“Ҳадафи сиёсати давлатии мо дар бахши ҷавонон тарбияи кадрҳо ва мутахассисони донишманду соҳибмаърифат, насли дорои ҷаҳонбинии васеъ ва хислатҳои ватандӯстиву ватанпарастӣ мебошад”.

Эмомалӣ Раҳмон  

Инак, аз замони ба даст овардани Истиқлоли давлатии Ҷумҳурии Тоҷикистон 30 сол сипарӣ гардид. Дар тӯли ин солҳо баробари дигар қишрҳои ҷомеа, ҷавонон низ тавонистанд, ки дар соҳаҳои гуногуни ҳаёт нақши худро гузошта бошанд. Аз ҷумла, нақши ҷавонон дар ҳаёти сиёсии кишвар муҳим арзёбӣ мешавад. Дар ин раванд Ҳукумати Ҷумҳурии Тоҷикистон тӯли 30 соли Истиқлоли давлатӣ як қатор тадбирҳоро барои ҳаёти сиёсиву осоиштаи ҷавонон андешидааст.

Бояд гуфт, ки Ҳукумати кишвар аз солҳои аввали соҳибистиқлолӣ ба ҷавонон таваҷҷуҳи хосса намуд. Ин буд, ки баъд аз шаш моҳи ба даст овардани Истиқлолияти давлатӣ парлумони кишвар Қонуни Ҷумҳурии Тоҷикистон “Дар бораи сиёсати давлатии ҷавонон”-ро ба тасвиб расонид, ки санади мазкур заминаҳои ташкиливу ҳуқуқии сиёсати давлатии ҷавононро муҳайё ва муайян намуд.

Қонуни мазкур асосҳои ташкилӣ, ҳуқуқӣ, иҷтимоию иқтисодии тарбия, ташаккул ва камолоти ҷавононро муқаррар намуда, принсипҳо ва тадбирҳои татбиқи сиёсати давлат-ро дар соҳаи истифодаи пурсамари неруи зеҳнӣ ва маънавии онҳо, ки ба манфиати ҷамъият равона мешавад, муайян мекунад.    

Бояд тазаккур дод, ки Ҷумҳурии Тоҷикистон миёни кишварҳои ИДМ яке аз аввалинҳо шуда қонуни асосии ҷавононро қабул кардааст. Далели мазкур бори дигар собит месозад, ки Ҳукумати Ҷумҳурии Тоҷикистон ташаккули сиёсати давлатии ҷавононро яке аз самтҳои асосии стратегӣ меҳисобад.

ҶАВОНОН ДАР МЕҲВАРИ СИЁСАТ

Мутобиқи нишондодҳои оморӣ, ҷавонони то 30 - сола ба 70% аҳолии Тоҷикистон баробаранд ва онҳо айни замон қувваи асосии пешбарандаи ҷомеаи имрӯзаи мо маҳсуб меёбанд. Пас, эшон қувваи бузургеро мемонанд, ки чи дар сиёсат ва чи дар дигар самтҳои ҷомеа бояд саҳми онҳо созанда бошад. Воқеан, ҷавонон тӯли 30 соли истиқлол дар сиёсати давлатии кишвар чӣ нақши боризе доранд? Оё метавон гуфт, ки имрӯз ҷавонони мо зиракии сиёсиро аз даст надода, дар ин самт фаъоланд?

Албатта, дар раванди ҷаҳонишавӣ нафаре метавонад устувор бошаду фирефтаи гурӯҳҳои манфиатҷӯ ва ҳизбу ҳаракатҳои иртиҷоӣ нагардад, ки аз донишҳои сиёсӣ, ҳуқуқӣ бархурдор бошад ва дар баробари ин тафаккури солим ва иродаи мустаҳкам дошта бошад. Дар ин маврид Сайфулло Муллоҷонов, коршиноси тоҷик мегӯяд, ки ҷавонон агар воқеан хоҳанд, ки барои ҷомеаи имрӯза хизмат кунанд ва дар меҳвари сиёсат қарор гиранд, бояд бо силоҳи донишу басират мусаллаҳ бошанд, чун дар дунёи имрӯз бе илму дониш ва басирати кофӣ наметавон кор ба ҷое бурду муваффақ шуд.

