронӣ намуданд.

Ҳабибулло Амирбекзода, муовини раиси Кумитаи кор бо ҷавонон ва варзиши назди Ҳукумати ҷумҳурӣ, зимни суханронии худ аввалан ҳозиринро ба ҷашни 20 солагии Ваҳдати миллӣ ва “Соли ҷавонон” муборакбод намуда, иброз дошт, ки: “Мову шумо имрӯз вазифадорем, баҳри пос доштани Ваҳдати миллӣ кӯшиш намоем. Истиқлолияти давлатӣ, агар дастоварди бузурги мо баъди ҳазорсолаҳо бошад, пас Ваҳдати миллӣ ин бузургтарин дастоварди Тоҷикистони соҳибистиқлол аст, ки он тавонист моро ҳамчун давлати ваҳдатофар дар арсаи байналмилалӣ муаррифӣ намояд. Имрӯз ваҳдати мо аз ҷониби давлатҳои дигар омӯхта шудаистодааст, ки тоҷикон чи гуна тавонистанд, ваҳдатро ба даст биёранду ватанашонро обод созанд”.

Иштирокчиёни дигар ҳангоми баромади хеш аз чи гуна ба даст омадани Ваҳдати миллӣ ва нақши он дар таърихи давлатдорӣ ибрози назар намуданд.

Ҳамчунин дар ҷараёни вохурӣ доир ба “Соли ҷавонон” таъкид гардид, ки соли мазкур ҳар як лаҳзаву дақиқааш барои мо бисёр муҳим аст. Мо дар якҷоягӣ бояд ин солро бо шукуҳу шаҳомати хоса сипарӣ намоем ва барои наслҳои оянда, ки баъди мову шумо аз ин сол ёдоварӣ мекунанд, як чизи хубе боқӣ гузорем, то онро ба некӣ ёд кунанд. Зеро соли мазкур такрорнашаванда аст.

Гуфта шуд, ки мақсад аз баргузории чорабинӣ ёдоварӣ аз ҷоннисориҳои Пешвои миллат ҷиҳати ноил шудан ба Ваҳдати миллӣ ва истиқрори сулҳ, баланд бардоштани маърифати фарҳангии ҷавонон, инкишофи ҳисси ватандӯстӣ, мусоидат ва тавсеа бахшидани эҳсоси худшиносӣ, садоқат ба Ватан, нангу номуси миллӣ ва арҷгузорӣ ба таърих ва тамаддуни халқамон мебошад.

Беҳрӯз ХОЛМУРОДОВ, “ҶТ”