4 августи соли ҷорӣ дар бинои Қасри фарҳанги ноҳияи Ҷаббор Расулови вилояти Суғд Форуми аввалини ҷумҳуриявии намояндагони ҷавони вазорату идораҳо ва ташкилоту муассисаҳо таҳти унвони “Ҷавонон – пайрави Пешвои миллат” бахшида ба “Соли ҷавонон” доир гардид.

Дар баргузории он раиси ноҳияи Ҷаббор Расулов Комилҷон Салимзода, масъулини Кумитаи кор бо ҷавонон ва варзиш, 150 нафар намояндагони ҷавони вазорату идораҳо, ташкилоту муассисаҳо ва ҷавонону фаъолони ноҳия ширкат варзинданд.
Раиси ноҳия зимни сухани ифтитоҳии худ қайд намуд, ки маҳз дар замони Истиқлолият баҳри беҳбудии ҷавонон нақшаҳои ҳадафмандона барои беҳрӯзии ҷавонон татбиқ ва амалӣ гардиданд. “Ҳуқумати Тоҷикистон ҷавононро нерӯи созанда ва пешбарандаи ҳамаи соҳаҳои ҳаёти мамлакат меҳисобад ва ҳалли мушкилоту масъалаҳои вобаста ба зиндагӣ ва таҳсилу фаъолияти онҳоро ҳамчун самти афзалиятноки сиёсати худ эътироф менамояд. Махсусан қабул гардидани Қонуни Ҷумҳурии Тоҷикистон “Дар бораи сиёсати давлатии ҷавонон” собит сохт, ки Ҳукумати кишвар дар сиёсати худ ба ҷавонон такя карда, онҳоро тарбия менамояд ва ба камол расидани насли ҷавони созандаро яке аз вазифаҳои аввалиндараҷаи худ медонад”,- афзуд номбурда.

Инчунин, дар рафти форуми мазкур сардори Раёсати кор бо ҷавонони Кумитаи кор бо ҷавонон ва варзиш Шоҳзод Раҳимов ҳозиринро ба “Соли ҷавонон” шодбош гуфта, нерӯи зеҳнию ҷисмонии ҷавононро дар ҳама давру замон яке аз омилҳои муҳими инкишофи давлат ва пешбурди ҷомеа тавсиф намуд: “Аз саҳифаҳои таърих хуб огоҳ ҳастем, ки тамоми ихтирооту таҳқиқотҳо ва қаҳамониҳову ҷонисориҳо ба номи ҷавонон сабт гардиааст”.

Дар рафти Форум мутахасисони ҷавони вазорату идораҳо ва ташкилоту муассиса дар мавзӯҳои гуногуни марбут ба ҳаёти ҷавонон муърӯза намуданд. Аз ҷумла Зарина Мансурова, мутахассиси пешбари Раёсати кор бо ҷавонон ва варзиши вилояти Суғд дар мавзӯи “Нақши Пешвои миллат дар рушди фарҳанги миллӣ ва раҳнамоии ҷавонон барои ҳифз ва нигаҳдошти он”, Қувватов Саъдулло, мудири шуъбаи кор бо ҷавонони Донишгоҳи давлатии омӯзгории Тоҷикистон дар мавзӯи “Мактаби роҳбарӣ ва саёсии Асосгузори сулҳу ваҳдати миллӣ - Пешввои миллат, Президенти Ҷумҳурии Тоҷикистон, муҳтарам Эмомалӣ Раҳмон заминаи боэътимоди давлатдорию давлатсозӣ дар ҷаҳони муосир”, Шералӣ Ризоён, сардори Раёсати таҳлил ва ояндабинии сиёсати дохилии Маркази тақиқоти стратегии назди Президенти Ҷумҳурии Тоҷикистон дар мавзӯи “Масъалаҳои шинохти манфиатҳои миллии Тоҷикистон дар шароити муосир”, Шоён Қурбонов, котиби сеюми Раёсати кадрҳо ва иттилооти махсуси Вазорати корҳои хориҷӣ дар мавзӯи “Ташаббус ва иқдомҳои созандаи Пешвои миллат дар арсаи байналмилалӣ”, Шамима Хоникова, аспиранти Академияи илмҳои Ҷумҳурии Тоҷикистон дар мавзӯи “Пешвои миллат ҳомии илм: нақши созандаи ҷавонон дар рушди илми тоҷик” ва Наимаи Мансурхон, муовини директори ҶСК “Сементи тоҷик” дар мавзӯи “Ояндаро имрӯз месозем” маърӯза намуданд.
Дар охири Форум муроҷиатномаи иштирокчиёнро Дилошӯб Розиқов, намояндаи Кумитаи кор бо ҷавонон ва варзиш ба самъи ҳозирин расонид.

Ёдовар мешавем, ки аз санаи 3 то 6 август дар вилояти Суғд бо ибтикори Кумитаи кор бо ҷавонон ва варзиш дар якҷоягӣ бо Вазорати корҳои дохилӣ ва мақомоти иҷроияи ҳокимияти давлатии вилояти Суғд таҳти сарпарастии президенти Федератсияи футболи Тоҷикистон, муҳтарам Рустами Эмомалӣ, ки сарпарастии бевоситаи тамоми чорабиниҳои “Соли ҷавонон”-ро бар уҳда дорад, Форуми ҷумҳуриявии ҷавонон таҳти унвони “Ҷавонон - пайрави Пешвои миллат” баргузор гардид.

 Хуршед МАВЛОН, “ҶТ”