Ба гуфтаи ин коршинос чизи муҳими дигаре, ки ҷавонон бояд онро пайгирӣ кунанд, хештаншиносӣ ва дарки ҳаводиси ҷомеаи имрӯзаи минтақа ва ҷаҳон мебошад. “Чун дунёи имрӯз хеле ноором буда, раванди ҷаҳонишавӣ таъсири худро ба ҷомеаи мо низ мерасонад ва ин таъсиррасонӣ на ҳамеша созандаву муфид аст”,-мегӯяд ӯ.

Бино ба гуфтаи номзади илмҳои сиёсӣ ва раиси шӯрои олимони ҷавон дар вилояти Суғд Шуҳрат Саидзода, ҷавонон чӣ дар гузашта ва чӣ имрӯз дар таҳкими суботу оромӣ ва пешрафти кишвар нақши калидӣ доранд. “Ҳукумати Тоҷикистон аз рӯзҳои аввали соҳибистиқлолӣ бо такя ба ҷавонон сиёсати худро амалӣ намуд. Таваҷҷуҳи давлат, хосса Пешвои миллат муҳтарам Эмомалӣ Раҳмон солҳои охир нисбати ҷавонон бамаротиб боло рафт”. Ҳамзамон, Сайфулло Муллоҷонов бар он аст, ки ҷавонон дар ҳама ҳолат зиракиии сиёсиро истифода кунанд ва нагузоранд, ки ҳар гурӯҳи сиёсие аз онҳо сӯиистифода намояд.

“Ҷавонон агар мехоҳанд, ки рӯзгор бар асоси хостаҳои онҳо бичархад, нагузоранд, ки ҳар гурӯҳи сиёсӣ ва ё қудратталабе дар роҳи расидан ба ҳадафи худ аз онҳо истифода барад. Ҷавонони имрӯзаи моро ибтикори бештар мебояд, ки худ ҷомеаро бисозанд ва онро ба роҳе раҳнамун созанд, ки расидан ба аҳдофу ормонҳо дар он саҳл бошад”,-иброз намуд ӯ.

Номбурда меафзояд, ки дар ин ҳолат ғурури ҷавонӣ набояд монеи он шавад, ки ҷавонон нисбат ба қонун беэътино бошанд, зеро фаъол будан дар ҷомеа ҳаммаъно бо қонуншиканӣ ва зери по гузоштани муқаррароти ҷомеа нест. “Инро аз таҷрибаи талхи солҳои нахустини истиқлол мегӯям, чун дар он солҳо мо шоҳиди он шудем, ки иддае аз ҷавонон хостанд бо шикастану пора кардани низоми мавҷуд ба хостаҳояшон бирасанд ва натиҷа он шуд, ки касе дар хаёлаш ҳам намегузашт”,-меафзояд ӯ.

Ҷавонон низ ширкати худро дар равандҳои сиёсӣ кумак ба ватани хеш медонанд ва омода ҳастанд, ки ҳамеша ин сиёсатро холисона дастгирӣ намоянд.

