ҶАВОНОН
Якшанбе 20 Сентябр 2020 01:48
3777
Дониш заврақест, инсонро дар баҳри пурталотуми зиндагӣ ҳамеша ба соҳили мурод мерасонаду мушкилкушои кулли муаммоҳо мешавад. Инро таърихи инсоният собит кардааст. Ҳамин аст, ки имрӯз таваҷҷуҳ ба он хеле зиёд буда, махсусан ҷавонону наврасон бо дилгармии махсус паи андӯхтани онанд.

Анушервон Зувайдуллозода, хонандаи синфи 11-и Мактаби байналмилалии президентии шаҳри Душанбе, бо дарки ин нукта ҳамарӯза паи донишандӯзист. Ӯ имрӯз дар роҳи дониш хеле муваффақ аст. Зеро дар соли ҷорӣ тавассути донишҳои азбарнамудааш дар чандин озмуну олимпиадаҳои сатҳи ҷумҳуриявию байналмилалӣ сазовори ҷойҳои ифтихорӣ гардидааст.

Ӯ хеле хуб дарк мекунад, ки роҳи ягонаи расидан ба орзуву мақсадҳои наку маҳз тавассути доштани донишҳои гуногуни муосир ба кас муяссар мегардад. Бо ин мақсад ӯ имрӯз тавсияҳои устодонро ҷиҳати илмомӯзӣ амалӣ намуда, доим талош менамояд, то соҳибмаърифату донишманд бошад.

- Ман бори аввал соли 2016 дар Олимпиадаи байналмилалии лоиҳавӣ аз фанни математика бо номи “Жалдасбеков”, ки дар шаҳри Алмаатои Ҷумҳурии Қазоқистон доир гардид, иштирок намудам. Дар олимпиадаи мазкур хонандагони қариб 10 давлат иштирок доштанд. Ман лоиҳаи худро дар мавзӯи “Истифодаи теоремаи Менелай дар геометрияи фазоӣ” пешниҳод намуда, сазовори ҷои сеюм ва соҳиби медали биринҷӣ гардидам. Ишғол намудани зинаи ифтихорӣ дар олимпиада бароям роҳи дигареро боз намуд, то боз ҳам хубтару беҳтар омӯзаму ба дастовардҳои нав ноил гардам. Зеро бузургон низ фармудаанд, ки подоши ҳар меҳнат самар хоҳад дошт. Бениҳоят хурсандам, ки талошҳоям натиҷаи назаррас ба бор оварданд, - мегӯяд Анушервон.

Ӯ комёбиҳои худро натиҷаи таваҷҷуҳи пайвастааш нисбат ба донишандӯзӣ меҳисобад. Таъкид менамояд, ки имрӯз ҷавонон бояд ҷиҳати илмомӯзӣ ва соҳибдонишу соҳибкасб гардидан доим дар талошу ҷустуҷӯ бошанд.

Анушервон бори охир бо пешниҳод намудани лоиҳаи илмиаш бо номи “Барномаи ибораҳои англисӣ-тоҷикӣ барои телефонҳои мобилии андроид” дар Олимпиадаи лоиҳавии байналмилалии “INFOMATRIX- 2017” аз фанни технологияи информатсионӣ, ки соли равон дар шаҳри Бухарести давлати Руминия доир шуда буд, сазовори ҷои сеюм ва соҳиби медали биринҷӣ гардид.

- Анушервон яке аз хонандагони беҳтарини синф ба шумор меравад. Ӯ дар байни ҳамсинфонаш эътибори хосса дорад. Зеро вай дар Олимпиадаи ноҳиявӣ аз фанни математика иштирок намуда, сазовори ҷои сеюм гардид ва барои иштирок дар Олимпиадаи шаҳрӣ имконият ба даст овард. Вай хонандаи масъулиятшинос аст ва ахлоқи намунавӣ дорад. Мо итминон дорем, ки Анушервон дар оянда яке аз мутахассисони хуб гардида, ба дастовардҳои зиёд ноил мегардад, - мегӯяд Саидкарим Раҳимов, роҳбари синфи Анушервон.

- Ман сипоси бепоёни худро ба Асосгузори сулҳу ваҳдати миллӣ, Пешвои миллат, Президенти кишварамон, муҳтарам Эмомалӣ Раҳмон мерасонам. Чунки барои мо кулли имкониятҳои хуби таҳсил фароҳам оварда шудааст. Мо метавонем, бо санҷидани донишу маҳорати худ кишвари азизамонро дар арсаи байналмилалӣ муаррифӣ намоем. Ҳар нафар бояд ба қадри ин ҳама имкониятҳо расида, ҷавобан ба он фаъолона дониш омӯзаду дар рушди ин меҳан саҳмгузор бошад”, - афзуд Анушервон Зувайдуллозода.

Ӯ доим дар талошу такопӯ ва омӯзиши пайваста аст ва мо боварӣ дорем, ки дар оянда низ ба комёбиҳои бештар ноил хоҳад гашт. Дар ин роҳ барояш барор хоҳонем.

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
31 1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 1 2 3 4

Сентябр 2020 c.