ПРЕЗИДЕНТ ДАР ПАРТАВИ СИЁСАТИ ДАВЛАТИИ ҶАВОНОН

Асосгузори сулҳу ваҳдати миллӣ - Пешвои миллат муҳтарам Эмомалӣ Раҳмон низ борҳо дар паёмҳои хеш нақши ҷавононро дар сиёсати давлатӣ баҳогузорӣ намудаанд. Аз ҷумла, дар яке аз Паёмҳои худ вобаста ба масъалаи ҷавонон ва қабул гардидани санадҳои меъёрии ҳуқуқӣ баҳри татбиқи сиёсати давлатии ҷавонон чунин таъкид карда буданд: “Баъди ба даст овардани истиқлолият Ҳукумати Тоҷикистон ба татбиқи сиёсати ҷавонон аҳамияти хосса зоҳир намуда истодааст. Институтҳои муҳимми кор бо ҷавонон дар сатҳи ҳукуматӣ ва муассисаҳои таълимӣ ташаккул ёфта, имрӯзҳо дар ҳаёти ҷамъиятӣ ва сиёсии кишварамон иштироки фаъолона доранд. Санадҳои меъ-ёрии ҳуқуқӣ ва Консепсияи миллии сиёсати ҷавонон дар Ҷумҳурии Тоҷикистон заминаҳои татбиқи амалии сиёсати давлатии ҷавононро фароҳам овардаанд. Мақсади асосии ин сиёсат таъмини шароити ҳуқуқӣ, иқтисодиву ташкилӣ ва иҷтимоии ҷавонон мебошад”.

Яке аз тасмимҳои муҳиме, ки дар давоми 30 соли соҳибистиқлолӣ дар ҳаёти сиёсии ҷавонон нақши бориз дошт, ин аз ҷониби Президенти кишвар муҳтарам Эмомалӣ Раҳмон эълон гардидани соли 2017 ҳамчун “Соли ҷавонон” буд. Дар ин сол ҷавонон дар баробари дигар соҳаҳо, ба ҳаёти сиёсии давлат ҷалб гардиданд.
Аз ҷумла, ҷавонкунонии сиёсати кадрӣ ва дар зинаҳои роҳбарикунанда таъйин гардидани шумораи зиёди ҷавонони лаёқатманд аз дарк кардани сиёсати давлатии ҷавонон дарак медиҳад.
Дар ин миён бо ташаббуси Президенти кишвар дар самти ҷавонон корҳои зиёде анҷом дода шуданд, ки ин аз сиёсати ҷавонпарваронаи Роҳбари кишвар дарак медиҳад.

СТРАТЕГИЯ ВА БАРНОМАҲОИ МИЛЛИИ ҶАВОНОН

Бояд гуфт ки дар солҳои соҳибистиқлолии Ҷумуҳурии Тоҷикистон як қатор стратегияҳо, консепсияҳо ва барномаҳои миллие барои ҷавонон роҳандозӣ гардидааст, ки дар ҳаёти ҷавонони кишвар нақши муҳим дошт.
Имрӯзҳо лоиҳаи қонунҳои Ҷумҳурии Тоҷикистон “Дар бораи ҷавонон ва сиёсати давлатии ҷавонон”, “Дар бораи тарбияи ҷисмонӣ ва варзиш”, “Стратегияи сиёсати давлатии ҷавонон то соли 2030” ва “Консепсияи миллии сиёсати давлатии ҷавонон дар Ҷумҳурии Тоҷикистон” дар таҳрири нав таҳия гардида истодаанд, ки бо қабули санадҳои мазкур фаъолияти ҷавонон дар ҷомеа боз ҳам беҳтар ба танзим дароварда мешавад.
Ҳамзамон, лоиҳаи Қонуни Ҷумҳурии Тоҷикистон “Дар бораи ҷавонон ва сиёсати давлатии ҷавонон” дар таҳрири нав таҳия гардида, мутобиқи моддаи 58-и Конститутсияи мамлакат бо Қарори Ҳукумати Ҷумҳурии Тоҷикистон аз 30-юми апрели соли 2021 барои баррасӣ ба Маҷлиси намояндагони Маҷлиси Олии Ҷумҳурии Тоҷикистон пешниҳод карда шуд.

Тавре дар Консепсияи миллии сиёсати ҷавонон дар Ҷумҳурии Тоҷикистон қайд гардидааст, танҳо кишварҳое ба дастовардҳои сиёсӣ ва иқтисодӣ ноил мегарданд, ки ба ҷавонон таваҷҷуҳи бештар зоҳир менамоянд. Тоҷикистон, ки дар ин раванд фаъол аст ва дар доираи ин консепсия амал мекунад, аз муваффақ буданаш дар сиёсати давлат дарак медиҳад.